1 Amonu 15 - O̩TAKADA O̩LA O̩JO̩ 1970

Abijam onu Juda

¹ Oñ Abijam chane̩ ejʼonu Juda o̩do̩ e̩ke̩gwe̩jo̩ Je̩ro̩boam, onu, o̩ma Nebat le̩.

² I jʼonu Je̩rusale̩m o̩do̩ me̩ta. Odu iye-wñ la ko̩ Maaka kʼi chʼo̩ma Abishalo̩m.

³ I ño̩ lule̩ ef e̩wñ adure du kʼata-wñ che akwoubi; e̩do̩-wñ la de̩ jalii ugbo Jihofa O̩jo̩-wñ alu kʼe̩do̩ Defid ata-wñ de̩ n.

⁴ I chaka dʼabe̩le̩, todu Defid, Jihofa O̩jo̩-wñ mʼagege du ñw u Je̩rusale̩m, abu kʼi dʼo̩ma-wñ dago ubi-wñ; abe̩le̩ i fu Je̩rusale̩m lonyane̩;

⁵ todu abu ki Defid che e̩wñ o̩kpakpa eju Jihofa kʼi ma la na bʼe̩wñ du kʼi ñwa ñw u te̩ n O̩jo̩ du kʼudeju-wñ kade, chai ugbo o̩la Uraya, e̩ne̩ He̩t le̩, kate.

⁶ Ogu la dago agbagba Reho̩boam kpai Je̩ro̩boam o̩jo̩ kʼudeju-wñ kade.

⁷ Oñ o̩la Abijam ki bo̩ kpai e̩wñ du kʼi che, i che̩ko̩ rʼef o̩takada Iko E̩wñ Amonu Juda n? Ogu ño̩ dago agbagba Abijam kpai Je̩ro̩boam.

⁸ Tak Abijam cholu manyʼamata-wñ. Oñ ma mʼu du ji ewo Defid: oñ Esa, o̩ma-wñ jʼonu koji-wñ.

Esa, onu Juda

⁹ Oñ o̩do̩ Je̩ro̩boam onu Israe̩l e̩kogu Esa chane̩ ejʼonu Juda,

¹⁰ i la jʼonu Je̩rusale̩m o̩do̩ o̩gbo̩ meji nyokeʼka. Odu iye-wñ la ko̩ Maaka, o̩ma Abishalo̩m.

¹¹ Esa la che e̩wñ tʼo̩kpakpa eju Jihofa alu ki Defid ata-wñ che.

¹² I kʼamache̩wñtuñ le̩ bʼojane̩ le̩ te̩, oñ i mʼode du kʼata-wñ che ko rinyo̩.

¹³ Tak i ño̩ bʼiye-wñ Maaka gbʼo̩da iye onu, todabu kʼi fʼojibo ihie̩ne̩ʼka che ñw Ashe̩ra. Esa la fʼe̩wñ ihie̩ne̩-wñ lo̩ wane̩, oñ i fu gujo eti aji Kidro̩n.

¹⁴ Ma muda kʼotete otete kwʼo̩mo̩ n; i chaka dʼabe̩le̩ e̩do̩ Esa chʼo̩jalii ugbo Jihofa o̩jo̩ du kʼudeju-wñ kade.

¹⁵ I la mʼe̩wñ kʼata-wñ che ki fo̩ ko wʼef unyi Jihofa kpai e̩wñ kʼowñ onugo che ki fo̩, ajifa kpai o̩jamalia kpai e̩wñ eku.

Ogu kʼEsa kpai Beasha ja

¹⁶ Ogu laño̩ dago agbagba Esa kpai Beasha, onu Israe̩l o̩jo̩ du kʼudeju-ma kade.

¹⁷ Beasha onu Israe̩l kobo̩ Juda, kʼi la fu Rama ko̩, kʼi che kʼi je̩ ñw e̩ne̩ du we edufu kpai egudu nyʼugbo Esa onu Juda.

¹⁸ Tak Esa mʼajifa kpʼo̩jamalia du ki bo̩ ef e̩wñ akoko ef unyi Jihofa ko, kpai e̩wñ akoko unyi onu, oñ i mʼu ko nyʼabimo̩to̩-wñ o̩wo; tak Esa onu fʼuma kpe̩ru Be̩n-hedad, o̩ma Tabrimo̩n, o̩ma He̩zio̩n, onu Siria, kʼi dodo Damaskus, kakini,

¹⁹ Omi kpʼuwe̩ ki kpʼalo alu kʼata-mi kpʼata-we̩ che: go, e̩wñ ele ajifa kpʼo̩jamalia oñ u ko̩ kpuche̩ rʼe̩ le̩; lo, kʼe̩ fʼalo-we̩ kpai Beasha, onu Israe̩l bie̩, kʼi te̩ wʼubi bʼumi te̩.

