Eli Eko̩ DʼO̩jo̩ 135 - O̩TAKADA O̩LA O̩JO̩ 1970

Ondu gbe̩gbe̩—ode chʼo̩wai

¹ Me̩ je̩nyu Jihofa, me̩ ki je̩nyu ñw odu Jihofa, me̩ je̩nyu, ame̩ amadu Jihofa,

² ame̩ ku me̩ dago ef unyi Jihofa, ef ologbo unyi O̩jo̩-wa!

³ Me̩ je̩nyu Jihofa, todu Jihofa chenyo̩; me̩ ki keli dʼodu-wñ, todu i chʼebo̩la!

⁴ Todu Jihofa fu Jeko̩b chi ñw o̩la-wñ, Israe̩l la chʼe̩wñ e-wñ kʼi ne̩.

⁵ Todu u chema ka ki Jihofa chʼe̩ne̩ lile, kʼOndu-wa tʼamo̩jo̩ du le.

⁶ E̩wñ du ki nyo̩ Jihofa eju, i che, efojale kpai ane̩-ile̩, ef ohimini abadi kpai unefu du.

⁷ Owñ aje̩ ñw atula kwane̩ ukpoj i ane̩-ile̩, kʼi aje̩ ñw o̩mamanya da tod omi ojale kʼi akʼafu kwef odochia-wñ dufu.

⁸ Kʼi fʼamo̩mo̩gba Ijipti gwoda le̩, tʼe-one̩ tʼe-e̩la abe̩re̩me̩le̩;

⁹ kʼi la fʼujiwe kpai uno̩ kpuche̩rʼalumeji-we̩, O Ijipti, abʼiFero kpai amadu-wñ oji ma chaka;

¹⁰ kʼi kʼabo uche̩ichi ki nana gwoda, kʼi la fʼamonu ku ma chʼamagbiti kpa,

¹¹ Siho̩n onu abo Amo̩r, kpai O̩g onu Beshan, kpai ojane̩ ojane̩ Kenan chaka,

¹² kʼi la mʼane̩-ma ko chʼe̩wñ ogu, e̩wñ ogu kʼIsrae̩l abo-wñ aje̩.

¹³ Odu-we̩, O Jihofa, chʼogbegbele̩, urewa-we̩, O Jihofa, tʼo̩gba o̩gba du.

¹⁴ Todu Jihofa adale ñw abo-wñ, i la anyʼo̩la-wñ e̩do̩ ugbo amadu-wñ.

¹⁵ Ode abo uche̩ichi chʼajifa kpai o̩jamalia, uko̩lo̩ kʼo̩wo̩ one̩ che̩.

¹⁶ I nʼalu, i muda ko̩la n, i nʼeju, i la gane̩ n,

¹⁷ i che̩nʼeti, i muda gbo̩la n, iñmi du la dʼef alu-wñ n.

¹⁸ Abo du ku ma chʼo̩na-wñ adab owñ; kpʼabo du ku ma ke̩do̩nʼo.

¹⁹ O abo unyi Israe̩l, me̩ ki kele Jihofa! O abo unyi Aro̩n, me̩ ki kele Jihofa!

²⁰ O abo unyi Lifai, me̩ ki kele Jihofa! ame̩ ku me̩ railo Jihofa, me̩ ki kele Jihofa!

²¹ Jihofa ki nele kwefu Zayo̩n, owñ kʼi gugu Je̩rusale̩ra le̩! Me̩ je̩nyu Jihofa!