1 Jo̩n 3 - O̩TAKADA O̩LA O̩JO̩ 1970

Ufe̩do̩ kʼO̩jo̩ du ñw a de̩

¹ Me̩ go alu kʼufe̩do̩ kʼAta che ñw a de̩, todu kʼama ki do̩ wa kʼamo̩ma O̩jo̩; abe̩le̩ a de̩. Lef e-le oñ ile̩ ma amʼawa n, ukpe̩ kʼi ma mʼowñ n.

² Ame̩nufe̩do̩, fai a chʼamo̩ma O̩jo̩ me̩; alu kʼa la ade̩ ejo̩gba tejugede ta n, a chema ka kʼowñ kwotejugede a adab owñ, ukpe̩ kʼa ali owñ alu kʼi de̩.

³ Oñ e̩ne̩ du ki nʼibe ekonʼowñ-i agwʼo̩la-wñ rinyo̩ ki fe̩ alu kʼe̩ne̩ le̩ chefe̩.

O̩ma e-O̩jo̩ kpʼadure etu

⁴ E̩ne̩ du ki chʼache e̩wñ adure la ache e̩wñ ugbite̩re̩ ge̩; adure la chʼugbite̩re̩.

⁵ Ame̩ la chema ka kʼe̩ne̩ le̩ kwotejugede todu kʼi ne̩ adu adure le̩, adure du la dʼef uwñ n.

⁶ E̩ne̩ du ki chʼagugu ef uwñ adure n; e̩ne̩ ki chʼache e̩wñ adure li owñ mama ta n, i la mʼowñ n.

⁷ Amo̩ma-mi, me̩ ki je̩ ñw e̩ne̩ du ko me̩ la n. Ache e̩wñ o̩kpakpa chʼo̩kpakpa, alu kʼe̩ne̩ le̩ chʼo̩kpakpa.

⁸ E̩te̩ ache e̩wñ adure chʼAbulumone̩; todu Abulumone̩ te̩tadure kwʼabakwane̩. Todule̩ oñ O̩ma O̩jo̩ kwotejugede, owñ chʼutodu kʼi mʼuko̩lo̩ Abulumone̩ tu.

⁹ E̩ne̩ du ku ma bi kʼe̩te̩-wñ chʼO̩jo̩ ache e̩wñ adure n; ukpe̩ kʼugbe̩-wñ gugu ef uwñ; i la nekʼadure n, todu kʼO̩jo̩ chʼe̩te̩-wñ ku ma bʼi.

¹⁰ Ef e-le̩ oñ amo̩ma O̩jo̩ kpʼamo̩ma Abulumone̩ tejugede jo̩: e̩ne̩ du ki ma chʼache e̩wñ o̩kpakpa n, mak e̩te̩-wñ chʼO̩jo̩ n, kpʼe̩ne̩ ki ma afe̩do̩ o̩maye-wñ n.

¹¹ Todu e̩wñ ki chʼuche̩ kʼame̩ gbo̩ kwʼabakwane̩ le̩ de̩ kakini, Todu kʼawa ki fe̩do̩ omune̩,

¹² i ki chʼalu kʼe̩te̩ Ken chʼe̩ne̩bibi le̩ tak i dʼo̩maye-wñ kpa n. E̩wñ la chʼofe-wñ kʼi dʼowñ kpata? Todabu kʼuko̩lo̩-wñ chʼebibi kʼe-o̩maye-wñ muda chʼo̩kpakpa.

Efe̩do̩ amo̩maye

¹³ Iche̩wñ kʼile̩-i nʼulaka-me̩ ache i ki chʼaye ñwu me̩ n, amo̩maye.

¹⁴ Awa chema ka kʼa kwʼef uku le tef iñmi todabu kʼa afe̩do̩ amo̩maye. E̩ne̩ ki ma chʼe̩nufe̩do̩ n gugu ef uku ta.

¹⁵ E̩ne̩ du ki chʼachulaka o̩maye-wñ chʼakpone̩, me̩ la chema ka kʼiñmi ogbegbele̩ gugu ef akpone̩ du n.

¹⁶ Ef e-le̩ oñ a fʼufe̩do̩ ma, owñ chʼabu kʼe̩ne̩ le̩ mʼoji-wñ du tinyo̩ tod uwa; o̩me̩ la dʼawa o̩la kʼa ki dʼoji e-wa tinyo̩ tod amo̩maye.

¹⁷ E̩ne̩ du ki muda nʼe̩wñ udiñmino e-ile̩-i kʼi la ali ka kʼeku e̩wñ aku o̩maye-wñ, kʼi la fejukpʼo̩ bo, abʼufe̩do̩ O̩jo̩ de̩ ef e̩ne̩ le̩ ta?

¹⁸ Amo̩ma-mi, awa ki nʼuko̩lo̩ kpʼukpalu ofofo fe̩do̩ n, chai uko̩lo̩ kpʼochochi.

¹⁹ Ef e-le̩ oñ a ama ka kʼochochi chʼe̩te̩-wa, oñ a aje̩ ñw e̩do̩-wa chʼokpoko o̩gba-wñ

²⁰ todu, iche̩wñ kʼe̩do̩-wa adʼo̩la gwunyʼuwa mak O̩jo̩ tʼe̩do̩-wa le, i la chema e̩wñ du.

²¹ Ame̩nufe̩do̩, iche̩wñ kʼe̩do̩-wa ma dʼo̩la gwunyʼuwa n, mak a nʼeju e̩gbo ugbo O̩jo̩;

²² oñ e̩wñ du kʼa abiʼu a agba ugbo-wñ, todabu kʼa ade uko̩-wñ, kʼa la ache e̩wñ ki rʼowñ eju.

²³ E̩wñ ki la chʼuko̩-wñ le̩ de̩, kakini, Todu kʼa ki ke̩do̩nʼodu O̩ma-wñ Jisus Kraist kʼa la afe̩do̩ omune̩, alu kʼi tʼuko̩ ñw a le̩.

²⁴ Ade uko̩-wñ la gugu ef uwñ, owñ la dʼef e̩ne̩ le̩. Ef e-i oñ a ma ka kʼi gugu ef uwa, owñ chʼef Afu-wñ kʼi du ñw a.