²⁰ Taku Be̩n-hedad netirʼEsa onu, oñ i je̩ ñw amonu ogu-wñ kobo̩ ewo ewo Israe̩l. I la fʼIjo̩n kpai Dan kpai Abe̩l-be̩t-maaka kpai Chine̩re̩t manyʼane̩ Naftali chaka du.

²¹ Oñ i lewatu e̩gba ki Beasha gbo̩ inabali-wñ, i tʼewo Rama eko̩ no̩, oñ i kwogugu Tirza.

²² Tak onu Esa fʼakoya ta ñw abo Juda chaka, e̩ne̩ du bo̩ tʼane̩ n; taku ma mʼokuta Rama ko kpʼigboli-wñ chaka, owñ chʼe-ku Beasha ne̩ ko̩. Tak Esa onu mʼe-le̩ ko ko̩ Geba e-Be̩njamin kpai Mizpa.

²³ Oñ o̩la Esa du ki bo̩ kpai ugbiti-wñ, kpai e̩wñ du kʼi che, kpai ewo ewo kʼi ko̩, i che̩ko̩ rʼef o̩takada Iko E̩wñ Amonu Juda n? O̩ga la fʼe̩ e̩re̩ mu o̩jo̩ ogijo-wñ.

²⁴ Tak Esa cholu manyʼamata-wñ, oñ ma mʼu du ji ugbo amata-wñ, ewo Defid ata-wñ; taku Jiho̩shafat, o̩ma-wñ, jʼonu koji-wñ.

Nedab chʼonu Israe̩l

²⁵ Nedab, o̩ma Je̩ro̩boam la chane̩ ejʼonu Israe̩l o̩do̩ ekeji kʼEsa jʼonu Juda; oñ i fʼonu Israe̩l je̩ o̩do̩ meji.

²⁶ Owñ le̩ ño̩ fʼe̩wñ ki bie̩ne̩ che eju Jihofa, i la lule̩ lʼikpa ata-wñ, kpai ef adure-wñ e-ki je̩ ñw abo Israe̩l dure.

Beasha koji Nedab

²⁷ Taku Beasha, o̩ma Ahija kʼi chʼabo unyi Isakar, dʼalu nyʼu. Oñ Beasha fʼowñ kpa Gibe̩to̩n; abo Filistia ne̩ omo̩; todu Nedab kpʼabo Israe̩l chaka jʼakpala nyu Gibe̩ton.

²⁸ O̩do̩ e̩ke̩ta kʼEsa jʼonu Juda oñ Beasha du Nedab kpa, tak i jʼonu koji-wñ.

²⁹ Oñ ilewatu, e̩re̩re̩ kʼi jʼonu le̩, i fʼabo unyi Je̩ro̩bo̩am du kpa rinyo̩. I tʼe̩ne̩ kate ki añmʼiñmi no̩ ñwu Je̩ro̩bo̩am in, gbogbo tak i fʼowñ kpa likii; teju alu kʼo̩la ki Jihofa ka le̩ de̩, owñ chʼe-kʼi ka lʼalu adu-wñ Ahija, e̩ne̩ Shilo̩n le̩.

³⁰ Todu adure adure Je̩ro̩bo̩am kʼi che, kpai e-ki je̩ ñw abo Israe̩l dure, todu ki bi Jihofa, O̩jo̩ Israe̩l, eju.

³¹ O̩la Nedab ki bo̩ kpʼe̩wñ du kʼi che, i chʼeko̩ rʼef o̩takada Iko E̩wñ Amonu Israe̩l le̩ n?

³² Ogu la dʼagbagba Esa kpai Beasha, onu Israe̩l, o̩jo̩ du kʼudeju-ma kade.

³³ O̩do̩ e̩ke̩ta kʼEsa jʼonu Juda, Beasha, o̩ma Ahija, chane̩ ejʼonu abo Israe̩l chaka Tirza. I je̩ o̩do̩ ogu nyoke me̩le̩.

³⁴ I ño̩ fʼe̩wñ ki bie̩ne̩ eju Jihofa che. I la lule̩ lʼikpa Je̩ro̩boam kpai ef adure-wñ e-kʼi ne̩ je̩ ñw abo Israe̩l dure ge̩.