San Mateo 12 - Táurinakene máechejiriruwa’i ema Viya tikaijare

Ena máimitureana techatijirika eta jena sawarumu'u

¹ Eta jena sache sáwarumu'u, ema Jesús mapairirimekapa eta isaniti, te tatarakukuji eta sukurekana. Ena máimitureana téku'anapa, tási'a navepuri'apaipa'i étajawapa'i eta trigo nanikapaipa'i eta taki.

² Ena fariséuana te náima'apa, naichapa ema Jesús: –Píma'a ena pímitureana naicha'i eta jakani, puiti jena sache sáwarumu'u wa'i tísapakare naicha.

³ Ema majikapawakapa: –¿Wa'i échejiku'a'ini eti eta máichakene'i ema David, eta mapaisirapa'i téku'apaipa, éneichuwa ena té'ikanapa'i?

⁴ Taka'e tisiapapa te mapena ema Viya, tási'a nanikapa eta paneana takapika'ukene'i maye'e'i ema Viya, wa'i tatupara'aina'ini manika'ini ema énapa ena makachanekeneanapa'i, nanikasare'i ena tiyujarakara'iana.

⁵ ¿Wá'ipuka échejiku'a eta mawanairipi ema víyara'aini Moisés eta naye'e ena tiyujarakara'iana téchapajirikana'i eta templo, ena tájina natapirawaina'ini eta nakaematanera'i te sáwarumu'uana?

⁶ Taka'e puiti numetaka'e marari'i ani, ema kapika'upana'i taye'e eta templo.

⁷ Eti wá'iware ekaikutiara eta juka nechejiriruwana: ‘Eta nuwara'a émunara'i, ímikatara'iyare naye'e ena echamuriana Wa'i nuwara'a ekamawa'u ekapaka eta sarareana.’ Teyatupina'ini akaikutiara'ini wa'i ekukaeteaka'ini ena matapirawareana.

⁸ Tuiri puiti, ema Machicha ema Ajaira, maécha'i eta sache nanarasiraya ena achaneana.

Ema Jesús makanaraka ema achane tépenawa'u te sawarumu'u

⁹ Ema Jesús tiyanapa tisiapawarepa te peti náurujisirarewa ena juriyuana.

¹⁰ Matiari'i'i ema émana achane tépenawa'u'i eta mawa'u, tási'a natanunuirika'i eta tiviuchayare'i ema Jesús, nayaserekapa: –¿Táurikapuka pikanaraka ema makajumakene te sáwarumu'u?

¹¹ Ema Jesús majikapapa: –¿Nájina émanaina achane wa'i makujapanu'ini eta maye'e uvesa, te tiyarakuawa'ipuka te pusu te sache sawarumu'u, maveku'ayare'i?

¹² Taka'e ¡ema achane tiápajukawa'i eta maéñamakarewa'i taye'e eta uvesa! Eta taka'e táurika'i víchayare eta táurinakene, te jena sache sawarumu'u.

¹³ Taka'e, maichapa ema achane: –Pikánukecha eta piwa'u. Ema achane énewanepa makanukecha'i tási'a tinarakapa takutipa eta apana.

¹⁴ Énasera te tiuchukanapa ena fariséuana, tepanawanapa eta napanerechira'i eta nakapasirayare'i ema Jesús.

Ema Jesús tiyanawarepa tipaika'i

¹⁵ Ema Jesús te máechapa tiyanapa. Náe'ikapa ena ichapemurikeneana achaneana, ema Jesús makanarakapaipa ena nakajumakeneana,

¹⁶ Tási'a mawanekapa'i wa'i nakumetajirika, eta émaira'i tikanarakawaka'i.

¹⁷ Eta juka títauchawapa eta máechejiriruwa'i ema Viya, eta maecheisi'akene'i ema profeta Isaías:

¹⁸ “Ema maka wanairuka'i nuye'e, nunerejiru'i núti, tétavikawa'i eta némunasira'i. Ímatiyare ema, taicha máwa'aru'i ema Machanewa Viya, ema tímitukawakayare ena achaneana tamutu awasareana.

¹⁹ Najina makanarajirikaima'i, wa'iware tipiararekaima'i; najinaware nasamaima'i eta ma'u, te calleana.

