Akwodufu 11 - O̩TAKADA O̩LA O̩JO̩ 1970

O̩jo̩ ka kʼamo̩mo̩gba aku

¹ Taku Jihofa ka ñwu Mose̩s kakini, I bo̩ atulubo̩ okate kʼu nadu wa abʼi Fero kpai Ijipti oji ma ta; ubi e-le̩ tak i aje̩ ñwu me̩ kwʼemi alo: e̩gba kʼi aje̩ ñwu me̩ lo le̩ ene i ane me̩ kwʼemi hioko.

² Ifai tak e̩ ko̩la ki tʼamone̩-i eti, ka kʼe̩ne̩ke̩le̩ du, kpai onobule̩ du, ki bi e̩wñ eku ajifa kpai e̩wñ eku o̩jamalia ugbo ekeji-wñ.

³ Oñ Jihofa je̩ ñw abo Ijipti li amone̩ le̩ eju. Anoji e-le̩ ge̩ Mose̩s chʼe̩ne̩ lile oj ane̩ Ijipti le̩ eju abuko̩lo̩ Fero kpai eju amone̩ oj ane̩ Ijipti.

⁴ Taku Mose̩s kakini, Abu ku Jihofa aka de̩ kakini, Ame̩ru iñaliña odu nadufu tʼalumeji Ijipti;

⁵ tak amo̩mo̩gba du oj ane̩ Ijipti aku, akwʼo̩mo̩gba Fero kʼi gugu oj e̩de̩-wñ le̩ gbogbo wa o̩mo̩gba adu onobule̩ kʼi dʼo̩dokuta; kpai o̩mo̩gba ame̩la abe̩re̩me̩le̩ du.

⁶ Tak o̩li lile achi ugbo du oj ane̩ Ijipti, e-kʼe̩go̩-wñ ma de̩ mama ta n, i ñʼade̩ ej o̩gba ge̩ n.

⁷ I muda che e-abo Israe̩l du, tʼone̩, tʼe̩la abe̩re̩me̩le̩, abia du ako̩ ru ma n; todu kʼame̩ ki ma ka kʼabo Ijipti kpai abo Israe̩l chʼojoji eju Jihofa.

⁸ Tak abo ku ma chʼamadu-we̩-i du agwo̩ru wʼugbo mi, ku ma dojikane̩ ñwu mi; ma akakini, E̩ kwʼemi alo, uwe̩ kpai amone̩ du ku ma tʼuwe̩ ubi. Ubi le̩ tak u nadufu alo. Tak i we̩do̩ kwʼo̩gba Fero dufu.

⁹ Taku Jihofa ka ñwu Mose̩s kakini, Fero anyʼuwe̩ eti n; todu kʼe̩wñ uno̩-mi ki wewe nyo̩gba oj ane̩ Ijipti.

¹⁰ Abe̩le̩ Mose̩s kpai Aro̩n fʼe̩wñ uno̩-i chaka che eju Fero; oñ Jihofa che e̩do̩ Fero ki gbiti, i la tʼabo Israe̩l no̩ ku ma kwo bʼane̩-wñ te̩ n.