2 Jo̩n 1 - O̩TAKADA O̩LA O̩JO̩ 1970

¹ Ogijo-i tʼugbo odu-mi onobule̩ ku ma chi le̩ kpai amo̩ma-wñ kʼomi afe̩do̩ ma ef ochochi, i la chʼomi kate n, abo du ku ma te̩tama ochochi le̩ manyʼumi kpo̩fo̩,

² lef ochochi ki gugu ef uwa kʼi lañʼadʼugbo wa ogbegbele̩.

³ Ufe̩de̩nyo̩ kpʼejumomi kpʼure̩do̩ kwʼugbo O̩jo̩ Ata, kpai kwʼugbo Jisus Kraist O̩ma Ata le̩ adʼugbo wa, ef ochochi kpai ufe̩do̩.

⁴ Nayo̩ tabale todabu kʼu fʼiche̩kibo̩ ef amo̩ma-we̩ li abu ku ma tale ef ochochi, alu kʼa gba uko̩-wñ kwʼugbo Ata.

⁵ Oñ fai o̩ko̩ nagba bʼuwe̩, Odu-mi onobule̩, i dabe̩ne̩ kʼuko̩ etito̩ ku ma te̩ oñ nako̩ rʼuwe̩-i n, chai e-kʼa ne̩ kwʼabakwane̩ le̩, todu kʼa ki fe̩do̩ omune̩.

⁶ E̩wñ ki la chʼufe̩do̩ la de̩, todu kʼa ki tale teju uko̩-wñ le̩. E̩wñ ki chʼuko̩ le̩ de̩ kakini, Alu ku me̩ gbo̩ kwʼabakwane̩ le̩, todu kʼame̩ ki tale ef e-le̩.

⁷ Todu amadone̩la wewe kwodufu tef ile̩-i me̩, owñ chʼabo ku ma ma gbalu ka ku Jisus awa ef ore̩la n. E̩ne̩ le̩ chʼadone̩la kpai achagwunyu Kraist le̩.

⁸ Me̩ nago o̩la-me̩, todu kʼame̩ ki we eko e̩wñ kʼa chʼuko̩lo̩ tod uwñ le̩ rinyo̩, chai kʼame̩ ki mʼuro̩me̩ gba e̩kʼe̩ko.

⁹ E̩ne̩ du ki lalegudu nyo̩gba, kʼi ma gugu ef uko̩-o̩la Kraisti n nʼO̩jo̩ n; e̩ne̩ ki gugu ef uko̩-o̩la le̩ alo waa, tʼAta tʼO̩ma e̩ne̩ le̩ ne̩.

¹⁰ Iche̩wñ kʼe̩ne̩ du wʼugbo me̩, kʼi ma la ne̩ uko̩-o̩la-i wa n, me̩ ki gbʼo̩ tef unyi n, me̩ ki la ka ñw u ka kʼAgba oo n:

¹¹ todu e̩ne̩ ki ka ñw u ka kʼAgba oo, nʼuta ata ef uko̩lo̩-bibi-wñ me̩.

¹² Abu kʼu chenʼe̩wñ wewe kʼu nako̩ rʼume̩, u neku enʼo̩takada kpʼomi ejiji ako̩ n; chai ibe u kono ka kʼu nawʼugbo me̩, kʼalu-wa ki de kʼa ko̩la, todu kʼuyo̩-me̩ ki jo̩ kpa.

¹³ Amo̩ma o̩maye-we̩ onobule̩ ku ma chi le̩ agwʼe̩.