²⁰ Échapajirika ena tivirajiana, takuti'i eta akutena tevetuki'a nakuti'iware eta mecha tipusisirika, wa'isera tema'aima'i, tiamainukawa te taitekapapa eta nakayesesere'irayare.

²¹ Namutu ena achaneana te apake'e tikunewanayare eta maye'e, nawarairayare máurichayare ema.”

Ema Jesús, émapa ema nákenumuri ena éreanana

²² Namapaipaware maye'e ema Jesús ema émana achane púchuki'i tási'a úpaware, taicha máwa'aru'i ema éreana, ema Jesús makanarakapa, tiúripa téchejika tímairikawarepa.

²³ Namutupa ena, tiyaserejirikakanapa eta naramira'i: “¿Émapachupuka ema maka, Machicha ema David?”

²⁴ Eta nasámira'i eta juka, ena fariséuana naka'epa: “Ema Beelzebú ema nákenumuri'i ena éreanana, éma'i tijaraka'i eta máitupajijiasirawa'i ema maka achane, eta makuchusirawaka'i.”

²⁵ Ema Jesús maecha'i eta napanereru'i, taka'e, máichawakapa: “Nímikutichina'eya, ena machanerana ema akenuka, ena wa'i típutsimuri'akakanaima'i, te tiputsimuri'akakanapa énajikakainapa tiakipaikakana, émaipa mákani achane te kamuriana'i ena machichanaveana, wáipaine'i típutsimuriawanaima'i náe'ajirikaka'ini.

²⁶ Éneware maka'e'i ema Wínaraji, te maiputsika ema apana Wínaraji, ¿timiyanawayarepuka makarataka eta maitupajijiasirawa'i?

²⁷ Eti ímijacha'i núti'ichu'i machamuri'i ema Beelzebú, táichavene'i eta nurata'aira'i nakijikawaka ena éreanana. Te ene taka'e'ini, ¿nája'asika tijarakawaka'i eta naitupaijiasirawa'i ena echanerana eti? Eta taka'e, enaichu'i timereucha'eana'i eta eti éjekapawa'i.

²⁸ Émakene'isera ema Machanewa ema Viya, ema tíjarakanu'i eta juka nurata'aira'i nukuchukawaka ena éreanana. Eta juka étara íkutiaraya eta maitekapiraipa eye'e eti eta mawasa ema Viya Akénuka te anuma.

²⁹ “¿Tája'apuka maicharakawaini eta masiapiraina'ini mákani, te mapena ema achane túmekene'i? Takamunu'i nakaratakanumayare, náitiakanumayare'i ema, jé'esare náituruyechasareyarepa eta máima'akeneana.

³⁰ “Ema wa'i té'ikanu, ema kanarajirikanu, tási'a ema wa'i timikatakanu mama'ini ena apamuriana nae'ikanu'ini timikutijirikawa'i eta makajanereka,

³¹ “Eta taka'e nícha'e, maemetavikaya ema Viya eta napekaturana ena achaneana, tamutu jákani naka'ira'i, te'era te nakaeka'i ema Machanewa Viya, waipaine'i makaepa'aima'i eta napekaturana.

³² Ema Viya maemetavikaya eta maviurewana'i maye'e ema Machicha ema Ajaira, te'esera mákani kaeka'i'i ema Machanewa Viya, waipaine'i makaepa'aima'i eta mapekatura, tájina majapanukarewaima'i puiti juka vítaresiraicha'a, tavetijipa te apana vítaresira.

Eta yukuki timatikare eta táka'ira

³³ “Tímatikare'i eta yukuki, te tiúrinisi'i eta taka'ira. Tímatikare'iware eta yukukiana, máurira'ana eta taka'ira, eta taka'e timatikare'i eta yukuki taichavene eta ta'i.

³⁴ ¡Étisera machichanaveana ema Wínaraji! ¿Waipaine'i ítukaima'i échejisi'a eta táurinakeneana, taicha eti tamaverasiawa'i eta ewínarajiwana? Eta échejiriruwana'i tikaechera'i eta ewínarajiwa te esamureana.

