Ekaluka 2 - O̩TAKADA O̩LA O̩JO̩ 1970

Alu kʼabo o̩lo̩pu o̩lo̩pu le̩ aro̩nʼo̩la-ma ef uru kpai ej o̩na ule̩-ma

¹ Taku Jihofa ka ñwu Mose̩s kpai Aro̩n kakini,

² E̩ne̩ne̩ne̩ne̩ abo Israe̩l du afa unyabo-wñ ugbo agaliga e-wñ, kpenyʼe̩wñ ujiwe abunyi amata-ma; ama afa unyabo-ma jo̩ akpejurʼunyabo ujeju alʼo daka.

³ Oñ abo ku ma ru o̩wo̩ olodudu, o̩wo̩ ugbo kʼolu akwane̩ le̩, achʼabo agaliga uru e-Juda, udala udala-ma; idachi amo̩ma Juda che Nashon o̩ma Aminadab le̩,

⁴ oñ abudala-wñ, owñ chʼabo ku ma kaluka efu-ma, chʼone̩ icham nyʼo̩gwo̩ko̩ ugbo e̩te̩gwa nyoke me̩le̩ nyʼone̩ ulo̩gwa.

⁵ Oñ abo ku ma ru jo̩ aro̩ne-wñ chʼabo o̩lo̩pu Isakar, idachi amo̩ma Isakar la che Netane̩l o̩ma Zuar,

⁶ oñ abudala-wñ, abo ku ma la kaluka efu-ma, chʼone̩ icham nyʼo̩gwo̩ko̩ ugbo ooje nyoke me̩le̩ nyʼone̩ ulo̩ko̩.

⁷ O̩lo̩pu Ze̩biulo̩n, idachi amo̩ma Ze̩biulo̩n la che Eliab o̩ma Me̩lon,

⁸ oñ abudala-wñ, abo ku ma kaluka efu-ma, chʼone̩ icham nyʼo̩gwo̩ko ugbo ooje nyʼoke mebie nyʼone̩ ulo̩ko̩.

⁹ Aluka one̩ ku ma kaluka udala udala ef uru Juda chʼicham nyʼo̩gwo̩ko̩ ugbo o̩gbo̩ me̩la nyoke me̩fa nyʼone̩ ulo̩ko̩. Ama le̩ akwane̩ ule̩ ejodudu.

¹⁰ O̩wo̩ o̩pata o̩gane̩ oñ agaliga uru Rube̩n ade̩, udala udala-ma; idachi amo̩ma Rube̩n la chʼE̩lize̩r o̩ma Shedeur

¹¹ oñ abudala-wñ, abo ku ma kaluka efu-ma, chʼone̩ icham nyʼo̩gwo̩ko̩ ugbo o̩gbo̩ meji nyoke me̩fa nyʼone̩ oli me̩gwa.

¹² Oñ abo ku ma aru jo̩ aro̩ne-wñ, achʼabo o̩lo̩pu Simeo̩n, idachi amo̩ma Simeo̩n che Shelumie̩l o̩ma Zurishadai,

¹³ oñ abudala-wñ, abo ku ma kaluka efu-ma, chʼone̩ icham nyʼo̩gwo̩ko̩ ugbo ooje nyoke me̩la nyʼone̩ oli me̩fa.

¹⁴ Tak i chʼo̩lo̩pu Gad, idachi amo̩ma Gad che Eliasaf o̩ma Reue̩l,

¹⁵ oñ abudala-wñ abo ku ma kaluka efu-ma, chʼone̩ icham nyʼo̩gwo̩ko̩ ugbo o̩gbo̩ meji nyoke me̩lu nyʼone̩ oli me̩gwe̩ta.

¹⁶ Aluka one̩ du ku ma kaluka ef uru Rube̩n, udala udala-ma, chʼicham nyʼo̩gwo̩ko̩ ugbo oli me̩ta nyokeʼka nyʼone̩ oli me̩la. Oñ abo-i chʼuche̩ ekeji ku ma akwane̩ ule̩.

¹⁷ E̩gbale̩ tak unyabo ujeju akwane̩ ule̩, manyʼabo uru abo Lifai alumeji uru uru le̩; alu ku ma ru jo̩ le̩, alu le̩ ma akwane̩ ule̩, e̩ne̩ne̩ne̩ne̩ adʼuña-wñ, ugbo agaliga e-wñ.

