Aizaya 19 - O̩TAKADA O̩LA O̩JO̩ 1970

Udu ku ma bu ñw Ijipti

¹ O̩la Ijipti de̩. Go, Jihofa tanʼakpa ojale ki ahio̩wane̩, i la awʼIjipti me̩; o̩la ode ode Ijipti la aga tod eju-wñ ki dʼane̩, e̩do̩ Ijipti la amuyo̩ ef uwñ.

² Tak u nakʼo̩wo̩ nyʼabo Ijipti efu ku ma kobʼabo Ijipti, oñ e̩ne̩ne̩ne̩ne̩-ma akobʼo̩maye-wñ, e̩ne̩ du la akobʼekeji-wñ, ewo akobʼewo, ojane̩ akobʼojane̩,

³ une̩do̩ Ijipti la adafo alumeji-wñ; u ñʼakʼo̩la ku ma lo mi; taku ma atene ugbo ode ode, kpai ugbo amachifamu, kpai abo ku ma dʼiche̩kpa kpai amake̩ma.

⁴ Oñ nakʼabo Ijipti nyʼodu o̩lachi o̩wo̩; onu ki kpuna la anʼo̩da-ma, Ondu Jihofa ki nʼe̩wñ du ka-i.

⁵ Omi Naye̩l le̩ la aña, egbe ohimini-wñ agbe̩ rinyo̩;

⁶ tak aji aji-wñ alu; oñ omi omi Ijipti adabu kʼi agbe̩ rinyo̩; e̩che̩-wñ kpai igbafala-wñ akwacha rinyo̩.

⁷ Oko ije̩ o̩la Naye̩l ojugbogbo Naye̩l, kpai uche̩ du ku ma gbe̩ o̩la Naye̩l agbe̩, i alenyo̩ rʼile̩, i ñʼade̩ ge̩ n.

⁸ Amekwuji adinaku, abo du ku ma nʼuwo̩ ef ohimini Naye̩l la adaido̩; abo ku ma rʼiga ej omi-wñ adaule̩.

⁹ Anyo̩ la amʼabo ku ma chʼuko̩lo̩ owu line̩n eta, kpai abo ku ma hi ukpo fufu.

¹⁰ Ma la agu ugbogaga-wñ che̩ ye̩ge̩-ye̩ge̩, oñ e̩do̩ abo du ku ma chuko̩lo̩ ku ma rʼo̩me̩ ñw ma akpabie̩.

¹¹ Amagboji Zoan chʼame̩nidada ogbolo; ohi o̩la kʼabo ki nʼibe tʼuma le ef abo̩hiala Fero ate̩ dab ibe e̩la. Abile ku me̩ ka ñw Fero kakini, O̩ma anibe u che? O̩ma amonu ki je̩ igbelegbele u che?

¹² Mak ugbo amanibe-we̩ jo̩ ta? Je̩ ñw ma ka ñw e̩ fa-i ke kʼe̩ la je̩ ñw ma ma ibe ku Jihofa ki nʼe̩wñ du ñwa nyʼIjipti.

¹³ Amagboji Zoan mud ame̩nidada, ma la gbʼamagboji Me̩mfis ibe me̩; abo ku ma chʼokuta udane̩ o̩lo̩pu o̩lo̩pu-wñ je̩ ñw Ijipti chila.

¹⁴ Jihofa la fʼafu ochuchu danyʼalumeji-wñ; oñ ma je̩ ñw abo Ijipti la ugbo uko̩lo̩ du ku ma che dabalu kʼe̩ne̩ kʼo̩te̩ mu aro̩koibu kʼi tʼare̩ ale.

¹⁵ Uko̩lo̩ du la ade̩ tod Ijipti e-kʼoji abe̩k otihi abe̩k ima oli abe̩k echa ache n.

¹⁶ O̩jo̩ kʼa ka-i abo Ijipti adab abobule̩, o̩la-ma agagogodo, ma achokpo tod o̩wo̩ Jihofa ki nʼe̩wñ du ki amiejo, owñ chʼe-kʼi amiejo lʼuma oji le̩.

¹⁷ Tak ane̩ Juda amud e̩wñ ubailo ñw abo Ijipti; e̩ne̩ du ku ma hialu mʼe̩wñ Ijipti ugbo-wñ arailo, todu e̩wñ ki Jihofa ñwa, owñ chʼe-kʼi ñwa nyʼu.

¹⁸ O̩jo̩ le̩ ewo me̩lu ku ma kʼichi Kenan ajʼojane̩ Ijipti, ku ma ago̩ ñw Jihofa ki nʼe̩wñ du. Odu oka-wñ ako̩ Ewo Ulenyo̩.

¹⁹ O̩jo̩ kʼa ka-i ubo̩ iche̩bo̩ Jihofa adago alumeji ane̩ Ijipti, kpai e̩wñ ku ma gwanyidago waala ñw Jihofa alo̩me̩-wñ.

²⁰ I adago o̩mo̩ kʼi chʼujiwe kpʼe̩wñ ibenu ñw Jihofa ki nʼe̩wñ du ane̩ Ijipti; todu ama akwado̩ Jihofa noji abo ku ma te̩ ma mane̩, tak i adʼE̩najadu kpuche̩ rʼuma, kpai E̩nagbiti, tak owñ agba ma.

²¹ Taku Jihofa aje̩ ñw abo ijipti ki fʼowñ ma, oñ abo Ijipti la ama Jihofa o̩jo̩ kʼa ka-i; ochochi, ma anʼe̩wñ iche̩bo̩ kpai e̩wñ ele wa adojikane̩ ñw u, ma la adoji ñw Jihofa, taku ma ache.

²² Jihofa la agwo Ijipti, egwo i agwʼo, tak i akpʼagbe-wñ. Ma la adabi wa ñw Jihofa, oñ i anetirʼo̩ko̩ ku ma gbabʼo̩, tak i achʼo̩ga-ma kpa.

²³ O̩jo̩ kʼa ka-i ikpadala ate̩ akwʼ Ijipti nyi Asiria, oñ e̩ne̩ Asiria awʼIjipti, oñ e̩ne̩ Ijipti anyʼAsiria, tak abo ijipti kpai abo Asiria adojikane̩ ñw O̩jo̩ ugbokate.

²⁴ O̩jo̩ le̩ Israe̩l achʼe̩ne̩ke̩ta manyʼIjipti kpai Asiria, e̩nyo̩ ki kwʼugbo O̩jo̩ ki atʼalumeji ane̩-ile̩-i ma ache,

²⁵ todabu ki Jihofa ki nʼe̩wñ du de̩nyo̩ ñw ma kakini, E̩nyo̩ ki chʼe-Ijipti abo-mi, kpai e-Asiria uko̩lo̩ kʼo̩wo̩-mi che le̩, kpai Israe̩l e̩wñ ogu-mi.