2 Abo Ko̩rint 9 - O̩TAKADA O̩LA O̩JO̩ 1970

Alu ku ma ache ku ma atʼo̩ko̩ le̩

¹ Todu i chʼo̩la e̩wñ eche ñw abo kiafo̩ le̩, i nʼugbo kʼu nakʼo̩takada-wñ rʼume̩ n, me̩ chʼo̩je̩bi-wñ,

² todu u chema alu kʼibe-me̩ de̩ kolokolo, e-le̩ nadu buba ugbo abo Masidonia todu me̩, kakini, Abo Akaya fʼo̩la-ma mu kwʼechi echi; oñ ego̩laru ku me̩ go̩laru kʼabo wewe ef uma e̩che̩.

³ U muda fʼamo̩maye kpe̩ wa, todu kʼuba-wa kʼa ba todu me̩ ki we echʼofofo ef ukpe̩ kide̩; todu kʼame̩ ki mʼo̩la tane̩ alu kʼu ka le̩;

⁴ tode̩gba kʼukani abo Masidonia lebʼumi wa, ku ma li abu ku me̩ ma mʼo̩la tane̩ n, ki we enʼugbo kʼanyo̩ amʼuwa (todu kʼa we eka kʼame̩) ef o̩kpaka uba-wa le̩.

⁵ Todule̩ eku aku eju-mi kʼu gbo̩kobʼamo̩maye le̩ todu kʼama ki dʼo̩gba nyʼugbo me̩, ku ma ki fʼe̩wñ e̩nyo̩ ku me̩ kʼo̩la-wñ tane̩ le̩ kpama, kʼi che̩ñwo̩che tane̩ abe̩le̩ ki mud e̩wñ ku ma akadua ñw me̩, kʼi we edabe̩ne̩ ku me̩ piepi e̩wñ.

⁶ E-le̩ la de̩, e̩ne̩ ki dʼe̩yo̩ gbe̩ fe̩fe̩le̩, o̩fe̩fe̩le̩ i ako wʼunyi; oñ e̩ne̩ ki dʼe̩wñ gbe̩ ku ma tadua ñw u año̩ kʼadua wʼunyi.

⁷ E̩ne̩ne̩ne̩ne̩ kʼi che alu kʼi ñwatane̩ ef e̩do̩-wñ, i ki che lef e̩do̩dudu n abe̩k ef otila n: todu O̩jo̩ afe̩do̩ e̩ne̩ ki ache ele e̩do̩ afu.

⁸ Oñ O̩jo̩ aneke je̩ ñw ufe̩de̩nyo̩ du ki chʼololo ñw me̩, todu kʼame̩ ki nʼe̩wñ du e̩gba du ki bʼume̩ jo̩ chaka, kʼi kwʼume̩ bo̩ tod uko̩lo̩ e̩nyo̩ du eche.

⁹ Alu ki che̩ko̩tane̩ kakini, I fʼe̩wñ fia, i mu ko ñw abo ku ma li ubie̩: o̩kpakpa-wñ la akpo̩kpe̩ tʼogbegbele̩.

¹⁰ Oñ e̩ne̩ ki adʼe̩yo̩ ñw e̩ne̩ ki agbe̩, kʼi año̩ dʼakala wa tod uje̩wñ la adu ñw me̩ ku me̩ gbe̩, i la aje̩ ñw u nawo ñw me̩, i año̩ je̩ ñw e̩ro e̩wñ o̩kpakpa e-me̩ ki nyo̩gba.

¹¹ I la aje̩ ñw me̩ mud anana ef e̩wñ du ku me̩ ki chʼo̩wo̩ ñw one̩ alu du ku ma chʼo̩wo̩ ñw one̩; e-le̩ achʼuko̩lo̩ ugwa egwʼO̩jo̩ lef uwa.

¹² Todu abune̩ e̩wñ eche ñw one̩-i chʼe̩wñ ki nyarʼabo kiafo̩ eko ñw ma kate n, i ño̩ nʼe̩kwubo̩ ki mud e-O̩jo̩, owñ chʼugwa wewe ku ma gwʼo̩.

¹³ Lef eñwa ku ma ñwa e̩wñ ku me̩ che ñw one̩ go, ma jʼadʼojima ñw O̩jo̩ abu ku me̩ fʼo̩la-me̩, kamuhi teju alu ku me̩ gbalu Uche̩nyo̩ Kraisti, kpʼo̩wo̩ ku me̩ chi ñwone̩ ef uta kʼame̩ ta kpʼama kpʼamone̩ du-i.

¹⁴ Oñ ef o̩ko̩ kʼama gba bʼO̩jo̩ todu me̩ ma añeju-me̩, tod ufe̩de̩nyo̩ O̩jo̩ ki tabale ki dʼugbo me̩.

¹⁵ Ugwa ki chʼe-O̩jo̩ tod ele-wñ ki ma je̩ ka n le̩.