³⁵ Ema achane tiuri, tatupiruwa'i eta máechejisira taicha tiúri'i eta masamure, tási'a mákanisera achane wínaraji, wa'i tiúrima'i eta máechejisira, taicha tawayucha'i eta mawínarajiwa'i ema.

³⁶ Nutupiruwa numetaka'e, te táitekapapa eta sache táitekapirayare eta ekuñaraki, emutu ekayasere'iyare eta échejisi'airana eta tamaeperajikeneana.

³⁷ Étaipa eta pechejiriruwa tiviuchaviyare, té'esera naimikacheracha, wa'i ekaikuñaima'i, wa'iware tiviucha'éma'i.”

Eta ekutiarareya tiaramikareana

³⁸ Enananajiwaka ena fariséuana énapa, ena escriwánuana naichapa ema Jesús: –Tata maestro, viwara'a vima'avi picha'ini eta tiáramikareana.

³⁹ Ema Jesús majikapawakapa: –Ena naka achaneana wínarajikeneana, masuapajiraira'ana tiyaseakanuana'i nicha eta tiáramikareana; wáipasera nijarakaima'i eta tiáramikareana, takarine'i eta máichawakenewa'i ema profetaini Jonás.

⁴⁰ Taicha ema Jonás masiapajuecha'i eta ichapekene jima, mapana sache, mapanaware yati eta mayerewa'i. Ene nuka'eyare núti, Machichanu ema achane, mapanayare sache, mapanaware yati eta nepeniraya.

⁴¹ Eta jena sácheyare téchepumuri'anaya namutu ena achaneana, tiúchuku'anayare ena tikawasanaini'i te Nínive. Natupiruwa'isera nasuapa eta mametaru'i ema Jonás, téñauchawawaneana'i. Taicha ema, máurikenepana'i maye'e ema Jonás.

⁴² Éneichuware esu reina taye'e eta Wana techepukainapa, te taitekapapa eta sacheyare nakaikuñairayare ena achaneana, taicha esu te susamairikapa eta máitupajijiasirawa'i yátupi ema Salomón. Esu tayere'ikene'ineni eta suawasa, tiyana'isera sukapayaka ema, taicha suwara'a'i susamayare'i eta máitupajijiasirawa'i, taicha eta jarari'ikeneana'i ichapepana'i maye'e ema Salomón,

Eta machanewa ema éreana tichawapa

⁴³ “Éneichuware eti ekuti mákani achane máinajiru'i ema machanewa ema éreana. Ema tiyanainapa matanukainapa eta masiapi'ayare'i, eta mamaichimavira'i mapanerechayare'i tichawa:

⁴⁴ ‘Nuchawayare te peti, eta te nuchusine'i.’ Te títekapapa ema éreana maye'e ema achane máwa'aruini'i, te máima'apa makuti'ipa eta peti mawaku takapi'ikene.

⁴⁵ Taka'e tíchuarekapa ena siétekeneana machamuriana wínarajipanana, nasiapa'akainawarepa namutu ena, jé'esare tiápajukawainapa eta mawínarajiwa ema paure achane, ene eka'eyare eti, taicha eta emasuapiranu'i.”

Esu maena ema Jesús énapa ena maparapenaveana

⁴⁶ Tímiturekaicha'a ema Jesús naye'e ena achaneana, te títekapanecha esu maena énapa ena maparapenaveana, títekapanapa nanasi'isera te aneka, nawara'a'i náechejikayare'i ema,

⁴⁷ natiari'i'i ena timetapanana'i ema Jesús: –Esu pena énapa ena piparapenaveana, narari'i ani te aneka, nawara'a'i téchejikaviana.

⁴⁸ Taka'e ema majikapapa: –¿Nája'a esu meme, nája'apuka ena nuparapenaveana?

⁴⁹ Tási'a, masuvechawakapa ena maye'eana maimitureana, tási'a, maka'epa: –Ena nakana ena nuparapekeneana'i esupa esu meme nemunaru'i.

⁵⁰ Taicha namutu nákani tikaemataneakana'i ema Tata tiávi'a'i te anuma, éna'i ena nuparapenaveana, esupa esu meme némunaruana'i.