Danie̩l 2 - O̩TAKADA O̩LA O̩JO̩ 1970

Amachifamu neke kʼoji o̩na ñw onu n

¹ Oñ o̩do̩ ekeji ku Ne̩biukadne̩za jʼonu, Ne̩biukadne̩za fʼo̩na na ana ño̩ na; e̩do̩-wñ la nyo̩ n, eju-wñ la gbe̩.

² Tak onu ñwañwu ma ku ma do̩ amachifamu kpai amade̩bo̩ kpai amagomi kpai abo Kaldia wa ku ma kʼoji o̩na-wñ ñw onu. Abe̩le̩ ma lewa dago jʼo̩gba onu.

³ Tak onu ka ñwu ma kakini, U fʼo̩na na, oñ e̩do̩-mi ache mi akanya kʼu ma oji o̩na le̩.

⁴ Tak abo Kaldia ka ñw onu ichi abo Siria, kakini, O Onu, oji-we̩ ki gbo kala kala; e̩ ka ñw amadu-we̩ alu kʼe̩ nʼo̩na le̩ tak a akʼofe-wñ ñw e̩.

⁵ Tak onu dohi, oñ i ka ñw abo Kaldia kakini, U fʼo̩la le̩ ñwate̩ me̩; ame̩ ma kʼo̩na le̩ kpʼofe-wñ ñwu mi n, ma akʼume̩ da ye̩ge̩ ye̩ge̩, oñ ma akʼunyi unyi-me̩ chʼojeita.

⁶ Me̩ muda mʼo̩na le̩ kpʼofe-wñ du dufu, me̩ agba e̩wñ ele kpai uloko kpai ojima nana o̩wo̩-mi; todule̩ me̩ ki kʼona le̩ kpʼofe̩-wñ ñwu mi.

⁷ Taku ma dohi onukeji kakini. Onu ki ka ñw amadu-wñ o̩na kʼi na le̩, tak a akʼofe-wñ.

⁸ Onu dohi kakini, U fʼofe-me̩ ma me̩, ame̩ tene kʼame̩ ki lʼiko de̩, todabu ku me̩ cheli ka kʼu fʼo̩la le̩ ñwate̩ me̩.

⁹ Ame̩ ma la kʼo̩na le̩ ñw omi n, o̩da ki do̩mo̩ ñwu me̩ chʼokate: todu o̩lemi kpʼo̩la e̩bie̩ne̩ oñ me̩ ñwo̩che jo̩ ku me̩ ka o̩gba-mi, gbogbo tak iko-i ki lale; todule̩ me̩ ki kʼo̩na le̩ ñwu mi, tak omi ama ka kʼame̩ neke kʼofe-wñ ñwu mi.

¹⁰ Oñ abo Kaldia le̩ mʼohi du o̩gba onu kakini, I nʼe̩ne̩ du ki dʼile̩ kʼi neke dʼo̩la onu le̩ dufu n, todu alu du kʼi chaka nana kpai alu du kʼukpahiu-wñ de̩, i nʼonu du abe̩k e̩ne̩ o̩da ki tene e̩wñ abe̩le̩ ugbo achifamu kpai ade̩bo̩ kpai Kaldia mama ta n.

¹¹ E̩wñ kʼonu tene-i chekpuna, i la nʼe̩ne̩ du ki neke dʼu dufu o̩gba onu-i n, chai amo̩jo̩ kʼama ma dodo kpenyʼo̩re̩la n.

¹² Tod e-le̩ e̩do̩ onu kpa, oñ i we̩do̩ tabale, tak i ñwañw abo-wñ ku ma fʼamanibe Babilo̩n du kpa rinyo̩.

¹³ Abe̩le̩ o̩da le̩ le dufu, ka kʼama ki fʼamanibe kpa; taku ma kwotejane̩ Danie̩l kpʼamekeji-wñ le̩ ku ma ko ma kpa.

O̩jo̩ je̩ ñwu Danie̩l ma oji o̩na kʼonu na

¹⁴ Taku Danie̩l dabi dohi ibe ibe ñw Erio̩k, kʼi chʼagboji abo ide onu kʼi dufu kʼi kpa amanibe Babilo̩n;

¹⁵ oñ i dohi ñw Eriok kʼi chʼagboji abʼonu le̩ kakini, E̩wñ chi kʼo̩da ki kwʼugbo onu chʼuna una abe̩i taa? Tak Eriok fʼofe-wñ ka ñwu Danie̩l.

¹⁶ Oñ Danie̩l nyʼejefu agbo̩ko̩bʼonu kʼi dʼiko ñw u kʼi dʼoji o̩na le̩ ka ñw onu.

¹⁷ Taku Danie̩l nyʼunyi-wñ, oñ i mʼu du ka ñwu Hananaya kpai Mishae̩l kpʼAzaraya, amekeji-wñ le̩,

¹⁸ kʼama ki bi O̩jo̩ e-efojale kʼi li ma ejumomi ugbo e̩wñ ki maja-i; todu ki Danie̩l kpai amakeji-wñ ki we elenyo̩ manyʼamanibe Babilo̩n ki bo̩.

