Abo Rom 6 - O̩TAKADA O̩LA O̩JO̩ 1970

Edama kpai Kraisti chʼedaru bʼadure te̩

¹ Ab a ñʼaka ge̩? A ki ño̩ jʼef adure; alo waa todu kʼufe̩de̩nyo̩ ki mud o̩be̩le̩ke̩te̩?

² O̩jo̩ ki kpo̩na! Awa kʼa leku ñw adure, ab a ale kʼa ñʼadeju ef uwñ abajo̩-i ta?

³ Abe̩k ame̩ ma ka kʼo̩chaka wa ku ma che wa baptism tʼefu Kraisti Jisus i chʼef uku-wñ ma che wa tʼo̩ n?

⁴ Oñ ma fʼawa kpai owñ ji lefu baptism tef uku, todu kʼalu ku ma mu Kraisti du dajikwane̩ kwef abo ki ku lef ojima Ata le̩, abe̩le̩ kʼawa ki ño̩ tale ef e-etito̩ e-iñmi.

⁵ Todu iche̩wñ kʼawa kpai owñ mud abo ki dama okate ef e̩wñ ki bi uku-wñ, mak abe̩le̩ a la ade̩ ef udajikwane̩-wñ ge̩.

⁶ A chema ka ku ma mʼone̩ kʼa che igbele du kamoli manyʼowñ, todu kʼaño̩la e-adure ki gbogili te̩, kʼawa ki we echʼuko̩lo̩ adu ñw adure;

⁷ todu e̩ne̩ ki leku mufu tane̩ bʼadure te̩ me̩.

⁸ I la che̩wñ kʼawa bo̩ Kraisti ku a ake̩do̩no kakini, a ñʼabʼo̩ deju ge̩.

⁹ Todu a chema ka kʼabu ku ma mu Kraisti du dajikwane̩ kwef abo ki ku i ñʼaku ge̩ n, uku laño̩ chʼodu-wñ ge̩ n.

¹⁰ Todu eku kʼi ku, i leku ñw adure onu kate, o̩pioo-wñ de̩; ama edeju kʼi adeju, i adeju ñw O̩jo̩.

¹¹ Abe̩le̩ ame̩ ki nafʼo̩la-me̩ lo rʼef abo ki ku ñw adure, ku me̩ la adeju ñw O̩jo̩ efu Kraisti Jisus.

¹² Todule̩ me̩ ki je̩ ñw adure ki chʼonu ef año̩la-me̩ e-uku-i ku me̩ gbʼe̩ño̩ e̩wñ kʼi ache gbo̩ n.

¹³ Me̩ ki la mʼe̩wñ año̩la-me̩ ko jo̩ ñw adure kʼi chʼido̩na uji n; me̩ ki muda kʼonugo o̩la-me̩ jo̩ ñw O̩jo̩, dabe̩ne̩ kʼame̩ kwef uku adeju me̩, ku me̩ la kʼe̩wñ año̩la chʼido̩na o̩kpakpa jo̩ ñw O̩jo̩.

¹⁴ Todu adure achʼodu-me̩ n, todu me̩ jʼef o̩wo̩ o̩lo̩da n, chai ef o̩wo̩ ufe̩de̩nyo̩.

Ujiwe-wñ—alu kʼadu eche de̩

¹⁵ E̩wñ le̩ ta? A ki ño̩ dure ukpe̩ kʼa ma jʼef o̩wo̩ o̩lo̩da n chai ef o̩wo̩ ufe̩de̩nyo̩? O̩jo̩ ki kpo̩na!

¹⁶ Ame̩ ma kakini, E̩ne̩ ku me̩ kʼo̩la-me̩ chʼadu jo̩ ñw u ku me̩ gbʼo̩la-wñ gbo̩, i chʼadu e̩ne̩ ku me̩ gbʼo̩la-wñ gbo̩ le̩ me̩ che n? dagba i chʼe-adure tef uku, dagba i chʼe-ugbagbo̩ tef o̩kpakpa?

¹⁷ O̩jo̩ nʼugwa, todu me̩ chʼadu adure akwoubi, ama me̩ muda mʼe̩wñ ku ma da o̩na nyʼu, kʼi chʼuko̩ o̩la ku ma ko me̩ jo̩ ñw u le̩, gbagbo̩ kpai e̩do̩-me̩ me̩,

¹⁸ oñ abu ku ma mu me̩ ko jʼane̩ bʼo̩wo̩ adure te̩, me̩ mud amadu ñw o̩kpakpa.

¹⁹ Uko̩la e-one̩ naka, todabu kʼo̩re̩la-me̩ chʼe̩gbo; todu, alu ku me̩ mʼe̩wñ año̩la-me̩ ko chʼadu ñw iwa kpai ugbite̩re̩ tef ugbite̩re̩, abe̩le̩ ame̩ ki namʼe̩wñ año̩la-me̩ ko chʼadu ñw o̩kpakpa fai tef efo̩.

²⁰ Todu e̩gba ku me̩chʼamadu adure le̩, me̩ jʼef o̩wo̩ o̩kpakpa n.

²¹ Todule̩ e̩ro e̩wñ me̩ ne̩ e̩gbale̩? I la ache me̩ anyo̩ abajo̩-i todu ukpoji e̩wñ le̩ chʼuku.

²² Ama fai abu ku me̩ kwotane̩ bʼo̩wo̩ adure te̩ ku me̩ la mud amadu ñw O̩jo̩, me̩ nʼe̩ro-me̩ tef efo̩, ukpoji-wñ la chʼiñmi o̩gbegbele̩.

²³ Todu uro̩me̩ adure chʼuku; ele ufe̩de̩nyo̩ e-O̩jo̩ muda chʼiñmi o̩gbegbele̩ efu Kraisti Jisus Ondu-wa.