Danie̩l 3 - O̩TAKADA O̩LA O̩JO̩ 1970

Onu fʼojibo o̩jamalia che kʼamone̩ ki dojikane̩ ñw u

¹ Ne̩biukadne̩za, onu le̩, nʼoo̩amalia chʼojibo, o̩gba-wñ chʼohibo̩wo̩ o̩gbo̩ me̩ta, unabe̩-wñ la chʼohibo̩wo̩ me̩fa: i la mʼu du dago egbili Dura, ojane̩ Babilo̩n.

² Taku Ne̩biukadne̩za onu le̩, fʼuche̩ kpe̩ ado̩ amakomu onu kpʼamakoji onu kpʼamigo̩bina kpʼamedibo kpʼamadigede, kpʼabohiala, kpʼamamoli o̩lo̩da, kpai abo̩da ojane̩ ojane̩ du kʼama ki wa go edunyane̩ kʼama adʼojibo ki Ne̩biukadne̩za onu le̩ du dago, nyane̩.

Abo Danie̩l ko̩ edojikane̩ ñw ojibo le̩

³ Tak amakomu onu kpʼamakoji onu kpʼamigo̩bina kpʼamedibo kpʼamadigede kpʼabo̩hiala kpʼamamoli o̩lo̩da kpʼabo ku ma nʼo̩da ojane̩ ojane̩ du jeju wʼugbo ku ma adʼojibo ki Ne̩biukadne̩za onu le̩ du dago nyane̩. Oñ ma kwodago jʼo̩gba ojibo ku Ne̩biukadne̩za du dago le̩.

⁴ Taku ma fʼakoya ta kakini, Ame̩ ma ka-i, O amone̩, abo uche̩ichi uche̩ichi kpʼamakichi ojoji ojoji,

⁵ ma kakini, Iko kʼame̩ gbo̩ uko̩la bijila kpʼo̩kpana kpʼumolo kpʼokugulu kpʼugwoje kpʼalije̩ta ku ma nʼobutu fa, kpʼe̩wñ iya ojoji chaka, ame̩ ki lewane̩ adojikane̩ ñw ojibo o̩jamalia ki Ne̩biukadne̩za onu du dago-i.

⁶ E̩ne̩ ki ma lewane̩ adojikane̩ n, ma adʼu rikpolo tʼalumeji una ki ajo̩ ef aido iko le̩ gbage̩de̩.

⁷ Todule̩, iko le̩, e̩gba kʼamone̩ chaka gbo̩ uko̩la bijila kpʼo̩kpana kpʼumolo kpʼokugulu kpʼugwoje kpʼe̩wñ iya ojoji du, amone̩ uche̩uche̩ kpai ichi ichi du lewane̩ adojikane̩ ñw ojibo o̩jamalia ki Ne̩biukadne̩za onu du dago o̩mo̩.

⁸ Tak iko le̩ abo Kaldia iche̩ka te̩wa agwʼajo̩ nʼamaju.

⁹ Ma kʼohi ñwu Ne̩biukadne̩za onu, kakini, O onu, oji-we̩ ki gbo kala kala.

¹⁰ O onu, uwe̩ dʼo̩da te̩ kakini, E̩ne̩ du ki agbʼuko̩la bijila kpʼo̩kpana kpʼumo̩lo kpʼokugulu kpʼugwoje kpʼalije̩ta kpʼe̩wñ iya ojoji du kʼi nawane̩ adojikane̩ ñw ojibo o̩jamalia le̩;

¹¹ oñ e̩ne̩ ki ma lewane̩ adojikane̩ ñw u n, ma adʼu rikpolo tʼalumeji una ki ajo ef adido.

¹² AmaJu iche̩ka do̩mo̩ kʼuwe̩ dʼo̩da e̩wñ ojane̩ Babilo̩n nyʼuma o̩wo̩: She̩drak, Mishe̩k kpai Abe̩d-nego; O onu, aboke̩le̩-i anyʼuwe̩ eti n: ma are̩ amo̩jo̩-we̩ n, ma la adojikane̩ ñw ojibo o̩jamalia kʼe̩ du dago le̩ n.

¹³ Tak ef uwe̩do̩-wñ kpʼe̩do̩fulu-wñ Ne̩biukadne̩za ka ñwu ma ku ma ko Shedrak kpai Mishe̩k kpai Abe̩d-nego wa. Oñ ma mʼabo le̩ ko wa o̩gba onu.

¹⁴ Ne̩biukadne̩za tʼuma ene kakini, O Shedrak kpai Mishe̩k kpai Abe̩d-nego, ame̩ gwejugede ko̩ ere̩ o̩jo̩-mi? kpai e̩dojikane̩ ñw ojibo o̩jamalia kʼu du dago le̩?

¹⁵ I la che̩wñ kʼo̩la-me̩ chʼe̩mu dede iko ku me̩ gbʼuko̩la bijila kpʼo̩kpana kpʼumolo kpʼokugulu kpʼugwoje kpʼalije̩ta kpʼe̩wñ iya ojoji du, ku me̩ lewane̩ adojikane̩ ñw ojibo kʼu che le̩, mak i nyo̩; me̩ ma muda dojikane̩ n, iko le̩ gbage̩de̩ ma ako me̩ rikpolo tʼalumeji una ki ajo ef adido; e̩ne̩ chʼO̩jo̩ kʼi agba me̩ bʼef o̩wo̩-mi te̩?

