Marcos 13 - Táurinakene máechejiriruwa’i ema Viya tikaijare

Ema Jesús máimereuchaipa eta tákipaisirawaya eta templo

¹ Te tiuchukanapa te mapena ema Viya, ema Jesús énapa ena máimitureana máichapa: –¡Maestro píma'a eta juka máriana tétavikawa eta táichapewa táurinawa eta mapena ema Viya!

² Ema Jesús majikapapa: –¿Íma'a eta juka ichapekene peti? Wa'i tanasima'i eta íma'akene'i puiti, tikakipaikasiyare tamutu eta juka.

Tatiari'iyare eta ekutiarareanaya te tiáne'ipa eta táichekuiraya

³ Taka'e, tiyananapa te simena tikaijare Ulivukiji, tamira'u'i eta mapena ema Viya. Téjakanapa nakarichu'i, nayaserekapa eta makayemakene'i ema Jesús, natiari'imuri'i ema Pedro, ema Santiago, ema Juan, ema Andrés nayaserekapa:

⁴ Viwara'a pimetaka'avi. Tájamu'upuka eta náimiakipaisirayare eta Templo Jarari'iyarepuka eta ekutiarareyare te táne'ipa eta táitauchirawayare eta apana péchejisi'akeneana'i.

⁵ Ema Jesús majikapapa: “Ekuneuchawa, apaesa nakuija nakuwayuaka'e.

⁶ Taicha nárajapayare ena tépiyakawanayarepa'i tímiwasichawana nuye'e. Naka'enapa: ‘Nútipa ema Cristo’, nasapi'a nawayuakayare ena kamuriana achaneana.

⁷ “Te ésamairikapa eti, eta techakareyare táe'akakairayare, eta ichapekeneana awasareana. Tikanarajirikakanaya eta awasareana, tikauyayakarenapa guierraina eye'e eti. Wá'isera ekuarameka eta esamairisiraya, eta ekutiarareanayare wícha'asera étaima'i eta táichekuiraina.

⁸ Taicha eta awasareana te'ajirikakawakainapa etajikaka; éneichuware tatiari'iyarewa eta ichape eku'amu'uya te awasareana. Éneichuwa tiyamuripaikaya eta apake'e. Tamutu eta juka tapaenumawa táepanirawayare eta nátajiwanayare ena achaneana.

⁹ “Etijiwayare ekuneuchawayare, taicha tikarataka'eanainapa tiáma'eanainapa naye'e ena tuparairukana, téstaka'eanainapa te peti náurujisirarewa ena juriyuana. Ena tiáma'eanainapa te namira'u ena akenukana, té'eware te namira'u ena reyeana, táichavene'i eta é'isiranu'i, taka'e ekamapurawainapa échejisianuyare eta nuye'e te namira'u ena.

¹⁰ Taka'e te tiane'ipa eta taitekapiraya eta taitaviraya eta juka apake'e, ekametarairuyare eta Tiúrina Echéjirirukawa taye'e tamutu awasareana. Te ítekapapa te tamutu, tépanawayare'i eta táichekuirayare.

¹¹ Tasi'a wa'i ekueñamawa eta échejiuchirawayare, ekatiuchirawayare, taicha te taitekapapa eta uraya, máima'a'einepa ema Viya tíjaraka'eyare eta ítusirayare échejika, wa'iware étijiwaima'i eta échejika, émayare'i ema Machanewa Viya.

¹² Ena kaparapekakana nawara'ainapa naimikapaka ema naparape, tási'a nákani tikachicha'eana, nawara'ayarewa náijarareka ena nachichanaveana, tási'a nákani nachichanaveana nakanarainapa ena náiyana, tási'a náimikapakainapa.

¹³ Namutu ena achaneana tikatianaka'eanayare táichavene'i eta é'isiranu'i, émasera mákani tikamichaya te táitawapa tamutu, tiuchuku'ayare.

¹⁴ Te íma'apa eti ema achane wínarajikene taye'e eta takapika'ukene eta santukene'i wa'isera etaina mavi'aima'i –ena techejiku'ana eta juka nákaikutiara–, tási'a nákani tachimararuyare te Judea, najuna te simena.

¹⁵ Mákani tiávi'a'i te maye'e canchón te mapena, waipa makuchawaikene'awa maepana eta mayereruwana maeñamakeneana.

¹⁶ Tási'a mákani tachimararuyare te wáma'i, waipa makuchawaikeke'awa maepana eta mamuiri'a.

