San Mateo 27 - Táurinakene máechejiriruwa’i ema Viya tikaijare

Námapa ema Jesús te mamira'u ema Pilato

¹ Te tijara'ipa, namutu ena tachutiri'ana ena tiyujarakara'iana, tási'a énapa ena viyakarana naye'e ena juriyuana. Tikaechakasipa eta náimikapasirayare'i ema Jesús.

² Námapa, naitivuchapa, námapa te mamira'u ema Pilato, tuparairuka'i ema taye'e eta roma.

Eta maepenira'i ema Júlasi

³ Ema Júlasi eta máimaira'i eta táichapewa'i eta makatajiwaira'i ema Jesús, étapa eta nakapasirayare'i, ichapeine'i tikatisamurewa'i, taicha eta máejekapirawari'i. Tiyanapa máimichawapana'i eta treinta reale eta plata mawacha'i naye'e ena, tási'a

⁴ máichawakapa: –Néjekapawa'i eta níjararesira'i ema maka achane matapirawarekene. Énasera najikapapa: –Jé'epuka, wa'i vecha víti ¡Péchakenewaichu'i píti!

⁵ Émasera ema Júlasi mákijimirauchawakapa eta plata, te taju'e eta templo, tási'a tiyanapa tichumukawapa.

⁶ Ena tuparairukana nave'apa eta plata tási'a, naka'epa: –Eta juka plata teta'ame'i, taicha eta iti, wa'i taurika'ini vinaka'ini taye'e eta vinakisirarewa.

⁷ Tási'a, eta plata máimichawakene'i ema Júlasi, napanerechapa eta nawacharesirayare'i eta apake'e nakaekarasirareya ena apawasana, eta juka apake'e naseresirare'i ena típuarekara'iana eta yupi.

⁸ Taka'e puiti eta apake'e tikaijare'i ‘Apake'e máitinewacha.’

⁹ Taka'e titauchawapa eta maechejiriruwa'i ema profetaini Jeremías: “Nave'apa eta treinta reale eta plata naimijareru'i ena Israelitana, mawachayare'i ema achane.

¹⁰ Ena nawacharekapa eta apake'e naye'e ena típuarekara'iana, taka'e'i eta juka mawaneirupi'i ema Viya.”

Ema Jesús te mámira'u ema Pilato

¹¹ Ema Jesús námapa te mamira'u ema akenuka, ema mayaserekapa: –¿Jé'esareji Rey-vi'i píti naye'e ena juriyuana? –Pitupiruwa'i eta piyaseresiranu'i, –Majikapapa ema Jesús.

¹² Tási'asera, te nametauchapa ena tachutiri'ana tiyujarakara'iana, wa'i majikapawaka'ini ema Jesús.

¹³ Taka'e, ema Pilato máyaserekapa: –¿Wa'i pisama eta juka nametauchiravi'i, techejisi'aviana'i?

¹⁴ Émasera ema Jesús wá'ikene majikapa'ini, tási'a, ema Pilato máramipa eta mamajikapira'i.

Ema Pilato makawanairipipa eta náetatasiraya ema Jesús

¹⁵ Tatiari'i eta maye'erepi'i ema akenuka te Páskuamu'uana, makaitikayare'i ema émana makaeratakene mákani nayasearuyare'i ena achaneana.

¹⁶ Taka'e matiari'i'i ema achane makaeratakene'i, tikaijare Jesús Barrabás,

¹⁷ eta náurujisirawa'i ena achaneana, ema Pilato mayaserekawakapa: –¿Nája'a ema eyasesereruyare, émapuka ema Barrabás, émapuka ewara'a nukaitika ema Jesús, ema tikaijare Cristo?

¹⁸ Taicha máimatiakaipa'i eta nametauchira'i ema Jesús, taicha ena nakápinaru'i.

¹⁹ Eta máejasira'i ema Pilato te máwakure, esu mayena suímimetarekapa: “Wa'i pikuimisiapawa ñiye'e eñi ñira achane matapiraware, taicha yati tametasiranu'i eta nuwapure eta ñíchararakawayare eñi.”

²⁰ Énasera ena tachutiri'ana ena tiyujarakara'iana, tási'a énapa ena naiyakara'ana náimitumuri'apa ena achaneana nayasesereka'i ema Barrabás, émaina'ini máuchuku'a, tási'a máepena'ini ema Jesús.

²¹ Ema Akénuka, tiapechawawa mayaserekawaka: –¿Nája'asika ema ewara'akene'i nukaitika? Ena naka'epa: –¡Émaina máuchuku'a ema Barrabás!

²² Ema Pilato mayaserekawarepa: –¿Tája'asika nícharakayare ema Jesús, ema tikaijare Cristo? Namutupa najikapapa: –¡Pémetatareka te crusu!

