San Mateo 2 - Táurinakene máechejiriruwa’i ema Viya tikaijare

Náejirapana ema amuya ena reyeana máguana

¹ Eta máuchusine'i ema Jesús te tikaijare Belén, tinapaika te Judea. Te jena añu'i, ema Aluresi ema'i taye'e rey eta Judea. Títekapanapa te Jerusalén ena reyeana máguana, tiási'ana'i te tayere'ikene awasare tinapaika te táuchusine eta sache,

² tási'a nakayasesererupa: –¿Tavi'a mavi'a ema rey-yare'i, naye'e ena israelítana máuchure'i? Taicha víma'a'i eta jarairiki tauchure'i, puiti viteka'i vejirapana.

³ Eta masamira'i ema Aluresi, ichapeine'i eta mapanerékene'aira'i, waipa máurisamure'ini. Ena tikawasana'i te Jerusalén, éneichuware napanerékene'a'i ena.

⁴ Taka'e ema Aluresi máimichu'awakapa namutu ena tuparairukana, énapa ena escriwánuana, mayaserekawakapa távi'a máuchusi'ayare'i ema tikaijareyare Cristo.

⁵ Ena naichapa: –Te Belén te Judea; taicha taka'e'i eta majure ema profetaini:

⁶ ‘Tasi'a piti Belén, tiavi'a te jena apake'e te Judá, Wa'i ichipichuvina'ini taye'e eta apamuriana ichapepanana awasare taye'e eta juka apake'e; taicha tiuchukaya piye'e ema akenukaya ema tinapumirauchaya eta awasare Israel.’

⁷ Taka'e ema Aluresi maichu'apa, majajaikapa naye'e ena titupajijiakawana'i, taka'e maechapa eta jena sache tauchusira'i eta jarairiki.

⁸ Tasi'apa mawanekapa nayana te Belén, tási'a maichawakapa: –Eyana ánaki íma'apana ema amuya, échapana, tási'a te ekainunapa échawapa emétapananupa, nuti apanaware nuyanayare nejirapanayare.

⁹ Taka'e eta nasamira'i ema rey, ena maguana tiyananawarepa. Tási'a, náima'awarepa eta jarairiki náe'irupa'i tiyanapa te namira'u, te etapa titupi'apa te táina'u eta mávi'a'i ema amuya.

¹⁰ Tétavikawa eta náurisamurewa'i ena máguana eta náimaira'i eta jarairiki.

¹¹ Te títekapanapa eta te peti, náima'apa ema amuya esupa esu maena María; tási'a tépuyukanapa natsiukapa ema amuya. Naveku'apa eta námawa'uanapa'i náijarakasichapa eta uru, eta incienso étapa eta táijiyekene perfume.

¹² Te táekenepa eta náejiraira'i ema amuya, tichawanayarepa te náwasa, apánapasera eta achene eta nayani'apa'i, taicha tikametakasianapa te nawapure waipa nakuetawajika te mávi'a'i ema Aluresi.

Náimijunapa ema amuya te Egipto

¹³ Te táekenepa eta nayanira'i ena máguana, tiúkupaikapa ema émana ángele mawaneru'i ema Viya, mametapanayare'i ema José te mawapure, ánipa máicha'i: “Péchepuka José, piyana piama ema amuya, tási'a esupa esu María taye'e eta Egipto. Pinasiyare ánaki tiámainukawa te numetakaviware eta pichavirainapa, taicha ema Aluresi títekayare matanukayare ema amuya, mawaraira'i makapaka.”

¹⁴ Taka'esera ema José téchepukapa, tétupirikawawaneanapa te jena yati, tiyananapa mámapa ema amuya esupa esu maena taye'e eta Egipto,

¹⁵ nanasipa ánaki, tiámainukawa te tépenapa ema Aluresi. Eta juka titauchawapa eta makayemakene'i ema profetaini: “Tejena Egipto nichu'a'i ema nuchicha.”

Ema Aluresi máimikapapajikapa ena amuyanaini

¹⁶ Taka'e, ema Aluresi te masamairikapa eta nánukuiraipa ena máguana, tisemaine'i eta nawayuasira'i máimiwanerekapa nakapapajipana namutu ena amuyana ajairana tiávi'ana'i te Belén énapa ena tiávi'ana'i te tachakayara'ana, ena tikaye'eanaipa apina añu énapa ena náuchusirawana máepanaekene'apa eta táuchusi'a'i eta jarairiki náima'akene'i ena máguana.

¹⁷ Taka'e, eta táitauchirawa'i eta májuchakene'i ema profetaini Jeremías:

¹⁸ “Kaechera'upa eta napiararesira te jena awasare Ramá, ichape eta naiyaira'i. Esu'i esu Raquel, esu suiyaucha'i ema suchicha nájina narata'a'ini nakamatinaka'ini taicha eta nakapapajisira'i ena nachichanaveanaini.”

¹⁹ Te táekenepa eta máepenira'i ema Aluresi, tiápechawawarepa ema ángele máechejika'i ema José te mawapure ánaki te Egipto, ánipa maicha:

²⁰ “Péchepuka, José pive'a ema amuya esupa esu maena, piyana pichawa te piáwasa Israel taicha waipa táeñamawakare. Taicha tépenaipa'i ema tipanereuchaini'i tikapakayare'ini ema amuya.”

²¹ Jé'esareine'i ema José esupa esu María téchepukanapa, tétupirikawanapa tichawanapa te Israel namapaipa ema amuya.

²² Taka'e, masamairikapa ema José eta mavirawaipa'i akenukairaipa ema Arquelao, machicha ema Aluresini. Tipikapa ema José machawa'ini te Belén. Táicha ema ángele mápechaipaware máechejika'i te mawapure eta matupiruyare'i te Nazaret tinapaika te Galilea.

²³ Te títekapanapa ánaki, tiyananapa tikapenana'i te Nasaret. Taka'e titauchawapa eta náechejiriruwana'i ena profetanaini: Ema Jesús eta makaijarerayare'i Nazareno.