¹⁶ Shedrak kpai Mishe̩k kpai Abe̩d-nego dohi, oñ ma ka ñw onu kakini, O Ne̩biukadne̩za, eku edohi ñw e̩ ef o̩la-i ku uwa n.

¹⁷ I dʼabe̩le̩ ochochi, mak O̩jo̩-wa kʼa are̩ neke gba wa kwef una ki ajo ef adido le̩; i la agba wa kwʼef o̩wo̩-we̩, O onu.

¹⁸ I ma dʼabe̩le̩ n, uwe̩ ki ma, O onu, ka kʼawa are̩ amo̩jo̩-we̩ n, a la adojikane̩ ñw ojibo o̩jamalia kʼe̩ du dago le̩ n.

Onu je̩ ñwu ma kʼabo me̩ta le̩ jʼef una

¹⁹ Taku Ne̩biukadne̩za ke̩do̩fulu ololo, oñ alu kʼeju-wñ de̩ ugbo Shedrak kpai Mishe̩k kpai Abe̩d-nego rida; i la fʼo̩la ka, i ñwa ñwu ma ku ma kʼuna nyʼadido̩ ki kpa tʼalu ki te̩takpa le̩ onu mebie.

²⁰ Tak i ñwañw amagbiti iche̩ka ku ma jʼef abogu-wñ, kʼama ki fu Shedrak kpai Mishe̩k kpai Abe̩d-nego̩ ji, ku ma ko ma rikpolo tef una ki ajo ef adido le̩.

²¹ Taku ma fʼabo le̩ ji kpai afe̩-ma kpʼichaka-ma kpʼalawoni-ma kpʼe̩wñ o̩la-ma du, oñ ma mʼu ma ko rikpolo nyʼalumeji una ki ajo ef adido le̩.

²² Todabu kʼo̩la kʼonu ñwañwu ma chʼunaju unaju, kʼadido le̩ la kpa tabale, o̩go̩ una-wñ fʼabo ku ma ko Shedrak kpai Mishe̩k kpai Abe̩d-nego kpa.

²³ Oñ abo me̩ta le̩, owñ che Shedrak kpai Mishe̩k kpai Abe̩d-nego lewane̩ alumeji una ki ajo ef adido le̩, e̩wñ ku ma ne̩ ji ma dʼo̩la-ma ta.

Una chʼuma abu du n

²⁴ Tak awuwu fu Ne̩biukadne̩za onu le̩ mu, oñ i hika kwane̩; i la ko̩la ñw abohiala-wñ kakini, I chʼe̩ji one̩ me̩ta oñ awa ko rikpolo nyʼalumeji una-i n? Ma dohi ñw onu kakini, Ochochi, O onu.

²⁵ I dohi kakini, Go, u che li aboke̩le̩ me̩le̩ abu ku ma kwotane̩ ku ma tale alumeji una, e̩wñ du la che ma n; eju e̩ne̩ e̩ke̩le̩-ma la dab o̩ma amo̩jo̩ abe̩i.

²⁶ Taku Ne̩biukadne̩za te̩ me̩rʼalu adido kʼuna ajo ef uwñ le̩; i ko̩la, kakini, Shedrak kpai Mishe̩k kpai Abe̩d-nego, ame̩, amadu O̩jo̩ Chamachala, me̩ dufu wa ku me̩ wʼemi. Taku Shedrak kpai Mishe̩k kpai Abe̩d-nego kwʼalumeji una le̩ dufu wa.

²⁷ Oñ abu kʼamakomomi kpʼamakoji onu kpʼamigo̩bina kpʼabo̩hiala onu jʼugbo kate o̩mo̩, ma fʼabo-i li kʼuna ma nʼukpahiu du año̩la-ma n, kʼiloji oji-ma la jo n, i la chʼafe̩-ma abu du n, e̩ la gbʼulu una o̩la-ma n.

²⁸ Ne̩biukadne̩za ko̩la, i kakini, O̩jo̩ Shedrak kpai Mishe̩k kpai Abe̩d-nego kʼi nele owñ fʼonuche̩-wñ kpe̩ wa agba amadu-wñ ku ma dachi nʼowñ ku ma la fʼo̩la onu rida, Ma la dʼoj o̩la-ma tinyo̩ kʼama ki we ere̩ ku ma la we edojikane̩ ñw amo̩jo̩ du tʼO̩jo̩ e-ma le.

²⁹ Todule̩ nadʼo̩da te̩-i kakini, Amone̩ kpʼuche̩ichi du kpʼaluichi du ki ako̩la akpʼO̩jo̩ Shedrak kpai Mishe̩k kpʼAbe̩d-nego bie̩, ma akʼo̩ da ye̩ge̩ ye̩ge̩, ma la ako unyi unyi-ma che ojeita; todu O̩jo̩ omune̩ du kʼi aneke gbʼone̩ dab owñ do̩mo̩ ge̩ n.

³⁰ Tak onu ko Shedrak kpai Mishe̩k kpʼAbe̩d-nego nyo̩gba ef uko̩lo̩ ojane̩ Babilo̩n.