Aizaya 42 - O̩TAKADA O̩LA O̩JO̩ 1970

Adu Jihofa

¹ Go adu-mi, e-kʼu nagbʼo̩ ne̩ dago, e̩ne̩ kʼu chi kʼonugo-mi nʼuyo̩ ef uwñ le̩ de̩; omi dʼAfu-mi bʼo ma, i adʼajo̩ o̩kpakpa eka dufu ñw abo uche̩ichi.

² I akwa n i la achʼomu-wñ nyʼate̩ n, i aje̩ ñw ma gbʼomu-wñ ej o̩na n;

³ i agu elikpo ki mute̩muu che̩ n, i la akpʼowu agege ki akpʼodudu lu n; i adʼajo̩ o̩kpakpa eka dufu lʼo̩na ochochi.

⁴ Ejuduu achʼo n, e̩do̩-wñ akpabie̩ n gbogbo tak i mʼajo̩ o̩kpakpa eka du dago ane̩ ile̩; ala ala aneju uko̩-o̩la-wñ.

⁵ O̩jo̩, Jihofa, kʼi nyi efojale kʼi laño̩ fʼu nadala te̩, owñ ki fʼane̩ ile̩ kpʼe̩wñ ki akwʼef uwñ fa te̩, owñ ki adʼiñmi tʼamone̩ ku ma jʼoji-wñ efu, kpai afu ñw abo ku ma tule oji-wñ, kakini:

⁶ Omi Jihofa, fʼe̩ do̩ ef o̩kpakpa, nagwo̩nyʼuwe̩ o̩wo̩, nadejutʼe̩; oñ nadʼuwe̩ chʼalo amone̩, kʼe̩ chʼugane̩ abo uche̩ichi,

⁷ kʼe̩ chi eju amafeju, kʼe̩ kʼame̩namu kwef ura dufu, kpai abo ku ma gugu ef e̩chubi kwef ugbo ku ma da ma hi te̩.

⁸ Omi che Jihofa, abʼodu-mi ko̩ de̩; nadʼojima-mi ñw e̩ne̩ omune̩ n, u la adʼuñwulo̩-mi ñw ojibo ku ma gbe̩ n.

⁹ Me̩ go, e̩wñ o̩gbo̩gba le̩ lewa che me̩, e̩wñ etito̩ oñ nacholi jʼane̩-i; o̩gba tak i ta dufu naje̩ ñw me̩ gbʼinabali-wñ.

¹⁰ Me̩ ki kʼeli etito̩ ñw Jihofa, kpai uñwulo̩-wñ kwʼukpoji ane̩ ile̩! Owñ chʼame̩ ku me̩ gwo̩ru nyʼef ohimini abadi ale, kpai e̩wñ du ki jʼef uwñ, ala ala kpai abo ku ma dodo o̩mo̩.

¹¹ Aje̩tachi kpai ewo ewo-wñ ki nachʼomu-ma nyʼate̩, kpai adogbe adogbe ugbo ku Kedar dodo le̩; abo ku ma dodo Sela ki nakʼeli, ama ki jʼoj uwo uwo akpogu.

¹² Ama ki dʼojima ñw Jihofa, ku ma dʼuñwulo̩-wñ ka dufu ala ala.

¹³ Jihofa adufu dabe̩ne̩ kʼagbiti, Jihofa adʼo̩la-wñ e̩do̩ kwane̩ dab e̩ne̩ ki ajogu; i akwa, i-i, i akpogu taa, i tʼame̩nebi-wñ le̩ chaka.

¹⁴ Echi kʼu chi i me̩ ane̩-i ge̩ n, u te̩tachechi amʼo̩la-mi ne̩; fa-i nakwa dab onobule̩ ki achʼefu, iñmi-mi adajʼe̩do̩, e̩do̩-mi ache fa fa.

¹⁵ Nakpʼuwo kpʼotete fo̩ rinyo̩, naje̩ ñw e̩wñ emimi-wñ kwe̩ kwe̩ kwe̩ du ki gbe̩; tak u nache ohimini ohimini ki mud ala ala jo̩, oñ naje̩ ñw oduda omi-wñ du ki gbe̩ ge̩.

¹⁶ Omi la akʼamafeju wa lʼo̩na kʼama ma ma n, lʼikpa ikpa kʼama ma ma n oñ nane̩ ma le. Naje̩ ñw e̩chubi mud ugane̩ o̩gba-ma, oñ ugbo ki de̩ kpolo kpolo nache te̩e̩le̩. E̩wñ-i nache, u la ahiʼuma tinyo̩ n.

¹⁷ Ma arʼabo ku ma ke̩do̩nʼojibo ku ma gbe̩, kpai abo ku ma ka ñw ojibo ku ma da kakini, Ame̩ chʼamo̩jo̩-wa, da tʼubi, anyo̩ amu ma hioko.

¹⁸ Me̩ gbo̩ ke, ame̩ amajeti; me̩ la go, ame̩ amafeju, kʼame̩ ki li!

¹⁹ E̩ne̩ chʼafeju ki ma chʼadu-mi n? abe̩k ajeti alu kʼonuche̩-mi kʼu nakpʼo̩ uche̩ de̩? E̩ne̩ chʼafeju dab e̩ne̩ ki tʼo̩la no̩ ñw mi le̩? e̩ne̩ la chʼafeju alu kʼadu Jihofa de̩?

²⁰ Uwe̩ ali e̩wñ wewe, e̩ muda tejane̩-wñ n; eti-wñ mubi, i muda agbʼo̩la n.

²¹ I nyo̩ Jihofa eju tod o̩kpakpa-wñ, kʼi je̩ ñw uko̩-o̩la ki nana nyʼo̩gba ki ño̩ nʼojima.

²² Ama abo-i chʼamone̩ ku ma jʼuma oji ku ma dʼuma inya, ma fʼo̩chaka-ma mu jʼef ura ku ma gwa te̩ ñw ma ma la ko ma maja jʼef unyiuga; ma mud e̩wñ akpa jo̩ e̩ne̩ du agba ma n, ma mud e̩wñ aluje̩ e̩ne̩ du la kakini, Mʼu du dabi wa ñw ma n!

²³ E̩ne̩ dʼef ume̩ ki jʼanetirʼe̩wñ-i? kʼi jʼaneti kʼi agbo̩ tod ejo̩gba?

²⁴ E̩ne̩ du Jeko̩b te̩ ku ma ñʼo̩ ane̩? e̩ne̩ la dʼIsrae̩l te̩ ñw amadinya? I che Jihofa, e̩ne̩ kʼa dʼu re le̩ n? e-ki ma dʼuma e̩do̩ ku ma lule̩ o̩na o̩na-wñ n, ma la gbʼuko̩-o̩la-wñ gbo̩ n.

²⁵ Todule̩ oñ i dʼe̩kpuna e̩do̩fulu-wñ danyʼu oji kpai ogu ki akʼunyi kʼo̩na; i la fʼuna ko nyʼu o̩la daka, i muda ma n; i la gu owñ jo, i muda gba tʼe̩do̩ n.