Eli Eko̩ DʼO̩jo̩ 115 - O̩TAKADA O̩LA O̩JO̩ 1970

O̩jo̩ ki nʼojima, kʼi chʼode n

¹ I chʼawa n, O Jihofa, i chʼawa n, chai odu e-we̩, e̩ dʼojima ñw u, todu ufe̩de̩nyo̩-we̩ kpai ochochi-we̩!

² E̩wñ chi kʼabo uche̩ichi abo uche̩ichi aka kakini, Ugbo O̩jo̩-ma de̩?

³ O̩jo̩-wa dʼefojale efojale; i fʼe̩wñ du ki rʼowñ eju che me̩.

⁴ Ode-ma chʼajifa kpai o̩jamalia, uko̩lo̩ kʼone̩ nʼo̩wo̩-wñ che de̩.

⁵ I nʼalu, i muda ko̩la n; i nʼeju, i la gane̩ n.

⁶ I nʼeti, i la gbʼo̩la n; i nʼiñmo̩, i muda gbʼulu n.

⁷ I nʼo̩wo̩, i la dʼu che e̩wñ n; i nʼe̩re̩, i la lule̩ n; i la nʼenʼuko̩la du ki adufu lef o̩fa-wñ n.

⁸ Abo du ku ma chʼo̩na-wñ adab owñ; kpʼabo du ku ma ke̩do̩nʼo.

⁹ O Israe̩l, e̩ nake̩do̩no Jihofa! Owñ chʼate̩ko-ma kpai ugbe̩yo̩-ma.

¹⁰ Abo unyi Aro̩n, me̩ nake̩do̩no Jihofa! Owñ chʼate̩ko-ma kpai ugbe̩yo̩-ma.

¹¹ Ame̩ ku me̩ railo Jihofa, me̩ nake̩ do̩no Jihofa! Owñ chʼate̩ko-ma kpai ugbe̩yo̩-ma.

¹² Jihofa te̩tadibete̩ wa; i ade̩nyo̩ ñw a; i ade̩nyo̩ ñw abo unyi Israe̩l; i ade̩nyo̩ ñw abo unyi Aro̩n;

¹³ i ade̩nyo̩ ñw abo ku ma railo Jihofa, tʼabo ki nya, tʼabo ki nana.

¹⁴ Jihofa ki dʼu manyʼu ñw me̩ alo waa, tʼame̩ tʼamo̩ma-me̩!

¹⁵ Jihofa mʼe̩nyo̩ du ñw me̩ me̩, owñ kʼi che efojale kpai ane̩-ile̩-i le̩!

¹⁶ Efojale efojale chʼefojale e-Jihofa, i muda dʼane̩ ile̩ ñw amo̩ma amone̩.

¹⁷ Abo ki ku aje̩nyu Jihofa n, tʼabo du ku ma gwo̩ru tef echi.

¹⁸ Awa muda akele Jihofa akwʼe̩gba-i tʼogbegbele̩. Me̩ je̩nyu Jihofa!