Abakwane̩ 11 - O̩TAKADA O̩LA O̩JO̩ 1970

O̩do̩go̩ Bebe̩l

¹ Oñ o̩gbo ile̩-i du chʼalu ichi okate uko̩la-ma la chʼoka.

² Tak i lewatu abu ku ma mʼunyabo chi kwʼo̩wo̩ olodudu awa, kʼama fʼegbili li ane̩ Shainar taku ma kwojo̩ o̩mo̩.

³ Taku ma ka ñw o̩la-ma kakini, Me̩ lewa, kʼa nabo̩ otubeli, kʼa fʼu ro̩ nyo̩nyo̩. Taku ma ne̩ otubeli koji okuta, oñ ma ne̩ o̩bia bitume̩n chʼike̩te̩ ene.

⁴ Taku ma kakini, Me̩ lewa, kʼa kʼunyi ñw o̩la-wa, kʼa nʼewo, kpai o̩do̩go̩ kʼoji-wñ ki kad efojale, a che kʼa fʼodu ne̩, tode̩gba ku ma fʼuwa kpatuka rʼo̩do̩da bʼeju o̩gbo̩ ane̩-ile̩ du ma.

⁵ Taki Jihofa gwo̩ru wa kʼi li ewo kpai o̩do̩go̩, e-kʼamone̩ ne le̩.

⁶ Taki Jihofa kakini, Go, ma chʼaboʼka, ichi-ma la chʼoka ge̩; e̩wñ ku ma la chane̩ eche de̩ ta; fai e̩wñ du ku ma ñwa ef e̩do̩-ma ku ma che i nʼugbo ku ma akpo̩na nyʼuma ge̩ n.

⁷ Me̩ lewa, kʼa mugwo̩ru nyʼo̩mo kʼa fʼalu ichi-ma gwuji, todu kʼama ki we egbʼoji o̩la omune̩.

⁸ Abe̩le̩ Jihofa fʼuma kpatuka kwʼo̩mo̩ rʼo̩do̩da bʼeju ane̩-ile̩ du ma, taku ma tʼewo le̩ no̩ ene.

⁹ Todule̩ ma dʼodu-wñ ko̩ Bebe̩l, todabu ki Jihofa fʼichi abile̩ du gwuji o̩mo̩; tak akwo̩mo̩ Jihofa fʼuma kpatuka rʼo̩do̩da bʼeju ane̩-ile̩ du ma.

Akwo She̩m wa Ebraham

¹⁰ O̩lo̩pu She̩m o̩gba o̩gba le̩ de̩. O̩do̩ She̩m chʼogume̩lu tak i bi Arpaksad abu kʼuwobi omi le̩ takpa o̩do̩ meji;

¹¹ abu kʼi bi Arpaksad She̩m ño̩ deju o̩do̩ oli me̩gwa, oñ i bi amo̩ma e̩ne̩ke̩le̩ kpai onobule̩.

¹² Arpaksad deju o̩do̩ ogue̩gwa nyoke me̩lu tak i bi Shela;

¹³ abu kʼi fu Shela bi Arpaksad ño̩ dʼo̩do̩ ulo̩ko̩ nyoke me̩ta, i laño̩ bi amo̩ma e̩ne̩ke̩le̩ kpai onobule̩.

¹⁴ Oñ Shela dʼo̩do̩ ogue̩gwa tak i bi E̩be̩r;

¹⁵ abu kʼi fʼE̩be̩r bi Shela ño̩ dʼo̩do̩ ulo̩ko̩ nyoke me̩ta, i laño̩ bi amo̩ma e̩ne̩ke̩le̩ kpai onobule̩.

¹⁶ Oñ E̩be̩r dʼo̩do̩ ogue̩gwa nyoke me̩le̩, tak i bi Pe̩le̩g;

¹⁷ abu kʼi fu Pe̩le̩g bi E̩be̩r ño̩ dʼo̩do̩ ulo̩ko̩ nyʼogue̩gwa, i laño̩ bi amo̩ma e̩ne̩ke̩le̩ kpai onobule̩.

¹⁸ Oñ Pe̩le̩g dʼo̩do̩ ogue̩gwa, tak i bi Reu;

¹⁹ abu kʼi fu Re̩u bi Pe̩le̩g ño̩ dʼo̩do̩ o̩gwo̩ko̩ nyoke me̩la, i laño̩ bi amo̩ma e̩ne̩ke̩le̩ kpai onobule̩.

²⁰ Oñ Reu dʼo̩do̩ ogue̩gwa nyoke meji, tak i bi Se̩rug;

²¹ abu kʼi fu Se̩rug bi Reu ño̩ dʼo̩do̩ o̩gwo̩ko̩ nyoke mebie, i laño̩ bi amo̩ma e̩ne̩ke̩le̩ kpai onobule̩.

²² Oñ Se̩rug dʼo̩do̩ ogue̩gwa, tak i bi Neho̩r;

²³ abu kʼi fu Neho̩r bi Se̩rug ño̩ dʼo̩do̩ o̩gwo̩ko̩, i laño̩ bi amo̩ma e̩ne̩ke̩le̩ kpai onobule̩.

²⁴ Oñ Neho̩r dʼo̩do̩ ogu nyoke me̩la, tak i bi Te̩ra;

²⁵ abu kʼi fu Te̩ra bi Neho̩r ño̩ dʼo̩do̩ ogume̩lu nyoke me̩gwe̩la, i laño̩ bi amo̩ma e̩ne̩ke̩le̩ kpai onobule̩.

²⁶ Te̩ra dʼo̩do̩ o̩gbo̩ me̩ta nyoke me̩gwa, i la fʼEbram, kpai Neho̩r kpai Haran bi.

²⁷ O̩lo̩pu Te̩ra o̩gba o̩gba la de̩. Te̩ra bi Ebram, kpai Neho̩r, kpai Haran; Haran la bi Lo̩t.

²⁸ Oñ Haran leku dʼo̩gba ata-wñ Te̩ra ane̩ ugbo ku ma jʼubi-wñ, ane̩ Ur e-abo Kaldia le̩.

²⁹ Ebram kpai Neho̩r la nʼo̩ya ñw o̩la-ma; odu o̩ya Ebram ko̩ Se̩rai, odu o̩ya Nehor la ko Milka, o̩ma Haran kʼi chʼata Milka kpai ata Iska.

³⁰ Se̩rai la chʼagaji; i nʼo̩ma n.

³¹ Taku Te̩ra mʼo̩ma-wñ Ebram du kpai Lo̩t o̩ma Haran, aaju-wñ le̩, kpai Se̩rai o̩ya o̩ma-wñ Ebram, oñ ma kpe̩re̩ kwo Ur e-abo Kaldia dufu ku ma nyʼojane̩ Kenan; taku ma lewa Haran, oñ ma kwojo̩ o̩mo̩.

³² Oñ o̩do̩ Te̩ra chʼo̩do̩ o̩gwo̩ko̩ nyoke me̩lu; taku Te̩ra leku Haran o̩mo̩.