Marcos 2 - Táurinakene máechejiriruwa’i ema Viya tikaijare

Ema Jesús makanaraka ema makajumakene eta murakaki'a

¹ Taka'e, te apanawarepa sache, tichawapa ema Jesús eta te Cafarnaúm. Eta nasamairikapa eta matiari'irapa ema, títekapanapaipa ena achaneana, kamurikeneana.

² Tiyututukawanapa te peti mávi'a'i ema, tájinapa távirawaina'ini te tapaja. Ema Jesús máimitukawakaipa eta nakaiju'eraya me Viya.

³ Taka'e, kuatruana ena tiamanapa'i ema makajumakene murakaki'a.

⁴ Étasera eta nayututusirawa'i ena achaneana, wa'i naitujikawa'ini naitekapaucha'ini eta te mávi'a'i ema Jesús. Taka'e, navetatamaekechapa eta peti te máina'u te manapaiya'i ema. Te enurukuiya'i nakajuchuchukapa ema makajumakene eta te áchuji.

⁵ Te máima'apa ema Jesús eta nakasiñawaira'i eta maye'e, máichapa ema makajumakene: –Tiuri, nuchicha. Eta pipekaturana'i nukaepa'ainavipa.

⁶ Enananajiwaka'i ena escriwánuana, ena natiari'ikeneana'i ánaki ena téjakana'i, naimijacha'i:

⁷ “¿Taja'a takayema tijarakawa eta maka'e eta máechejiriruwa? Eta máechejiriruwa tétavikawa eta matapirawa maye'e ema Viya. Makarichu ema Viya marata'a makaepa'a eta pekatuana.”

⁸ Émasera ema Jesús máimarakawaka'i eta napanereruana'i ena, tási'a mayaserekawakapa: –¿Tája'a takayema eti téjekapawa'i eta epanereruana?

⁹ Emétakanu, taja'apuka maejerarepana eta nicha'ini ema makajumakene: ‘Nukaepa'apa eta pipekaturana’, nicha'ipukaini: ‘Péchepuka, pive'a eta pímakaraji, tási'a pipaikapa’

¹⁰ Tiuri puiti nímereuchawainapa, ema Machicha ema Ajaira, eta marata'aira'i makaepa'a eta pekatuana te juka apake'e. Taka'e maichapa ema murakaki'a:

¹¹ –Piti nichavi'i, péchepuka pive'a eta pímakaraji, tási'a pipaikapa, piyanapa te pipena.

¹² Ema makájumakeneni, téchepukapa mave'apa eta maiverema, tipaikapa te namira'u ena achaneana, tiyanapa te mapena. Eta náimaira'i, ichapeine'i eta náramira'i namutu ena natiari'ikeneana'i, tétavikawaine'i eta nakunachira'i, tási'a na'asulupayachapa ema Viya. Ánipa naka'e'i: –Wa'i vima'asarena'ini eta juka.

Ema Jesús máichu'a ema achane tikaijare Leví

¹³ Te apanapa sache, tiyanawarepa ema Jesús te tachausi eta Kákiure te Galilea. Naurujiakapa ena maverakeneana achaneana, tási'a ema maimitumuri'apa.

¹⁴ Taka'e, eta maetavisirapa'i ema Jesús, máima'apa ema Leví, machicha ema Alfeo, téjaka'i eta te makatupara'aiya'i, eta nawachachirare eta nayase'ana taye'eyare'i eta Roma. Ema jesús máichapa: –Yare, pé'ikanu. Taka'e ema Leví techepukapa enewanepa, mae'ika'i ema Jesús.

¹⁵ Taka'e ema Jesús tinika'i te mapena ema Leví, énapa ena máimitureana. Ánaki natiari'iware ena machamuriana ena Leví, énapa ena kamurikeneana achaneana tisipekaturana, tinikana'iware te mesa eta mavi'a'i ema Jesús.

¹⁶ Enananajiwaka'i ena escriwánuana, fariséuana'isera ena, te naima'apa ema Jesús eta makachanewaka'i namutu ena eta manisira'i, nayaserekapa ena máimitureana: –¿Tája'a takayema, ema eye'e maestro makachanewaka'i eta manisira'i naye'e ena tive'ara'iana eta viyase'ana, énapa ena tisipekaturana'i?

¹⁷ Te masamapa ema Jesús, máichawakapa: –Ena tikajumana'i nakámunu'i ema mériku, énasera ena majumara'ana wa'i nákamunuima'i ema mériku. Nuti, wa'i étaina tímitekanu nutanupanawaka nákani matapirawareana'i, eta tímitekanu'i nutanupanawakayare ena tisipekaturanapana'i.

Nayaserekapa ema Jesús taye'e eta ayuna

¹⁸ Taka'e, te apa'ewarepa, kajimana'i ena máimitureana ema Juan Tikachasirikara'i, énapa ena fariséuana. Tási'a náitekapauchapa ema Jesús ena apamuriana achaneana témejekapawara'iana nayaserekapa: –Ena máimitureana ema Juan, tási'a énapa ena náimitureana ena fariséuana, kaijimana'i: ¿tája'a takayema wa'i nakaijima'ini ena pimitureana?

¹⁹ Ema Jesús majikapawakapa: –Nímikutichina'e puiti, wa'i táurikaima'i naijima'ini nákani tikaichu'akasiana'i tinikanaya naye'e ena araimana. Tiúrisamureanayare'i taicha matiari'i'i ema arayena.

²⁰ Járajapainapa eta sácheyare, tikaverejikasianaya, taicha ema arayena námainapa tapaenumawainapa tijimanainapa.

²¹ “Najina tepakaka'areka taye'e eta arameru amáratataji, taicha eta ichasime muriare atataji takachuriakayare'i tetsayuka taye'e eta arameru. Taka'e ichapepanainapa eta taetsayu.

²² Wa'iware taurika'ini vinaka eta aramaruama vino te ichasi'i yupi, taicha eta vino tisisiekaya tiñe'i takuta'ika eta yupi. Taka'e tiuripana vikawakuru'i tamutu arairu.”

Ena maimitureana techatijirikana eta trigo jena sache sáwarumu'u

²³ Jena sache sáwarumu'u, ema Jesús tiyanapa mapairirimekapa eta isaniti te tatarakukuji eta sukurekana, tási'a ena máimitureana, eta napaisirapa'i ena, navechuki'apaipa'i étajawapa'i eta trigo.

²⁴ Ena fariséuana nayaserekapa: –Pisamanu, ¿taja'a takayema naicha'i ena pímitureana, puiti jena sache sáwarumu'u wa'i tísapakare naicha?

²⁵ Émasera, máichawakapa: –¿Wa'i échejiku'a'ini eti eta máichakene'i ema David, eta mapaisirapa'i nasámapa eta naékuawa, éneichuwa ena té'ikanapa'i?

²⁶ Te émaicha'a ema Abiatar nákenumuri'i ena tiyujarakara'iana, ema David tisiapapa te mapena ema Viya, nanikapa eta paneana takapika'ukene'i maye'e'i ema Viya, nanikasare'i ena tiyujarakara'iana, tási'a maijarakawakapa ena achaneana té'ikanapa'i ema.

²⁷ Ema timiyanawa maka'e: –Eta sáwaru tikaepiya'i maye'eya ema achane, wa'i makaepiya'ini ema achane taye'eya'i eta sáwaru.

²⁸ Eta taka'e, ema Machicha ema Ajaira, éneichuware maécha'i eta sache nanarasiraya ena achaneana.