1 Samiue̩l 9 - O̩TAKADA O̩LA O̩JO̩ 1970

So̩l kpai Samiue̩l de

¹ Oñ e̩ne̩ Be̩njamin oka do̩mo̩ kʼodu-wñ ko̩ Kish, o̩ma Abie̩l i che, o̩ma Zero̩r, o̩ma Be̩ko̩rat, o̩ma Aña. E̩ne̩ Be̩njamin ki chʼagbiti ogu i che.

² I la nʼo̩ma e̩ne̩ke̩le̩ kʼodu-wñ ko̩ So̩l imo̩to̩ okolobia e̩gbo̩gbo̩ i che, i nʼe̩ne̩ du ef amo̩ma Israe̩l kʼi chʼuto̩ eju tʼowñ le n. Akwʼojika-wñ nyʼate̩ oñ i du gba tʼamone̩ le̩ du le.

³ Oñ amo̩ke̩ke̩te̩ Kish, ata So̩l, lenyo̩. Taku Kish ka ñwu So̩l, o̩ma-wñ kakini, E̩ mʼaduʼka du fai, kʼe̩ kwane̩ kʼe̩ nyʼatene amo̩ke̩ke̩te̩ le̩.

⁴ Tak i lale gu ef ane̩ uwo Ifraim kpai ane̩ Shalisha du. Ma muda li ma n; oñ ma lale gu ef ane̩ Shaalim du, ma la jʼo̩mo̩ n. Tak i lale gu ef ane̩ abo Be̩njamin du ma muda li ma n.

⁵ E̩gba ku ma lewa ane̩ Zuf, So̩l ka ñw adu-wñ kʼi dʼugbo-wñ le̩ kakini, Wa kʼa dabi, tode̩gba kʼe-amo̩ke̩ke̩te̩ ma ñʼawʼata-mi eju ge̩ n, kʼi achane̩ edejiji wa.

⁶ Tak i dohi ñw u kakini, Go ta, e̩ne̩ O̩jo̩ʼka dʼewo-i, e̩ne̩ ku ma bʼojima mʼo̩ i che; e̩wñ du kʼi aka awache̩ chuu. A ki nyʼo̩mo̩ ta; ikani i neke ka ule̩ e̩wñ kʼa ale-i ñw a.

⁷ Taku So̩l ka ñw adu-wñ kakini, Ama, iche̩wñ kʼa le fa? E̩wñ a adu wa ñw e̩ne̩ le̩? Todu uje̩wñ ef ikpa-wa takpa me̩. I la nʼe̩wñ ele du kʼa adu wa ñw e̩ne̩ O̩jo̩ le̩ n: e̩wñ a ane̩?

⁸ Tak adu le̩ dohi ñwu So̩l ge̩ kakini, Go, u chenʼukpe̩le̩ o̩ko̩ she̩ke̩l ajifa ef o̩wo̩-mi, e-le̩ nadu ñw e̩ne̩ O̩jo̩-i, kʼi ka o̩na-wa ñw a.

⁹ Oj ane̩ Israe̩l akwoubi, e̩gba kʼone̩ anyʼatʼO̩jo̩ ene ab i aka de̩ kakini, Lewa, kʼa nyʼugbo agane̩; todu e̩ne̩ ku ma do̩ ka kʼakache̩ abajo̩-i, akwoubi ma dʼo̩ ka kʼagane̩.

¹⁰ Taku So̩l ka ñw adu-wñ kakini, E̩ ka nyo̩ gbe̩, lewa kʼa lo ke. Abe̩le̩ ma nyʼewo ugbo kʼe̩ne̩ O̩jo̩ le̩ de̩.

¹¹ Oñ abu ku ma ate̩gu nyʼewo le̩ ma de kpʼabimo̩to igbe̩le̩ ku ma dufu nyʼakpʼomiofo, oñ ma tʼuma ene kakini, Agane̩ le̩ dʼemi?

¹² Tak abo le̩ dohi ñwu ma kakini, Go, owñ dʼO̩gba-we̩ le̩; hiane̩ alo ke, todu eñini-i i gudu wʼef ewo-i; todu amone̩ emi chenʼiche̩bo̩ ku ma che oj otete le̩ eñini.

¹³ Ababa ku me̩ mugudu wʼef ewo, ame̩ aliʼu o̩gba tak i nyʼoj otete le̩ kʼi je̩ e̩wñ; todu amone̩ jʼaje̩ e̩wñ tak i wa n, todu owñ akadua bʼe̩wñ iche̩bo̩ le̩ ma; ubi le̩ tak abo ku ma do̩ ma wa aje̩. Todule̩ me̩ nate̩gu nyʼo̩mo̩ fai; todu iko-i oñ me̩ aliʼu.

