Abakwane̩ 12 - O̩TAKADA O̩LA O̩JO̩ 1970

Inabali Ebraham; O̩jo̩ fʼu do̩; Ebraham nyi Kenan

¹ Jihofa la ka ñwu Ebram me̩, kakini, Kwʼojane̩-we̩ dufu kpai kwugbo amefu-we̩ kpai kwugbo unyi ata-we̩ kʼe̩ lo tʼane̩ kʼu nadu ñʼuwe̩.

² Tak u nadʼuwe̩ che abo uche̩ichi elile, oñ nade̩nyo̩ ñw e̩, nache odu-we̩ ki nana, uwe̩ ki la mud e̩nyo̩ ñw amone̩.

³ U ñʼade̩nyo̩ ñw abo ku ma kadua ñw e̩, oñ e̩ne̩ kʼi anama ñw e̩ na nama ñw u; oñ efu-we̩ ma ade̩nyo̩ ñw akwo̩ra unyi akwo̩ra unyi ane̩-ile̩-i du.

⁴ Oñ Ebram le, alu ku Jihofa ko̩la ñw u; Lo̩t ño̩ lebʼo̩. O̩do̩ Ebram la chʼo̩gbo̩ me̩ta nyoke me̩gwe̩lu e̩gba kʼi kwo Haran.

⁵ Taku Ebram mu Se̩rai o̩ya-wñ du, kpai Lo̩t o̩ma o̩maye-wñ le̩, kpai ane̩ ku ma fiye̩ jo̩ chaka, kpai amonugo one̩ ku ma ne̩ efu Haran; oñ ma le dufu ku ma nyʼane̩ Ke̩nan. Oñ ma lewa ane̩ Kenan,

⁶ taku Ebram lale gu efu ane̩ le̩ du tʼugbo ku ma do̩ ko̩ She̩ke̩m, ugbo oli te̩re̩bint e-More̩. Oñ e̩gbale̩ abo Ke̩nan jʼojane̩ le̩.

⁷ Taku Jihofa kwotejugede ñw Ebram, oñ i kakini, Ugbe̩-we̩ oñ omi adʼane̩ kide̩ ñw u. Tak o̩mo̩ i fʼubo̩ iche̩bo̩ ne ñwu Jihofa, kʼi kwotejugede ñw u le̩.

⁸ I ño̩ kwʼo̩mo̩ nyʼugbo uwo ki dʼo̩wo̩ olodudu Be̩te̩l, oñ i fʼunyabo-wñ fa, Be̩te̩l de̩ olane̩-wñ, Ai la de̩ olodudu; o̩mo̩ i ño̩ fʼubo̩ iche̩bo̩ ne ñwu Jihofa ge̩ tak i do̩ odu Jihofa.

⁹ Tak Ebram ño̩ kʼe̩re̩ nyʼule̩, tʼo̩wo̩ o̩pata o̩gane̩ alo waa.

Ebraham dʼIjipti

¹⁰ Ukpo̩ta la dʼojane̩ le̩ akpa. Oñ Ebram gwo̩ru nyʼIjipti kʼi ge̩ne̩ o̩mo̩, todu ukpo̩ta akpa tabale ojane̩ le̩.

¹¹ Oñ i lewatu e̩gba kʼi me̩ru egudu tʼIjipti, i ka ñwu Se̩rai o̩ya-wñ kakini, E̩ go mi ta, omi chema kʼuwe̩ chʼonobule̩ kʼi chefe̩ru one̩ eju ego;

¹² abo Ijipti fʼuwe̩ li fai ma aka kʼo̩ya-wñ de̩; taku ma adʼumi kpa, ku ma la aje̩ ñw e̩ deju.

¹³ Narodubʼe̩ kʼuwe̩ ki ka kʼe̩ chʼo̩maye-mi, todu ki nyo̩ ñw omi lʼo̩la-we̩, todu kʼonugo-mi ki deju lʼugbo we̩.

¹⁴ Oñ i lewatu e̩gba kʼEbram lewa Ijipti abo Ijipti go onobule̩ le̩ kʼi chefe̩rʼeju nana.

¹⁵ Tak amagboji Fero fʼowñ li, oñ ma ñwulo̩-wñ ñwu Fero. Taku ma mʼonobule̩ le̩ du le tef unyi Fero.

¹⁶ Tak i che e̩nyo̩ ñw Ebram todu owñ; oñ Ebram ne̩ ame̩wño̩re̩ egini kpai amokuno̩ kpai amo̩ke̩ke̩te̩ o̩ko̩ kpai amadu e̩ne̩ke̩le̩ kpai amadu onobule̩ kpai amo̩ke̩ke̩te̩ ole kpai aminyakulumi.

¹⁷ Taku Jihofa je̩ ñw atulubo̩ elile ki lewa bu Fero kpai abunyi-wñ ma todu Se̩rai, o̩ya Ebram.

¹⁸ Taku Fero fʼEbram do̩, oñ i kakini, E̩wñ chʼe-kʼuwe̩ che mi-i? E̩wñ chi kʼe̩ ma ka ñwu mi kʼowñ chʼo̩ya-we̩ n?

¹⁹ E̩wñ chi kʼuwe̩ kakini, Owñ chʼo̩maye-mi, kʼomi la mʼu du chʼo̩ya-mi? Todule̩ e̩ la go, o̩ya-we̩ de̩, mʼowñ du, kʼe̩ lo we̩.

²⁰ Taku Fero ñwa ñw abo-wñ ugbo o̩la-wñ; taku ma fʼahite̩-wñ che, kpai o̩ya-wñ kpai e̩wñ du kʼi ne̩.