Aizaya 11 - O̩TAKADA O̩LA O̩JO̩ 1970

Ido̩na uko̩lo̩ ku Me̩saya ne̩

¹ Epaʼka apa kwʼe̩te̩ Je̩si dufu, e̩to̩ ki ata kwef ili-wñ la arʼe̩ro.

² Tak Afu Jihofa awʼoji-wñ añmi, owñ chʼAfu ibe kpʼe-e̩wñ emʼoji-wñ, Afu ohio̩la kpai e-ukpahiu, Afu e̩wñ ema kpai e-ailo Jihofa era.

³ Uyo̩-wñ la adʼef ailo Jihofa era. I ñʼakpʼoji ajo̩ teju alu kʼeju-wñ ali n, i la akpʼoji o̩la teju alu kʼeti-wñ agbo̩ n;

⁴ i muda anʼo̩kpakpa akajo̩ ame̩nubie̩, i akpʼoji o̩la okpoko tod ame̩ne̩chikimi ile̩-i; la anʼo̩kpa alu-wñ gwo ane̩-i, oñ i anʼafu ki kwef uko-wñ dufu kpa e̩ne̩bibi.

⁵ O̩kpakpa la achʼe̩wñ ujiñmi-wñ, ubi one̩ eche la achʼe̩wñ ulago-wñ de.

⁶ O̩gu abʼo̩mala ge̩ne̩, ikpali kpʼo̩mewo adachi ugbo kate, oñ o̩mokuno̩ kpai o̩ma idu kpai e̩la ki yoyo ajo̩ ugboʼkate, imo̩to̩ kekele la ane̩ ma le.

⁷ Okuno̩ kpai ole be̩a ajo̩ alʼije̩; amo̩ma-ma adachi ugbo kate; idu la alʼegbe dab okuno̩.

⁸ O̩ma ki añmʼe̩nya achiya alʼura olijo, oñ imo̩to̩ ki dʼalʼe̩nya adʼo̩wo̩-wñ tunyʼura o̩fanuñwa.

⁹ Ma ache e̩wñ du e̩bie̩ne̩ abe̩k ekpʼe̩wñ bie̩ ugbo du oj uwo-mi kiafo̩-i n; todu ile̩ ako̩ ñw Jihofa ema alu kʼomi bʼohimini abadi ma.

Israe̩l kpai Juda adabi kwef e̩kpatuka le̩ kpai o̩ga echi

¹⁰ Oñ iko le̩ ili Je̩si adago chʼagaliga amone̩ ojoji ojoji; abo uche̩ichi uche̩ichi atejane̩ uwñ; uña uñmi-wñ la achʼojima.

¹¹ Tak i awache iko le̩ kʼOndu adʼo̩wo̩-wñ tʼo̩ onukeji kʼi fʼe̩bobo̩ amone̩-wñ la ñw o̩la-wñ, owñ chʼabo ku ma bo̩bo̩ kwʼAsiria kpai Ijipti kpai Patro̩s kpai Kush kpai Elam kpai Shainar kpai Hemat kpai ala ala ohimini abadi.

¹² I la adʼagaliga dago tod abo uche̩ichi uche̩ichi, oñ i akʼabo Israe̩l, ku ma ne ma tʼoko oko ale, jeju, tak i akʼabo Juda ku ma fiatuka kwʼago̩go̩ me̩le̩ ile̩-i wa jo̩.

¹³ Ulie̩na Ifraim akwo bʼo̩ e̩do̩ te̩, ma la akʼabo ku ma fi Juda gwo-ma te̩ da rinyo̩; Ifraim alie̩na Juda n, Juda la agwo Ifraim ma n.

¹⁴ Ma muda awu rʼo̩wo̩ olane̩ abʼika abo Filistia ma, amameji akpe̩re̩ añʼane̩ abo olodudu. Ma anʼo̩wo̩-ma dala abʼIdo̩m kpai Moab ma, tak amo̩ma Amo̩n agbʼo̩la-ma gbo̩.

¹⁵ Taku Jihofa adʼukpalu ohimini Ijipti le̩ te̩ ñw o̩la-wñ; oñ i anʼafu ibi-wñ mi o̩wo̩-wñ ejo abʼOhimini le̩ ma, i la afʼe̩wñ gwo kʼi mud aji aji mebie kʼamone̩ ki nyʼe̩da daba.

¹⁶ Tak ikpadala ade̩ tod abo-wñ ku ma bo̩bo̩ ku ma kwo Asiria wa, alu ki de̩ ñw abo Israe̩l iko ku ma kwʼane̩ Ijipti te̩gu wa le̩.