Tito 2 - Táurinakene máechejiriruwa’i ema Viya tikaijare

Eta yátupikene vímiturapiana

¹ Pítisera Tito pímiturekaya tamutu eta yatupikeneana.

² Ena tikawakureanayare naye'e ena vichamuriana takamunu'i yatupina naitaucha eta nawakureana, tawara'aware nakaratakawa yatupina taye'e eta najamuraiwana, tauri eta napanereruina eta naichirayare eta nawara'akeneana. Taurina eta nakasiñawairaina me Viya, eta naemunaraiwaina etapa eta narata'airayare eta nakatajiwairayare.

³ Énerichuware ena vénara'ana ichanaruana, pímitukayarewa ena tauri eta náitaresiraina taicha ena, tuparairukana'iware maye'e ema Viya, waipa técheji'ianaima'i, wá'iware takuwayuaka eta térakare. Naimereka yatupina eta náuriwaina naye'e ena amaperuanacha'a esenachichana

⁴ náimitukayarewa ena amaperuana esenana náemunasiraina ena náimanaveana énapa ena nachichanaveana,

⁵ náitusirayarewa tipanererekana, napikaucha ena náimanaveana. Nasuapajira'iware naye'e. Napikauchakare nakaenakare te napenana, náitusiraina náechapajirika eta nayereruwana. Náuriwaina ena, apaesa takuija náechejisiakarewaina taye'e eta náe'isira'i eta máechejiriruwa ema Viya.

⁶ Éneichuware pechejirikawaka ena amaperuana ajairana, yátupina eta náitusiraina tipanererekana

⁷ Tamutu eta juka, pinakipairuyare píti eta piúriwaina, apaesa étaina náe'ika ena vichamuriana eta piúriwa'i píti. Etanaichu eta pímiturapiya, wa'i pi'apapikaima'i eta pímitukasiwa'i. Wá'iware pikuitsiwacha. Tapikauchakare eta pímituresiraya,

⁸ táuri eta pímive'apisirayare eta jákani péchejirisirawanaya, apaesa takuija nakuviyawa eta nakaeka'iravina ena piánarana'i, titsiri'avianayarechucha táicha.

⁹ Pechejirikayare ena músuana eta nasuapajiraiwaina naye'e ena nákenuana. Náitaucha támutu jákani nawara'akeneana ena nákenuana. Wa'i nakujikapajirika'i taye'e eta wanairipiana.

¹⁰ Wá'iware nakuavijaka eta nakaye'ekeneana ena nákenuana. Yátupina eta nakasiñakarewaina taye'e tamutu eta natupara'ana'i. Náimereka yátupina eta náuriwaina apaesa tajamurachakare eta vé'iru'i, étaichu'i eta vímiturapiana maye'e ema Makatiura'ikene'i Viya.

¹¹ Ema Viya, japanu'avi'i vimutu viti achaneana. Eta taka'e, máimitesina'avi'i puiti ema Machicha eta makuchukuira'aviya.

¹² Puiti ema Viya mawara'a eta táuri eta vítaresiraina te juka apake'e. Mawara'a yátupina eta vítusiraina vipanerereka, étapa eta vítauraiwaina tamutu naye'e ena achaneana, étapa eta vítauraiwaina maye'e ema Viya. Waipa víchaima'i eta tájiparakana tamaurikeneana'i. Wáipaware víchaima'i eta tajamurachakeneana eta viáke'e,

¹³ Tási'a, vikunewainapa eta machavirayare ema Viákenu Jesucristo, ema Makatiura'ikene'i viye'e. Eta máitesiraya mámayarepa'i eta tapachinakene majaraiwa.

¹⁴ Ema, máepenina'avi'i, mawaraira'i makaichepaikaya tamutu eta víchira'i eta tamaurikeneana'i. Máepachinachayare tamutu eta tamaeperajiwana eta viáchanewana. Taicha mawara'a'i machanerakene'aviyare. Taka'e, puiti vichaya eta táurikeneana.

¹⁵ Tiuri, pímitukayare eta nutupararuviana'i, pechejikawakaya ena achaneana. Tijurikati natiari'i nawara'a téjekapawana, pétumechawaya eta pímitusira, taicha eta pituparakasiwa'i. Apaesa námutu napikauchavi, wá'iware nakuepuru eta pitupara'a'i.