¹⁸ Agaliga uru abo Ifraim udala udala adʼo̩wo̩ olane̩, idachi amo̩ma Ifraim la chʼElishama o̩ma Amihud.

¹⁹ Oñ abudala-wñ, abo ku ma kaluka efu-ma, chʼone̩ icham nyʼo̩gwo̩ko̩ ugbo o̩gbo̩ meji nyʼone̩ oli me̩gwa.

²⁰ Abo o̩lo̩pu Manasa aro̩ne owñ, idachi abo Manasa la che Gamelie̩l o̩ma Pedazur,

²¹ oñ abudala-wñ, abo ku ma kaluka efu-ma, chʼone̩ icham nyʼo̩gwo̩ko̩ ugbo ogue̩gwa nyoke meji nyʼone̩ o̩gwo̩ko̩.

²² Tak i chʼo̩lo̩pu Be̩njamin, oñ idachi abo Be̩njamin la chʼAbidan o̩ma Gideoni,

²³ abudala-wñ, abo ku ma kaluka efu-ma, chʼone̩ icham nyʼo̩gwo̩ko̩ ugbo ogue̩gwa nyoke me̩lu nyʼone̩ ulo̩ko̩.

²⁴ Aluka one̩ du ku ma kaluka ef uru Ifraim udala udala chʼicham nyʼo̩gwo̩ko̩ ugbo ogume̩lu nyoke me̩jo̩ nyʼone̩ ogume̩lu. Abo-i la chʼuche̩ e̩ke̩ta ku ma akwane̩ ule̩.

²⁵ Agaliga uru abo Dan udala udala adʼo̩wo̩ o̩pata ate̩, idachi abo Dan la chʼAhie̩ze̩r o̩ma Amiahadai,

²⁶ oñ abudala-wñ, abo ku ma kaluka efu-ma, chʼone̩ icham nyʼo̩gwo̩ko̩ ugbo o̩gbo̩ me̩ta nyoke meji nyʼone̩ oli me̩gwe̩le̩.

²⁷ Tak abo ku ma aru jo̩ aro̩ne-wñ achʼabo o̩lo̩pu Ashe̩r, idachi abo Ashe̩r la che Pagie̩l o̩ma Okran,

²⁸ oñ abudala-wñ, abo ku ma kaluka efu-ma, chʼone̩ icham nyʼo̩gwo̩ko̩ ugbo o̩gbo̩ meji nyokeʼka nyʼone̩ oli me̩gwa.

²⁹ Tak i chʼabo o̩lo̩pu Naftali, idachi abo Naftali la chʼAhira o̩ma Enan,

³⁰ oñ abudala-wñ, abo ku ma kaluka efu-ma, chʼone̩ icham nyʼo̩gwo̩ko̩ ugbo ooje nyoke me̩ta nyʼone̩ ulo̩ko̩.

³¹ Aluka amone̩ ku ma kaluka ef uru Dan chʼone̩ icham nyʼo̩gwo̩ko̩ ugbo oli me̩ta nyoke mebie nyʼone̩ ulo̩gwa. Abo-i akwane̩ ubi otitala atʼagaliga agaliga-ma ubi.

³² Abo-i chʼabo Israe̩l ku ma kaluka ikpo unyi ikpo unyi amata-ma; aluka one̩ ku ma kaluka udala udala ef uru uru-ma chʼone̩ icham nyʼo̩gwo̩ko̩ ugbo ulo̩gwa nyoke me̩ta nyʼone̩ oli me̩gwaka.

³³ Ma muda kʼabo Lifai aluka tʼef abo Israe̩l in, alu ku Jihofa ñwa ñwu Mose̩s le̩.

³⁴ Abe̩le̩ amo̩ma Israe̩l che. Alu du ku Jihofa ñwa ñwu Mose̩s, alu le̩ ma rujo̩ rujo̩, ugbo agaliga-ma, alu le̩ ma kwane̩ ule̩-ma, e̩ne̩ne̩ne̩ne̩ dʼef abo akwo̩ra unyi-wñ, alu kʼikpo unyi ata-wñ de̩.