¹⁹ Tak e̩wñ ki maja le̩ tejugede ñw Danie̩l ef ane̩ ego odu. Oñ Daniel kwokele O̩jo̩ e-efojale.

Daniel fʼele O̩jo̩ ka

²⁰ Daniel kakini: Odu O̩jo̩ ki nʼele tʼogbegbele̩ nyile̩wa, todu ibe kpai ukpahiu chʼe-wñ.

²¹ I arʼiko e̩wñ kpai ewo e̩wñ da; i ayo̩ amonu tane̩, i akʼamonu gugu; i adʼibe ñw amanibe, kpai e̩wñ ema ñw abo ku ma moji e̩wñ.

²² I adʼe̩wñ ki nʼefu kpai e̩wñ ki maja tejugede; i chema e̩wñ ki dʼef e̩chubi, ugane̩ la dodo ugbo-wñ.

²³ Nagwʼe̩, nakele we̩, uwe̩ O̩jo̩ e-amata-mi, kʼe̩ dʼibe kpai ukpahiu ñw mi, kʼe̩ laño̩ je̩ ñw mi ma e̩wñ kʼa bi we̩ le̩, todu uwe̩ je̩ ñw a ma o̩la onu le̩ me̩.

²⁴ Todule̩ Danie̩l nyʼejefu ugbo Erio̩k, e-kʼonu du dago kʼi fʼamanibe Babilo̩n kpa; oñ i nyʼakʼabe̩-i ñw u kakini, E̩ ki kpa amanibe Babilo̩n in; mʼumi du nyʼo̩gba onu, tak u nakʼofe o̩na le̩ ñw onu.

Daniel kʼo̩na kʼi na ñw onu

²⁵ Tak Eriok hika du Danie̩l wʼo̩gba onu o̩mo̩ piopio, oñ i fʼabe̩-i ka ñw u kakini, U fʼe̩ne̩ke̩le̩ʼka li kʼi dʼef abimo̩to̩ Juda ku ma mu wa le̩ kʼi aje̩ ñw onu ma ofe o̩na-wñ.

²⁶ Tak onu dohi ka ñwu Danie̩l, kʼodu-wñ ko̩ Be̩lte̩shaza, kakini, Uwe̩ neke je̩ ñwu mi ma o̩na kʼu li le̩ kpʼofe-wñ ge̩?

²⁷ Danie̩l mʼohi du eju onu o̩mo̩ kakini, E̩wñ umaja kʼonu ka le̩, tʼamanibe̩, tʼamade̩bo̩, tʼamachifamu, tʼamake̩ma neke kʼofe-wñ ñw onu n;

²⁸ O̩jo̩ʼka muda dʼefojale kʼi adʼe̩wñ ki maja tejugede. Owñ le̩ la aje̩ ñw onu Ne̩biukadne̩za ma e̩wñ ki ado̩mo̩ iko o̩jo̩ otitala. O̩na kʼe̩ na kpai ane̩ kʼe̩ go e̩gba kʼe̩ dʼoj ate̩-we̩ le̩, e̩wñ ki che de̩:

²⁹ I chʼuwe̩ O onu, ibe e̩wñ ki awache ejo̩gba wʼef uwe̩ oj ate̩-we̩ o̩mo̩, oñ e̩ne̩ ki adʼe̩wñ ki maja tejugede le̩ la je̩ ñw e̩ ma e̩wñ ki awache.

³⁰ I muda chʼe-mi e̩wñ ki maja le̩ tejugede ñwu mi tod ibeʼka kʼu ne̩ tʼabo ki bo̩ ku ma deju le n, chai todu kʼonu ki mʼofe-wñ kʼuwe̩ ki la ma ibe ki wʼef uwe̩ le̩.

³¹ O, uwe̩ onu, ojibo lileʼka e̩ li le̩, ojibo le̩ tabale, ufane̩-wñ chʼe̩gahi, oñ i dago o̩gba-we̩; i la abailo.

³² I chʼe-ojibo le̩, oji-wñ chʼo̩jamalia hiolo, agbe̩do̩-wñ kpʼo̩wo̩-wñ chʼajifa, efu-wñ kpai uta-wñ chʼebijekpa,

³³ akwʼuta-wñ meji wʼagbe̩re̩ ane̩-wñ ma chʼebije, e̩rane̩-wñ chʼebije kpai ike̩te̩ kpe̩gwa nyʼomune̩.

³⁴ E̩ kejurʼu gbogbo, taku ma fʼokuta da ki ma chʼo̩wo̩ one̩ che n, oñ i lewa nu e̩re̩ ojibo ki chʼebije kpai ike̩te̩ le̩, i la fʼu kpo̩fo̩ ye̩ge̩-ye̩ge̩.

³⁵ Tak ebije kpai ike̩te̩ kpai ebijekpa kpai ajifa kpai o̩jamalia mukpo̩fo̩ nyʼomune̩, oñ i dab igbogbo ugbo ku ma gwu o̩ka iko afu o̩we̩; afu le̩ la mʼu ko kwʼo̩mo̩ alo, ma ño̩ li uña tod uwñ ge̩ n. Tak okuta ki kpʼojibo le̩ fo̩ mud uwo lile, oñ i mʼile̩du gba nyʼo̩wo̩.

