Abo Rom 16 - O̩TAKADA O̩LA O̩JO̩ 1970

I agwa abo kʼi ma ma

¹ Fibi o̩maye-wa onobule̩ ku me̩ li-i omi me̩ li le̩, owñ ño̩ chʼe̩ne̩ ki ache e̩wñ ñw ujeju abudo̩ Ondu ki de̩ Se̩nkria;

² todu ku me̩ ki mʼu gba cho̩la ef Ondu alu ki chʼeju-wñ ugbo abo kiafo̩; ku me̩ bʼo̩ kpe̩nyʼu eku e̩wñ du kʼi akʼu; todu owñ mud e̩ne̩ ki gbʼamone̩ wewe nyi kpʼomi onugo ge̩.

³ Me̩ gwa Priska kpai Akwila, ku ma abʼumi chuko̩lo̩ efu Kraisti Jisus,

⁴ ku ma la fʼoji-ma gbali te̩ tod onugo-mi; i chʼomi kate agwa ma n, abo ujeju Ondu du ku ma chʼabo uche̩ichi agwa ma ge̩:

⁵ me̩ gwa ujeju abudo̩ Ondu ki dʼunyi-ma. Me̩ gwa E̩paine̩to̩s e̩nufe̩do̩-mi, kʼi chʼe̩ne̩ ejo̩ga abo Esia ñwu Kraisti.

⁶ Me̩ gwa Me̩n, ki chakanya e̩wñ nana todu me̩ le̩.

⁷ Me̩ gwa Andro̩niko̩s kpai Janias, amefu-mi kʼomi kpai ama chʼe̩namu, ku ma nʼuwohi ef ame̩nukpuche̩ le̩; ma laño̩ jʼefu Kraisti o̩gbami.

⁸ Me̩ gwa Ampliato̩s, e̩nufe̩do̩-mi ef Ondu.

⁹ Me̩ gwa O̩rbano̩s, e̩ne̩ ki abʼuwa chuko̩lo̩ efu Kraisti, kpai Stakus e̩nufe̩do̩-mi.

¹⁰ Me̩ gwa Ape̩le̩s e̩ne̩ ku ma fʼu ñwa kʼi nyo̩ efu Kraisti. Me̩ gwa abo Aristo̩bulo̩s.

¹¹ Me̩ gwa He̩ro̩dio̩n, kʼi chʼefu-mi. Me̩ gwa abo Narsiso̩s ku ma jʼefu Ondu.

¹² Me̩ gwa Trufana kpai Trufosa ku ma achʼakanya uko̩lo̩ ef Ondu le̩. Me̩ gwa Pe̩rsis e̩nufe̩do̩ kʼi chʼakanya uko̩lo̩ nana ef Ondu.

¹³ Me̩ gwa Rufo̩s e̩ne̩ ku ma chi ef Ondu le̩, kpai iye-wñ ki ño̩ chʼiye-mi ge̩.

¹⁴ Me̩ gwa Asunkrito̩s kpai Fle̩go̩n kpai He̩rme̩s kpai Patro̩bas kpai He̩rmas, kpai amo̩maye ku ma manyʼuma.

¹⁵ Me̩ gwa Filo̩lo̩go̩s kpai Julia kpai Nere̩o̩s kpai o̩maye-wñ onobule̩, kpai O̩lumpas kpai abo kiafo̩ du ku ma manyʼuma.

¹⁶ Me̩ dʼukalu kiafo̩ gwʼomune̩. Ujeju abudo̩ Kraisti duu agwa me̩.

¹⁷ Oñ o̩ko̩ nagha bʼume̩, amo̩maye, me̩ nafʼeju mʼabo ku ma jʼadʼamone̩ rʼeji ku ma la ada amone̩ hi tʼojoji ñw o̩la kʼame̩ ko̩che̩ le̩ ne̩: ku me̩ muna bʼuma te̩.

¹⁸ Todu abo e̩go̩-i achuko̩lo̩ adu ñw Ondu-wa Kraisti n, chai ef uma ma re̩; oñ ma nʼurinyo̩ o̩fa kpai ele eka mʼame̩ne̩do̩foo̩ ibe da.

¹⁹ Todu egbagbo̩ ku me̩ gbagbo̩ kwo̩tʼamone̩ du e̩ti. Todule̩ oñ nayo̩ todu me̩, i la dʼumi e̩do̩ ku me̩ chʼamanibe ugbo e̩wñ ki nyo̩, kʼe̩wñ e̩bie̩ne̩ ki we egwe̩gwa nyʼume̩.

²⁰ Oñ O̩jo̩ e-ure̩do̩ la akpi Setan fo̩ ef e̩re̩-me̩ ofeje̩i. Ufe̩de̩nyo̩ Ondu-wa Jisusi Kraisti ki dʼugbo me̩.

²¹ Timoti, kʼi abʼumi chʼuko̩lo̩, agwa me̩, kpai Lukio̩s kpai Jeso̩n kpai Sosipata amefu-mi le̩.

²² Omi, Te̩rtio̩s kʼu nakʼo̩takada-i, agwa me̩ ef Ondu.

²³ Gayo̩s e̩ne̩nyi-mi kpai abo ujeju-i chaka agwa me̩. Irasto̩s, adʼo̩kpulu ewo-i, agwa me̩, kpai Kwarto̩s o̩maye le̩. [

²⁴ Ufe̩de̩nyo̩ Ondu-wa Jisus Kraisti ki dʼugbo me̩ chaka. Ami.]

O̩jo̩ ekele-wñ

²⁵ Tʼugbo e̩ne̩ ki neke fume̩ e̩re̩ nyane̩ teju alu kʼUche̩nyo̩-mi kpai o̩la akoya Jisus Kraisti de̩, teju alu ku ma mʼafili bite̩ ku ma dute̩ chii o̩kpanachi o̩kpanachi ogbegbele̩ le̩,

²⁶ ku ma la mʼu du tejugede abajo̩-i, oñ ma je̩ ñw abo uche̩ichi du ku ma mʼo̩ lef o̩takada kʼamakache̩ ko̩ teju alu kʼO̩jo̩ e-ogbegbele̩ fʼuko̩-wñ te̩, kʼama ki mʼo̩la e̩do̩ ekono gbagbo̩;

²⁷ tʼugbo O̩jo̩ kate ki nʼibe le̩, lefu Jisus Kraisti, owñ ki nʼojima tʼogbegbele̩ nyile̩wa. Ami.