¹⁴ Taku ma mute̩gu nyʼewo le̩, oñ abu ku ma mugudu wʼef ewo, go, Samiue̩l kpejurʼuma awa kʼi te̩gu nyʼotete le̩.

¹⁵ E̩gba ki bʼonu ku So̩l awa-i, Jihofa mu Samiue̩l eti bi, kakini,

¹⁶ Ame̩ru iko-i o̩na, omi akpʼone̩ kwʼoj ane̩ Be̩njamin wʼugbo we̩, tak uwe̩ abʼekpo tʼo̩ oji kʼi chʼe̩nuto̩gba abo-mi, Israe̩l; owñ le̩ ajadu amone̩-mi kwef o̩wo̩ abo Filistia; todu u rʼeju da go amone̩-mi me̩, todabu kʼukwa-ma tʼumi eti.

¹⁷ Tak e̩gba ki Samiue̩l fu So̩l li, Jihofa ka ñw u kakini, Go, e̩ne̩ kʼomi kʼo̩la-wñ ñw e̩ le̩ de̩! E̩ne̩-i anʼo̩da amone̩-mi.

¹⁸ Taku So̩l te̩me̩ru Samiue̩l alaku le̩, oñ i kakini, Agba, e̩ ka ñwu mi ugbo kʼunyi agane̩ le̩ de̩.

¹⁹ Taku Samiue̩l dohi ñwu So̩l kakini, Omi, agane̩ le̩ de̩; mute̩gu tʼumi o̩gba nyʼugbo otete le̩, todu uwe̩ aje̩ e̩wñ kpʼomi eñini; odudu tak u naje̩ ñw e̩ lo, oñ naka e̩wñ du kʼi dʼe̩do̩-we̩ ñw e̩.

²⁰ I la chʼe-amo̩ke̩ke̩te̩-we̩ ku ma lenyo̩ enyike̩ta le̩, e̩ ki dʼibe tʼe-ma n; todu ma fʼuma li me̩. E̩ne̩ oñ e̩wñ du kʼabo Israe̩l ñeju-wñ dʼugbo-wñ ta? I chʼuwe̩ kpʼabo unyi ata-we̩ n?

²¹ So̩l dohi kakini, I chʼe̩ne̩ Be̩njamin omi che n? I chʼabo o̩lo̩pu ki nya ef o̩lo̩pu o̩lo̩pu Israe̩l u che n? Unyi ata-mi la chʼe-ki nya tʼunyi du ef o̩lo̩pu Be̩njamin le n? Abile kʼe̩ ka abe̩le̩ ñwu mi?

²² Taku Samiue̩l mu So̩l kpʼadu-wñ du, oñ i mʼuma ko wʼef unyi ugbo kʼabononojo aru, i la je̩ ñwu ma gugu ugugu ojima ki tule ef abo ku ma do̩ wa, abo le̩ la dab one̩ ogue̩gwa.

²³ Taku Samiue̩l ka ñw e̩ne̩ ki ahi o̩je̩ kakini, Mʼukpe̩ kʼu du ñw e̩ e-kʼu ka ñw e̩ kakini, Mʼu du gugu o̩wo̩ʼka ugbo-we̩ le̩ du wa.

²⁴ Tak e̩ne̩ ki ahi o̩je̩ mʼuta e̩la le̩ du kpʼe̩wñ ki dʼoji-wñ, i la mʼu du gugu o̩gba So̩l. Oñ i kakini, Go, e-ku ma do̩wo̩mo̩ tane̩ le̩ de̩! mʼu du gugu o̩gba-we̩ kʼe̩ je̩; todabu ku ma fʼu de tane̩ ñw e̩ gbogbo wʼiko ku ma date̩, todu u kakini, U fʼamone̩ do̩ wa me̩. Abe̩le̩ So̩l bi Samiue̩l je̩ e̩wñ o̩jo̩ le̩.

²⁵ Oñ e̩gba ku ma mugwo̩ru otete le̩ wʼef ewo, i choluka kpai So̩l oj o̩pata unyi.

²⁶ Taku ma takpa kwane̩; oñ i lewatu abu kʼo̩jo̩ añwa bulubulu, Samiue̩l do̩ So̩l wʼoj o̩pata unyi le̩ kakini, Kwane̩, kʼu fʼe̩ kpe̩ kwʼemi alo. Taku So̩l kwane̩, oñ amameji ledufu, owñ kpai Samiue̩l.

²⁷ Oñ abu ku ma agwo̩ru ugbo alo̩me̩ ewo le̩, Samiue̩l ka ñwu So̩l kakini, Ka ñw adu-i kʼi dʼo̩gba anede wa (oñ i le), uwe̩ ki muda dago yo̩o̩ ta, kʼomi aje̩ ñw e̩ gbʼo̩la O̩jo̩.