Danie̩l kʼofe-wñ ñw onu

³⁶ O̩na kʼe̩ na le̩ de̩. Awa akʼofe-wñ o̩gba onu-i:

³⁷ O onu, uwe̩ chʼonu amonu, e-kʼO̩jo̩ e-efojale mʼojane̩-wñ kpʼukpahiu-wñ kpʼugbiti-wñ kpʼojima-wñ ko ñw e̩;

³⁸ oñ ugbo du kʼamo̩ma one̩ dodo kpai ame̩la oko kpai ame̩we̩ ojale, i mʼu ko nyʼuwe̩ o̩wo̩ kʼe̩ nʼo̩da-ma chaka; uwe̩-i chʼoji e-o̩jamalia le̩.

³⁹ Ubi we̩ tak onu ojane̩ omune̩ ki nyarʼuwe̩ akwane̩; kpʼo̩da ojane̩ e̩ke̩ta ki chʼebijekpa, kʼabo le̩ anʼo̩da ane̩-ile̩ du.

⁴⁰ O̩da ojane̩ e̩ke̩le̩ la agbiti dab ebije, abu kʼebije akpʼe̩wñ fo̩ kʼi la afʼe̩wñ du du; oñ alu kʼebije akpʼe̩wñ-i du fo̩ mane̩, alu le̩ oñ e-i akpʼe̩wñ fo̩ kʼi fʼu te̩mane̩.

⁴¹ Oñ abu kʼe̩ li kʼe̩re̩-wñ kpai o̩me̩re̩-wñ ugboʼka-wñ chʼama kʼugboʼka-wñ la chʼebije, ojane̩-wñ akpe̩ru abe̩le̩; ukpahiu ebije muda adʼef uwñ alu kʼe̩ li ka kʼebije kpʼe̩pio̩ le̩ chʼe̩kpe̩gwa nyʼomune̩.

⁴² Oñ alu kʼo̩me̩re̩-wñ ugbo ʼka chʼebije kʼugboʼka-wñ chʼike̩te̩, alu le̩ oñ ojane̩ le̩ anʼugbo ki gbiti, i la anʼugbo ki ma gbegbe dako dako n.

⁴³ Oñ alu kʼe̩ li ka kʼebije le̩ chʼe̩kpe̩gwa nyʼe̩pio̩, amone̩ le̩ akpe̩gwa nyʼugbe̩ one̩ ofo; ma muda amanyu o̩la-ma n, alu kʼebije ma dama nyʼike̩te̩ n.

⁴⁴ Tak iko amonu e-le̩ O̩jo̩ e-efojale adʼojane̩ dago ki ma lañʼakpabie̩ ogbegbele̩ n. Ma la atʼo̩da o̩fe̩-wñ no tane̩ ñw abo omune̩ n; owñ le̩ muda akpʼojane̩-i du fo̩ kʼi fʼu lie̩, owñ onugo la adago ogbegbele̩.

⁴⁵ Abu kʼe̩ li ka ku ma fʼokuta da kwʼibe̩ uwo le̩, ki ma chʼo̩wo̩ one̩ che n, ki la fʼebije kpʼebi-jekpa kpʼama kpʼajifa kpʼo̩jamalia le̩ kpo̩fo̩ rinyo̩, mak O̩jo̩ Inaina je̩ ñw onu ma e̩wñ ki awache ejo̩gba: alu kʼo̩na le̩ de̩ achi n, oji-wñ ogbolo la de̩.

Onu mu Danie̩l du chʼe̩ne̩ lile

⁴⁶ Tak onu Ne̩biukadne̩za fʼeju bʼane̩ ma, oñ i dojikane̩ ñwu Danie̩l, i la ñwañw abo-wñ ku ma kʼe̩wñ ele kpai e̩wñ ki akpo wa achʼo.

⁴⁷ Onu dohi ñwu Danie̩l, oñ i kakini, Ochochi, O̩jo̩-we̩ chʼO̩jo̩ e-amo̩jo̩, kpai Ondu amonu. E̩ne̩ ki la akʼe̩wñ ki maja tejugede i che, abu kʼe̩ neke dʼe̩wñ ki maja-i tejugede.

⁴⁸ Tak onu mu Danie̩l du chʼe̩ne̩ lile, oñ i kʼe̩wñ lile wewe chʼe ele, i la je̩ ñw u nʼo̩da ojane̩ Babilo̩n chaka, oñ i dʼowñ chʼuto̩gba amakoji onu kʼi nʼo̩da amanibe Babilo̩n du.

Danie̩l rewa abo-wñ me̩ta le̩

⁴⁹ Taku Danie̩l bi onu ebi-wñ oñ i ko e̩wñ ojane̩ Babilo̩n nyu Shedrak kpai Mishe̩k kpai Abe̩d-nego o̩wo̩; Danie̩l muda dʼanuku onu.