²³ Ema Pilato máichawakapa: –¿Tája'asika eta maviurewa? Énasera tipiararekanawarepa: –¡Pémetatareka te crusu!

²⁴ Taka'e, máima'apa ema Pilato, wa'i máituruka'ini makatiucha'ini. Taka'e, máemepanapa eta une, tikasipawa'upa te namira'u ena achaneana. Tási'a máichawakapa te namira'u: –Wa'i nútiparakaina eta máepeniraya ema maka achane matapiraware'i; eti échinawa.

²⁵ Namutupa ena achaneana najikapapa: –¡Víti naine vecha, énapa ena vichichanaveana eta máepeniraya ema maka achane!

²⁶ Taka'e, ema Pilato nakaitikapa ema Barrabás, taka'e makawanairipipa náestaka ema Jesús, tási'a námayarepa naétatakayarepa te crusu.

²⁷ Ena masuntarurana ema akenuka námapa ema Jesús te palacio, tási'a nakurujikapa namutu ena suntaruana, nachayakapa ema.

²⁸ Navejamu'iakapa eta mamuiri'a, namuriachapa eta muíriare títsime.

²⁹ Tási'a náitsamemakapa eta itapepi majarapiyare'i náicha, nanakapa te machuti, tási'a náimikaratakawarepa eta kurina te mawa'u waure. Eta nakawayuemarajira'i, náepuyumirauchapa. Ánipa naka'e: –¡Píti naye'evi'iji Rey ena juriyuana!

³⁰ Éneichuware, nátutukichapa, tási'a náepuchisikapa te machuti taye'e eta matsukurupa'i.

³¹ Te taekenepa eta nakaeka'ijirisira'i ema, navejamu'iakawarepa eta mamuiri'a títsime, namuiriachapa eta mamuiri'aichu, tási'a námapa eta makaetataiyayare'i.

Náetatakapa ema Jesús te crusu

³² Te tiuchukapa ema ánaki, nákapajikapa ema achane tikaijare Simón, tikawasa'i te Cirene. Napamikapa ema manaraku'a eta macrusura ema Jesús.

³³ Te titekapanapa, taye'e eta tikaijare Gólgota, (eta takayemakene'i, “Tavirare eta náperana ena naépenakeneana”),

³⁴ náesichapa eta vino tikasirikiama eta tajikaneama, émasera ema Jesús te masamaekapa, waipa máwara'a'ini máera'ini.

³⁵ Te náitauchapa eta náetatasira'i, ena suntaruana nasuerte'achapa eta mamuiri'a ema Jesús, eta náijarajirisirakaka'i.

³⁶ Tási'a, najaneakapa ema Jesús ena suntaruana.

³⁷ Tási'a te tápusi eta macrusura, nanakapa eta ajureka táechejisi'a'i eta tiviucha'i eta makaikuñaira'i. Ani taka'e'i: “Ema maka Jesús, Rey naye'e ena juriyuana.”

³⁸ Éneichuware tikaetatana'iware ena apinana tiámera'iana, ema émana te mawaure, ema apana te sapane.

³⁹ Ena tiánukumirauchanapa'i, tépiupiusikawanapaipa eta nakaeka'irapaipa'i

⁴⁰ tási'a ánipa naka'e: –¡Pítitataji Pika'echejiriruwa'i eta piákipaisirayare'íji eta mapena ema Viya, piráta'a'iwareji pímichawa pikatupi'a eta, mapanayareichu sache! ¡Puiti viwara'a víma'a eta pítupajijiasirawa'i, te yátupipuka Machichavi ema Viya piúkupaika te jara crusu!

⁴¹ Éneichuware ena tachutiri'ana naye'e ena yujarakara'iana, nakaeka'ijirikaware, énapa ena escriwánuana, tinunana'i ena náiyakarana náichajirikakapa:

⁴² –Ema máka, makatiuchawaka ena apamuriana achaneana. Tási'a puiti wá'iware márata'a'ini émajiwaina'ini makatiuchawa'ini. Te yátupina Rey viye'e viti israelítana: ¡makatiuchawaipa, máukupaikapa te jara crusu, visuapasarepaini ema!

⁴³ Té'eware te yátupi'ipuka tikasiñawa'i me Viya: ¡viwara'a víma'a makuchuku'a ema puítinaichu, te yátupi'ipuka máemunaka'i ema! ¿Taicha maka'e'i eta máechejiriruwa'i eta Machichaira'i ema Viya?

⁴⁴ Ena tiámera'iana tikaetatana'iware te machakaya, éneichuware nakaeka'i'iware ena apanaware.

Eta máepenira'i ema Jesús

⁴⁵ Tepanawapa, te tupiriku'apa eta sache tási'a ticheku'a te las trespa kapere'i, timapikupa tamutu eta apake'e.

