San Mateo 7 - Táurinakene máechejiriruwa’i ema Viya tikaijare

Wa'i ekunema'i eta náejekapirawana ena achaneana

¹ “Wa'i ekunema'i eta náejekapirawana ena apamuriana, machu étaina táimikuñaka'e eti me Viya.

² Taka'e ema Viya, kune'eyare eta éjekapirawana eti, takuti'i eti, ekune'i eta naejekapirawana ena apamuriana, éneichuware ema Viya maimichawayare eta eye'e eti eta íkutiriki'i.

³ ¿Taja'a takayema pikune eta ánichichakeneana máejekapirawana'i ema piparape, tási'a piti wa'i pipanerecha'ini eta táichapewa eta péjekapirawana?

⁴ Tási'a piti te tatiari'ipuka eta pejekapirawa'i, ¿waipaine'i taurikaima'i picha'ini ema piparaepiya: ‘Nuvinavi eta pisureru te piuki'a’?

⁵ ¡Apimira!, tatiwanuma pive'a eta pisureru te piuki'a, tási'a pimairikainapa tiuri, tási'a pive'asarenapa eta masureru te mauki'a ema pipareapiya.

⁶ “Wa'i ekuijaraka eta Takapika'ukene eta tamukuana, machu tachawaucha'e etaina taemechareka'e. Wá'iware ekuijaraka eta taurinakene perla eta kuchiana, machu etaina takatayayajika.

Viyaseaka, vitanuka tási'a vichu'a eta tapaja

⁷ “Eyaseaka ema Viya ema tijaraka'eya, échejika ema Viya, ema íchimawaya eta ekamunukeneana; íchu'a tási'a ema tisáma'eya,

⁸ Taicha mákani tiyasesereka, majachapayare; ema titanureka maichimawayare eta matanure, tási'a mákani techejika te tapaja, navejiaikene'aya.

⁹ “¿Eti'ipa epatsikawa'ipukaini íjaraka'ini nanika eta marija'i ena echichanaveana, te nayaseaka'epuka eta pan?

¹⁰ ¿Étaipa te nayaseaka'epuka eta jima, íjaraka'pukaini eta pachepare nanika'ini?

¹¹ Etiripa murakasamure'e'ineni, ituka'i ijaraka ena echichanaveana eta jákani tiurinana nayasearapiana'i, ¡mavetijicha ema Tata Vikaiyakene tiávi'a'i te anuma, ema tíjaraka'eyare'i tamutu eta táurikeneana eyasearuanayare'i!

¹² “Eta taka'e, iúriyare eti naye'e ena apamuriana achaneana, te ewara'apuka nauri eye'e eti, taicha eta taka'e'i eta táimiturapi eta Takapika'ukene Ajureka.

Jarari'i eta apina achene

¹³ “Esiapa taye'e eta tapaja ánikuchichapana. Taicha eta tapaja, tási'a étapa eta ichape achene, kamurianayare ena tisianapa taye'e eta,

¹⁴ Étasera eta achene ánikuchichaichu, tási'a tikajera eta tikaiju'e eta vítaresira, tájina ekuñarakina. Wá'isera kamurianaina ena té'ikana taye'e eta.

Ena achaneana taimikaecherachaya eta naichakeneana

¹⁵ “Échapawayare taye'e eta náimiturapiana ena tépiya'ira'iana tímijachawana machanerana ema Viya. Tépiyakawanapa'i tiúriana takuti'i eta tamansuwa eta uvesa. Té'esera te nasamureana, tétavikawa'i eta nawínarajiwa, nakuti'i eta ichini.

¹⁶ Eti ímatiakawaka'isera ena táichavene eta náichakeneana, taicha wa'i virerekaima'i eta ta'i eta surupia'i te taenaki eta sitavere, tási'a eta ijíkaki wáipaine'iware taka'ima'i eta kachicheru'iana.

¹⁷ Takutikene, tímatikare'i eta ta'i eta yukuki tiúrinisi, tímatikare'iware eta ta'i yukuki máurinisira'ana.

¹⁸ Eta yukuki tiúrinisi'i eta ta'i, wa'i témuna'irikawaima'i wa'i takurinisi'ini eta ta'i. Étaipa eta máurinisira'ana, wá'iware témuna'irikawaima'i tiúrinisi eta tá'i.

¹⁹ Tamutu eta yukukiana máurinisira'ana tikaechuyare'i, tíjuyarepa te yuku.

²⁰ Eta taka'e eti, ímatiwakayare eta náichakeneana.

Te visiapa te mawasa ema Viya Akénuka te anuma

²¹ “Wa'i namutuima'i ena tichanuana'i: ‘Tata, Tata’, tisiapanaima'i te nawasa ema Viya akenuka te anuma, nakarichuya ena yatupikeneana'i naitaucha'i eta mawara'akeneana ema Tata Nukaiyakene tikawasa te anuma.

²² Te táitekapapa eta sache, kamurianayare ena tíchanuanayare: ‘Tata, Tata, víti véchejisi'aparaka'i eta píjare, vipiarakavi'i te píjare eta viákijisira'i ena éreana, té'eware te píjare vímereka'i eta tiáramikareana.’

²³ Tási'asera nujikapa'einapa: ‘Wa'i nímati'e, ¡évuisi'a te numira'u eti maurira'ana!’

Ena tisuapajira'iana, énapa ena masuapajiraira'ana

²⁴ “Eta taka'e, mákani tisamanuyare, tási'a maichayare eta nuwaneruyare, makutiyare ema achane tisuapajira'i, maepiyaka'i eta mapena tiusiapira eta maicha.

²⁵ Jé'esareine'i, jarajapapa eta muraka tékatikawa, tiámaki'apa'i eta tikiwa, tisiamapa eta une, wáipasera takayayaka'ini eta peti, taicha tiúsiapirawaka'i eta tachaparakiana.

²⁶ Émasera ema tisamanu'i, tási'a wa'i naicha'ini eta nuwanairipiana'i, ena nakuti'i ena máitukara'ana tépiyarekana eta peti wa'i manakaima'i eta túmeana yukuki, wá'iware táusiapirawaka'ini máicha.

²⁷ Te járajapapa eta muraka tékatikawa, tiámaki'a tikiwa, tisiamapa eta une, tiákipaikawapa eta peti. ¡Tamutupa témitiekene'a!”

²⁸ Te títapirikapa ema Jesús eta máechejisira'i ena achaneana, ichapeine'i eta náramira'i eta máimiturapiana.

²⁹ Taicha eta máechejisira'i wa'i nasamasaréna'ini, tétavikawa'i eta máitusira'i mayunapaika'i tamutu. Wa'i makuti'ini ena escriwánuana.