Eli Eko̩ DʼO̩jo̩ 116 - O̩TAKADA O̩LA O̩JO̩ 1970

E̩ne̩ kʼO̩jo̩ jadu-wñ agwʼo̩ ugwa

¹ Nafe̩do̩ Jihofa, todabu kʼi gbo̩ omu-mi kpai o̩ko̩ kʼu gbabʼo̩.

² Todabu kʼi hi eti-wñ wane̩ ñw mi, todule̩ nakwadʼo̩ gbogbo mʼo̩jo̩ uku-mi.

³ Iku uku wenyʼumi o̩la; iwo̩ o̩jegu la gwonyʼumi; u fʼo̩pe̩cha kpai e̩do̩dudu li.

⁴ Tak u kwokwado̩ odu Jihofa: O Jihofa, narodubʼe̩, je̩ ñwʼonugo-mi mufu tane̩!

⁵ Jihofa ali one̩ eju i chʼe̩no̩kpakpa; ochochi, O̩jo̩-wa alʼejumomi one̩.

⁶ Jihofa adejute̩ ame̩nemo̩; ma fʼumi hi wane̩, oñ i fʼumi jadu.

⁷ Mudabi, tef uñmi-we̩, O onugo-mi; todu Jihofa mʼo̩wo̩ chi ñw e̩ me̩.

⁸ Todu uwe̩ mʼonugo-mi gba bʼuku te̩ me̩, kpʼeju-mi bʼomi aku te̩, kpʼe̩re̩-mi bʼewane̩ te̩;

⁹ Nalule̩ eju Jihofa oj ane̩ abo ki deju.

¹⁰ Omi dʼo̩ rʼochochi, todule̩ oñ u ko̩la, ma fʼumi chʼukata tabale;

¹¹ u ka ef unaju-mi kakini, E̩ne̩ du chʼe̩nolemi.

¹² E̩wñ nadu ñw Jihofa tod e̩wñ du kʼi che ñw mi taa?

¹³ Nadʼago ujadu, oñ nakwado̩ odu Jihofa;

¹⁴ oji kʼu da nara ñw Jihofa owñ chʼeju abo-wñ chaka.

¹⁵ Uku abo-wñ ku ma kpe̩do̩rʼowñ chʼe̩wñ akoko eju Jihofa.

¹⁶ O Jihofa, omi chʼadu-we̩; omi chʼadu-we̩, o̩ma adu-we̩ onobule̩ le̩. Uwe̩ mʼigbaligba-mi tu me̩.

¹⁷ Nache iche̩bo̩ ugwa ñw e̩ oñ nakwado̩ odu Jihofa.

¹⁸ Oji kʼu da nara ñw Jihofa owñ chʼeju abo-wñ chaka,

¹⁹ ef ologbo unyi Jihofa, alumeji-we̩, O Je̩rusale̩m. Me̩ je̩nyu Jihofa!