⁴⁶ Etaichu'i eta jena ura, tipiarakapa muraka ema Jesús: “Elí, Elí, ¿lemá sabactani?” (Te véchejiriruwa, ani taka'e: “Tata Nukaiyakene, Tata Nukaiyakene, ¿taja'a takayema pijunijikanu'i?”)

⁴⁷ Taka'e, ena natiari'ikeneana'i ena tisamana'i, ániwarepa naka'e: –Ema maka mapiaraka'i ema profeta Elías.

⁴⁸ Énewanepa ema apana tiyanapa máepanapa'i eta kajareji, maetamukapa te tisisika vino. Máitiakapa te kurinaki tási'a máimikapayakapa te majaka, apaesa machuchujikayare'i eta.

⁴⁹ Énasera ena apamuriana, naka'emuripa: –Pésamirika, víma'ayare te títekapayarepuka ema Elías makatiuchapanayare.

⁵⁰ Ema Jesús tiápechawawarepa tipiarareka'i muraka, tási'a tépenapa.

⁵¹ Taka'e énewanepa tétsayumeka'i eta cortina taye'e eta mapena ema Viya, tepanawa te anuke'e, tícheku'a te apake'e. Tiyayakarepa eta apake'e. Étaipa eta ichapepu'ikeneana mari téjepuichawakapa.

⁵² Étaipa eta ekariana téjiakawakapa. Téchepukanawarepa ena náepenakeneana ena tisuapajira'iana'i maye'e ema Viya.

⁵³ Tási'a, te mapanakenepa sache, té'eware te táekenepa eta máechepusira'i ema Jesús te máekari, ena apanaware tiúchukanapa taye'e eta náekariana. Tási'a, tisiapanapa taye'e eta awasare Jerusalén, tichawanapa te napenana, ichapemuriana'i ena achaneana tíma'ana'i éna.

⁵⁴ Taka'e, ena tijanearekana'i, émapa ema kapita, te náima'apa eta tayayakarewa'i eta apake'e, étapa eta apamuriana tiáramikareana'i, ichapeine'i eta napisira'i, tási'a naka'epa: –¡Yátupikeneichuyapa ema maka achane, Machicha'i ema Viya!

⁵⁵ Natiari'iware ena kamuriana ena esenana, nayerere'i'i eta naimararasira'i, ena nani, ena té'ikana'i ema Jesús, téchapajirikanapa'i eta mapaisirapa'i te mási'apa te Galilea.

⁵⁶ Sutiari'i esu María Magdalena, esu apana María maena ema Santiago émapa José, sutiari'iware esu mayena ema Zebedeo.

Ema Jesús, tikaekarasipa

⁵⁷ Te kapere'ipa, ema achane riku tikaijare José, tikawasa'i te awasare Arimatea, émaichu'i té'ika'i ema Jesús.

⁵⁸ Taka'e ema José tiyanapa máima'apana ema Pilato, tási'a mayaseakapa eta máke'e ema Jesús. Taka'e, ema Pilato makawanairipipa náisapa'ini eta náekarairaya,

⁵⁹ tási'a ema José makukupaikapa eta máke'e ema Jesús taye'e eta crusu, máyuruakapa te tijapukene sáwana

⁶⁰ tási'a manakapa te máekari, arairuicha'a'i eta máemepiyaresira'i eta ekari, maye'erichu'i ema José. Te tamutupa maji'achapa eta tajitakarekene márime, te máitauchapa, tiyananapa.

⁶¹ Esu María Magdalena, ésupa esu apana María, téjakana'i ena, náimararaka'i eta ekari.

Ena suntaruana najaneaka eta ekari

⁶² Tási'a, te apanapa sache sawaru'i tiyananawarepa ena tuparairukana maye'e ema Pilato,

⁶³ Ánipa naka'e: –Tata, vechapa eta máechejiriruwa'i ema maena tepiya'ira'i Jesús, te achaneicha'a maka'e'i eta máechepusirayare'i te máekari te mapanakenénapa sache.

⁶⁴ Puiti, viwara'a'i pikawanairipi náerataka'ini muraka eta tapaja eta máekari, mapanainaware sache eta najaneasiraina ena suntaruana. Machu nayana te yati námechapana eta máke'e ena máimitureana. Machu náka'eriana, téchepukaipa te máekari, tási'a, ena achaneana nasuapainapapuka, náimijachainapa yátupi.

⁶⁵ Ema Pilato máichawakapa: –Tiuri, iámayare ena nusuntarurana. Eyana ejaneakakenéna. Nachujichakenena muraka eta máekari.

⁶⁶ Taka'e, tiyananapa nachujichapa muraka eta ekari, nanakapa eta táikutiaranayare'i. Tási'a, najaneaka'i ena suntaruana.