San Mateo 25 - Táurinakene máechejiriruwa’i ema Viya tikaijare

Máimikutichina ena diéskeneana esenachichana

¹ “Eta mawasa ema Viya Akénuka te anuma takutiyare te tive'akakanayare: ena diéskeneana esenachichana amaperuana tikuchapana'i ena arayena, nákapirayare te nasamapa eta máitekapiraya. Tiámauchawanapaipa eta namika'uana lámparinana nakuchapi'aya ema arayena.

² Ena sínkukeneana, téchemara'iana'i. Ena apamuriana sínkukeneana'iware máecharaireana.

³ Ena sinkukeneana'i mapanererura'ana, wa'i námauchawapa'ini eta apana na'aceiteyare'i

⁴ Énasera ena sinkukeneana'i techemara'iana, tiamauchawanapa'i eta na'aceite.

⁵ Taka'e, wa'i máitekapawane'ini ema araimayare'i. Nawara'aipa tímakana ena, tímakanapa, tave'apa eta ichapu, tímakanapa.

⁶ Taka'e, te enumu'upa yati nasamapa ena tipiaraka'i: ‘¡Márajapa ema araimaya! ¡Yare iákapa!’

⁷ Téchepukanapa namutu ena esenachichana, náetupirikapa eta namika'uana.

⁸ Taka'e, ena sínkukeneana mapanererura'ana náichapa ena sinkukeneana techemara'iana: ‘Ekatajika'avi ekaji'avi eta eye'e aceite, taicha tiájikuwakaipa'i eta juka vimíka'uana, véma'aekene'aipa.’

⁹ Énasera ena sínkukeneana techemara'iana najikapapa: ‘Wa'i, machu véchuriaka víti apanawa, túripana eyana ewachareka eta e'aceitena.’

¹⁰ Taka'e, tiyananapa tiwacharepanana eta aceite. Eta nayerewa'i, títekapanecha ema araima, náe'ikapa ena sinkuana esenana natserereruwana'i te tavi'ayare'i eta piesta. Taka'e, tikaeratapa eta tapaja.

¹¹ Te taekenepa, títekapanapa ena apamuriana esenachichana, naka'e'i: ‘¡Tata, tata, pivejiekene'a'avi!’

¹² Émasera ema majikapawakapa: ‘Nutupiruwa nícha'e, wa'i nímati'e.’

¹³ Eta taka'e ekuneuchawa etsekawa'i eti –tási'a maka'ewarepa ema Jesús–, taicha wa'i echa taja'apuka jákani sacheyare eta nuchavirayare núti Manerejirunu'i ema Viya.

Máimikutichinawaka ena achaneana tikaijarakasiana'i eta maplatane ema achane riku

¹⁴ “Eta visiapiraya te mawasa anuma ema Viya, takutiyare mákani achane riku, tiyanayare'i te apana awasare, máichu'awakapa ena mamusurana, máijarakawakapa eta plata.

¹⁵ Ema émana máijarakapa cinco mil. Ema apana máijarakapa apina millone. Ema apana máijarakapa étana millone. Taka'e, ema riku tiyanapa te makaiju'eyare'i.

¹⁶ Taka'e, ema tijakapa'i eta cinco mil, makaemataneakapa eta plata. Makaejapakapa eta apanaware sinku mil.

¹⁷ Ema apana, tijakapa'i eta apina mil, éneichuware makaejapakapa eta plata. Apinaware mil eta plata.

¹⁸ Ema tijakapa'i eta mil, waipa makaejapaka'ini eta. Máekarapa eta plata, eta mapisira'i makaete'a'ini.

¹⁹ “Te tichawapa ema náeja'aru, mayaseakawakapa eta máijararuana'i ema, naye'e ena mamusurana.

²⁰ Tínapukapa ema tijakapa'i eta cinco mil. Máijarakapa ema mákenu eta máiturewa'i, máichawarepa: ‘Tata, píti píjarakanu'i cinco mil. Júka'isera cinco mil-ware eta táejapasira'i.’

²¹ Ema náeja'aru máichapa: ‘Tiuri, tájina táichawa tétavikawa eta piúriwa piti numusura. Puiti nutuparakavinapa eta kamurikene, pisiapa eta nuye'e, piúrisamurerekawainapa.’

²² Tási'a, títekapawarepa ema apana mamusura, ema tijakapa'i eta apina millone eta plata, tási'a máichapa: ‘Tata, júka'i eta apina millone eta plata píjararunu'i, júka'iware eta apinaware millone eta táejapasira'i.’

²³ Ema maeja'aru máichawarepa: ‘Tiuri, tétavikawa eta piúriwa píti apana. Pisiapainapa eta nuye'e, piurisamurerekainapa.’

²⁴ “Tási'a tímerekawaware ema apana mamusura, ema tijakapa'i eta étana mil eta plata, máichapa ema maeja'aru: ‘Tata, núti necha'i eta pimajapanuraiwa'i, piverejikanuyare'i eta táejapasirayare'i eta piplatane. Píta'akanuyare'iwa eta nématanewacha.

²⁵ Eta taka'e nupika'i eta nákaete'a'ini, nékarapa eta piplatane. Puiti júka'i nímichawa, taicha piye'eichu'i eta plata.’

