San Mateo 4 - Táurinakene máechejiriruwa’i ema Viya tikaijare

Ema wínaraji makaitsamaraji ema Jesús

¹ Tási'a, ema Machanewa Viya, mámapa ema Jesús te máwapa'i wama'i, apaesa ánaki makaitsamaraji ema wínaraji.

² Tíjimapa ema Jesús, cuarenta sache, kuarentaware yati, eta mayerewa'i masamapa eta máekuawa'i.

³ Emasera, ema wínaraji témeña'awapa maye'e ema Jesús, mawara'apa makaetemayare'i, ánipa máicha: –Te yatupinapuka machichavi ema Viya, piwaneka eta juka máriana táepiyakawa eta pan.

⁴ Emasera ema Jesús majikapapa: –Eta Takapika'ukene Ajureka, ani taka'e: ‘Wa'i tákarichuima'i eta tinikakare takaitarekayare ena achaneana, eneichuware tamutu jakani máechejiriruwa taisi'akene te majaka ema Viya.’

⁵ Tási'a, ema wínaraji mámawarepa ánaki te takapika'ukene awasare Jerusalén, máimiapanapa te táina'u eta templo

⁶ tási'a, máichawarepa: –Te yátupina machichavina ema Viya, pémirika te anuke'e. Péchaichu'i eta táechejiriruwa eta Ajureka ani taka'e'i: ‘Ema Viya mawanekayare ena maye'eana ángeleana téchapajirikavianayare. Taicha ena tikaratakavianaya te nawa'uana, apaesa wa'i pikukayutetu te máriana eta pipaisirayare.’

⁷ Ema Jesús májikapawarepa: –Éneichuware taka'e'i eta Takapika'ukene Ajureka: ‘Wa'i pikaitsamarajima'i ema Tata Viya, taicha Piákenu'i ema.’

⁸ Taka'e, ema wínaraji mámawarepa te táina'u eta anuke'e mari, máimechawarepa tamutu eta ichapekeneana awasareana te juka apake'e, máimechawarepa eta ichapekeneana náima'akeneana ena achaneana,

⁹ máichawarepa: –Nuti níjarakaviyare tamutu eta juka, pépuyumirauchanusera te numira'u pitsiukanu.

¹⁰ Ema Jesús majikapapa: –Péwisi'a piti Wínaraji te juka numira'u, taicha eta táechejiriruwa'i eta Takapika'ukene Ajureka ani taka'e: ‘Makarichu ema Viya vépuyumirauchaya, makarichuware vikaemataneakayare.’

¹¹ Taka'e, ema Wínaraji térajikawapa, tási'a tiúkupaikanapa ena ángeleana, náechapajirikapa ema Jesús.

Ema Jesús tépanawapa tikametarairu

¹² Taka'e ema Jesús, eta masamairisiraipa eta makaerataira'i ema Juan, tiyanapa tichawa te máwasa Nazaret te Galilea.

¹³ Wáipasera mánasi'ini te Nazaret, tiyanapa taye'e eta awasare Cafarnaúm, eta juka awasare te tachausi eta kákiure tinapaika tejena apake'e tikaijare Zabulón étapa Neftalí.

¹⁴ Taka'e titauchawapa eta maechejiriruwa ema Viya taye'e eta majure'i ema profeta Isaías:

¹⁵ “Pisama piti apake'e Zabulón pitipa Neftalí, ánaki te apachara Jordán, te tachausi eta kákiure: Ánaki te nawasa ena apawasana.

¹⁶ Eta awasare eta taitaresira tiavi'aini'i te timapiku puiti sera náima'apa eta jara'i, eta tamika'u tijara'iya naye'eyare ena tiavi'a'naini te timapiku enapa ena kauyayakare eta naitaresira.”

¹⁷ Taka'e ema Jesús tepanawapa kametarairu: “Eta mawasa ema Viya akenuka te anuma tiane'ipa titekapaucha'e eta eye'e.”

Ema Jesús máichu'apa ena panakeneana ténikara'iana

¹⁸ Taka'e, eta mapaisirapa'i ema Jesús te tachausi eta Kákiure te Galilea, máima'awakapa ena apinana kaparapekakana: Ema émana tikaijare'i Simón Pedro émapa ema Andrés. Eta náematanerepi ena titukawara'iana eta jima, nákijiereka'i eta naye'e yuta'e te une.

¹⁹ Ema Jesús máichawakapa: –Yare, é'ikanu, núti níjaraka'eyare apana ématanerepiyare, eti ítukawaparaka'i eta jima, taka'eyare eta itusirawayare ena achaneana.

²⁰ Enewanepa náinajikapa ena eta náenisira'i, tiyananapa náe'ikapa ema Jesús.

²¹ Ánakipanawarepa máima'awarepa ema Jesús ena apinana tikaparapekakana, ema Santiago émapa Juan téjakana'i te napakure, emapa ema naiya Zebedeo, náititijirika'i eta nayuta'e. Ema Jesús máichu'awapa,

²² Taka'e ema Jesús máichu'awarepa ena apinana, tási'a náe'ikapa, najunijikapa ema naiya.

Ema Jesús máimitukawakapa ena kamurikeneana achaneana

²³ Eta mapaisirapa'i ema Jesús taye'e eta awasareana te Galilea, tikametarairupaipa eta te petiana náurujisirarewa ena juriyuana. Maechejisi'a'i eta mawasa ema Viya, éneichuware makanarakaware ena achaneana nakajumakeneana.

²⁴ Nasamairikapa ena achaneana tikawasana'i te tinapaika te Siria, tási'a, námawakapaipa ena nakajumakeneana, apánapanenejikene'i eta najumana, nakatiru'awana'i, énaipa ena náwa'aruana'i ena éreanana, ena tirapapasiana, énapa ena murakaki'ana, namutu ena makanarakawakapa'i ema Jesús.

²⁵ Kamuriana'i ena achaneana tiási'ana'i te Galilea, te Judea, te Jerusalén, te'epa awasareana tinapaika tauchusine eta sache te Decápolis, étapa te apachara eta Jordán.