Aizaya 24 - O̩TAKADA O̩LA O̩JO̩ 1970

Ma fʼajo̩ abile̩ du ka

¹ Go, Jihofa ache kʼane̩ ki chʼakpokpo te̩, i ache kʼi dʼalache̩, i ñʼarida bane̩ma, kʼi la fʼabo ku ma dodo oji-wñ fiatuka.

² Oñ alu kʼi ade̩ de̩, alu ki de̩ ugbo amone̩, alu le̩ i ñʼade̩ ugbo amatama ge̩; alu ki de̩ ugbo adu, alu le̩ i ade̩ ugbo odu-wñ; alu ki de̩ ugbo adu onobule̩, alu le̩ i ade̩ ugbo odu-wñ onobule̩; alu ki de̩ ugbo e̩ne̩ ki alʼe̩wñ, alu le̩ i ade̩ ugbo e̩ne̩ ki atʼe̩wñ; alu ki de̩ ugbo e̩ne̩ ku ma nʼo̩ o̩me̩, alu le̩ i ade̩ ugbo e̩ne̩ ki jʼo̩me̩; alu ki de̩ ugbo e̩ne̩ ki agbʼo̩ko̩ ugwo̩la, alu le̩ i ade̩ ugbo e̩ne̩ ki adʼo̩ko̩ ugwo̩la ñw u.

³ Ane̩-i ate̩ ofo hioko, i adʼalache̩ te̩ hiele; todu Jihofa fʼo̩la-i ka me̩.

⁴ Ane̩-i adaido̩, i la agbo rinyo̩, ile̩ agwe̩gbo, i ño̩ agbo rinyo̩ ge̩; ame̩ne̩lile ane̩-i agwe̩gbo me̩.

⁵ Ane̩-i ño̩ chʼe̩daji tʼofe abo ku ma dodo oji-wñ; todabu ku ma fʼada uko̩-o̩la-wñ je̩, ma la fʼo̩me̩ ku ma hi rida, ma laño̩ fʼalo e-o̩gbegbele̩ le̩ bie̩ me̩.

⁶ Todule̩ oñ ama ku ma na le̩ mʼane̩-i ko mi, oñ ma li ka kʼabo ku ma dodo oji-wñ fʼabi je̩; todule̩ ma fʼabo ku ma dodo ane̩-i gujo, one̩ la bo̩ ree.

⁷ Omi achiwebe̩te̩ma etito̩ adaido̩, ikeli-wñ agwe̩gbo, abʼe̩do̩ e̩bo̩ chaka jʼafifi.

⁸ Iya eicha awe me̩, ekuku abo ku ma yo̩ ada, uyo̩ umolo awe me̩.

⁹ Ma anʼomi achiwebe̩te̩ma añmo̩ akeli n; o̩te̩ una arikoko ñw abo ku ma ñmʼo̩.

¹⁰ Ewo ki chʼachigodo le̩ mugulo̩ me̩, o̩na unyi du re me̩, kʼe̩ne̩ du ki we egudu.

¹¹ Aku ero̩ jʼejo̩na-wñ tod omi achiwebe̩te̩ma; uyo̩ du kwodade, iya ane̩ le̩ du le me̩.

¹² Ewo le̩ chʼalache̩ te̩, alaku-wñ chʼe̩kpo̩fo̩ jʼane̩.

¹³ Todu ab i ade̩ alumeji ane̩-i ef amone̩ du, i adabe̩ne̩ ku ma du oli gwo o̩lif, dabe̩ne̩ kʼe̩fiye̩-wñ ki bo̩ e̩gba ku ma kʼe̩ro achiwebe̩te̩ma kpa.

¹⁴ Abo-i achʼomu-ma nyʼate̩, ma akeli uyo̩; ma jʼo̩lʼohimini achʼo̩ga noj e̩gahi Jihofa.

¹⁵ Todule̩, me̩ nadʼojima ñw Jihofa o̩wo̩ olodudu; owñ chʼodu Jihofa, O̩jo̩ Israe̩l le̩, oj ane̩ o̩lʼohimini.

¹⁶ A gbo̩ abu ku ma jʼukpoji ile̩ akʼeli dʼO̩jo̩ kakini, E̩no̩kpakpa ki nʼuto̩. U muda kakini, Egbo̩gbe̩ nagbo̩-gbe̩, egbo̩gbe̩ nagbo̩gbe̩. Atogwo chʼe-mi! Todu abo ku ma dʼo̩wo̩ lef ukpo arʼo̩kpo̩, fʼo̩kpo̩-ma ro̩ me̩, ochochi, abo ku ma dʼo̩wo̩ tef ukpo arʼo̩kpo, fʼo̩kpo̩-ma ro̩ bie̩ne̩ bie̩ne̩ me̩.

¹⁷ Ailo kpai o̩fe̩ kpai oku abʼuwe̩ ma me̩, uwe̩, kʼe̩ dodo ile̩-i!

¹⁸ Oñ i awatu kʼe̩ne̩ ki ara bʼekuku ailo le̩ te̩ añwa chʼef o̩fe̩; oñ e̩ne̩ ki mute̩gu kwʼef o̩fe̩ le̩ dufu oku amʼu; todu ope ki jʼatate̩ mubi me̩, e̩rane̩ ile̩-i naga.

¹⁹ Ile̩-i mukpo̩fo̩ kpa, ile̩-i mukpana jo̩, ma fʼile̩-i miejo bie̩ne̩ bie̩ne̩.

²⁰ Ile̩-i tʼaro̩ko̩ibu dab e̩ne̩ kʼo̩te̩ mu, i ami daa mi daa dab ala ku ma ne; echada-wñ la woji nʼo, i alo̩ wane̩, i ñʼakwane̩ ge̩ n.

²¹ I la awatu o̩jo̩ le̩, ku Jihofa abʼudu ñw o̩wo̩ abʼefojale ate̩, kpai amonu ile̩-i oj ane̩ ile̩-i.

²² Ma la akʼama wajo̩ alu ku ma kʼame̩namu wajʼef ura; ma la ada ma hi jʼef unyi uga, ma ajʼo̩jo̩ wewe taku ma awa fejudo ma.

²³ Tak eju ochu aku e̩bo̩no̩, oñ anyo̩ amu olu; todu Jihofa ki nʼe̩wñ du ajʼonu-wñ oj uwo Zayo̩n kpai efu Je̩rusale̩m ojima la ate̩ eju abogijo-wñ.