²⁶ Ema maeja'aru majikapapa: ‘Piti musu, tétavikawa eta piplujuwa'i tímikaecherachavi'i. Te pímatinu'ipuka eta numajapanuraiwa'i, níta'ara'i eta apaematanewacha, té'eware pímijacha'i nuverejikaviyare eta táejapasirayare'i eta nuplatane,

²⁷ wá'iyapa pinakapa'ini te wanku eta nuplatane, puiti étaina'ini tajurusi'a'ini nuve'aipa'ini eta táejapa eta nuchavirapa.’

²⁸ Tási'a, máichawakapa ena natiari'ikeneana'i ánaki: ‘Everejika ema mákatataji eta nuplatane, íjaraka ema tikajuruka'i eta diez mil.

²⁹ Taicha nákani tikajurukana'i kamuri, nujanechinayare eta apana; nákanisera tájinakene'i nakajururéna'ini, nuverejikayare.

³⁰ Émechareka muraka ema maka musu máurira'a. Wa'i ekújapanu, tayanapane máiya'a, tási'a iákijikaya te timapikuju'ekenepana.’

Eta ekuñaraki táikuchi'i eta awasareana

³¹ “Te machawapa ema Machicha ema Ajaira, tachayakayapa'i eta majaraiwa, tási'a énapa namutu ena maye'eana ángeleana, tejakainapa te maejasi'ayare takapika'ukene.

³² Ena achaneana nasia'a'iruana'i te awasareana, tinakamirauchawanainapa te mamira'u, tási'a ema manerejikawakainapa. Kutiyare ema achane tijaneapairika'i eta maima'akeneana, makaerajikawakainapa eta uvesana, taye'e eta chiwana.

³³ Manakainapa eta uvesana te mawaure, eta chiwana te masapane.

³⁴ Tási'a, máichainapa ema Rey ena tiávi'ana'i te nuwaure: ‘Yare eti, iúrikakareana'i, manerejiruana'i ema Tata, níjaraka'enapa eta etupara'ayare, íkuchi'i maye'e ema Viya akane te tépanawainapa eta apake'e.

³⁵ Taicha te néku'apa'i, eti énikanu'i, numaunepa'i, eti íjarakanu'i nera eta une, tájina nítekapi'a'ini te nupaisi'apa'i, eti íjarakanu'i eta nítekapi'ayare'i.

³⁶ Tájina numuiri'ainapa'ini, eti emuriachanu'i, nukajuma'i, eti ípuchanu'i, nukaerata'i te nakaeratairare, eti éjirapananu'i.’

³⁷ Tási'a, ena níchu'akeneana'i tijikapanuanainapa: ‘Tata, ¿tájamu'u víma'avi'i péku'apa'i, viti vénikavipa? ¿Tájamu'u víma'avi'i pimaunepa'i, víti vésichavipa eta une?

³⁸ ¿Tájamu'uware víma'avi'i te pipaisirana tájina pítekapi'a'ini, tási'a víti víjarakavipa eta pítekapi'a'i? ¿Wá'iware víma'avi'ini mamuriarevina'ini, tási'a víti vimuriachavipa?

³⁹ ¿Tájamu'uware pikajuma'i, tási'a víti vípuchapanavipa? ¿Tájamu'uware pikaerata'i, tási'a víti véjirapanavipa?’

⁴⁰ Ema Rey tijikapa'enapa: ‘Nutupiruwa numetaka'e, nútira íjarakanu'i tamutu eta ejapanuraiwa'i, ímikatasirawaka'i ena echamuriana.’

⁴¹ Tási'a ema Rey máichainapa ena tiávi'ana'i te sapane: ‘Évuisi'a te numira'u eti masuapajiraira'ana ekaviurewana'i. Eyana taye'e te yuku, akanewaka'éna eta emuruiraya, máikuchi'i ema wínaraji, tási'a énapa ena majupa'ana maye'eana ángeleana.

⁴² Taicha te néku'apa'i, eti wa'i íjarakanu'ini eta nunika. Numaunepa'i, wá'iware ésichanu'ini eta une,

⁴³ étaipa te nupaisiranapa'i, wá'iware íjarakanu'ini eta nítekapi'a'ini, néchuri'aware eta numuiri'a, wá'iware íjarakanu'ini numuiri'aina'ini, nukajuma'iware te nukaerataiya'i, wá'iware éjirapananu'ini.’

⁴⁴ Taka'e, ena tiyarekanuanainapa: ‘Tata, ¿tájamu'u víma'avi'i péku'apa'i, pimaunepa'i, eta pipaisirakapa'i, mamuriarevi'i, pikajumapa'i, pikaerata'i, eta jákani vimáimikatasiravi'i?’

⁴⁵ Ema Rey májikapawakainapa: ‘Nutupiruwa numetaka'e, eti wa'i ejapanunu'ini, taicha wa'i ájapanuwaka'ini apaesaina'ini ena nani achaneana.’

⁴⁶ Ena naniana tiyananayare taye'e eta ekuñaraki máitawakaka. Tási'a ena matapirawareana'i, máitawakakayare eta náitaresira.”