¹⁷ ¡Páureanasami nákani esenana tachimararuanayare nákani tikajariana'ipuka, nákani esenana tikachichana'i eta amuya tiájikacha'a!

¹⁸ Eyaseaka eti ema Viya, takuija táichejika'e, wá'iware takuchimaraka'e eta tíkasaremu'u,

¹⁹ taicha tétavikawayare eta nakatajiwairayare. Tájina tákutima'i eta táiñe'iwayare eta nakatajiwairayare, te táepanirawa'i eta máepiyasira'i ema Viya eta juka apake'e. Te táekenenapa eta tíñe'iyare, tájinainapa tákutima'i.

²⁰ Tási'a ema Tata te wa'i makukaechepaikawane eta ekuñaraki, nakuija nakuitareka'ini, námutu'ini tepenarakana, eta sera, eta maemunasira'avi'i ema, makaichekawane'i eta tiñe'ikare, taicha viti manerejiruana'i.

²¹ “Eta taka'e, natiari'inapa ena tiwayuara'iana tépiyakawanayare ema Cristo, tímiwasichawanainapa: ‘Íma'a makaipa ema Cristo’, ‘Íma'a titekapaipa.’ Wá'isera ekusuapa.

²² Tási'asera titekapanaya ena tímikutichawanayare profetana, tási'a tímikutichawanayarewa ema Cristo. Naichaya eta ichapeana tiáramikareana, tási'a étapa eta ekutiarareanayare. Kamurianayaré ena nawayuaruanayare, enaipa ena manerejiruana'i ema Viya, nawayuakayarewa.

²³ ¡Ekuneuchawaya! Numetaka'ewane eti apaesa échaipa.

Eta machavirayare ema Manerejiru'i ema Viya

²⁴ “Te'esera jena sacheana te taetavikawapa eta vikatajiwairaya, eta sache téma'ainapa, eta kaje waipa timikaucha'avima'i eta tajaraiwa,

²⁵ eta jarairikiana témirikanainawarepa. Étaipa eta tiávi'ana'i te anuma vima'akeneana'i, éneichuware tiyamurikanainapa, tiyejejekawanainapa.

²⁶ Taka'e, tikaecherainapa ema Machicha ema Ajaira eta maitekapirayare, támainapaipa eta úkajiana, tétavikawayare eta majaraiwayarepa'i.

²⁷ Ema mawanekainapa ena ángeleana, tási'a nakurujikayare ena manerejiruana'i, tiási'anayare te apake'e, te'epa te jákani návi'a'i te anuma.

²⁸ “Ákarawa'u eta nímiturapiana, nímikutichina'e eta yukukiana: Táitsiwachirawa'i eta tapakajiana, te íma'apa eta tapakajianaya arairu, tímatikare'i tiáne'ipa eta únemu'uirayare.

²⁹ Ene taka'eya, te íma'apa eta juka, échainapa ema Machicha ema Ajaira, táne'irainapa eta machavirayare.

³⁰ Numetaka'ewane, tamutu eta jukana téchakareana'i, naima'ayarecha'a ena achaneana naitareruana'i puiti juka sacheana.

³¹ Títawayare eta anuma étapa eta apake'e, étasera eta nechejiriruwa titauchawayare, wa'i tianuku'aima'i.

³² “Eta juka tiáramikareyarechucha, nájina téchaima'i tájamu'uyarepuka eta táitauchirawayare, énaipa ena ángeleana wa'i náecha'ini, nútiwanereka'ipukaini nécha'ini. Makarichu ema Tata, ema técha'i.

³³ “Eta taka'e, ekuneuchawa etsekawa'i eti, eyujarauchawayare. Taicha wa'i echa taja'apuka jákani sácheyare eta nuchavirayare núti Manerejirunu'i ema Viya.

³⁴ Nímikutichina'e eta máichakene'i ema achane te tiyanayare'i te apana awasare. Te tiyanayarépa, máijarakawakapa ena mawanarana eta náemataneyare'i, matuparakawakapa eta najaneasirayare'i eta peti. Taka'e, matuparakawarepa ema tijanearekara'i eta tapaja.

³⁵ Eta taka'e ekuneuchawa etsekawa'i eti, taicha wa'i echa taja'apuka titekapayare ema Tata Viakenu, eta té'epuka timapikuku'i, té'epuka enumu'u yati, té'epuka tijararamape, té'epuka yátikara'i;

³⁶ machu níja'uchawa nítekapaucha'e, wa'iware nawara'a nuchimaraka'e eta ímaka'ipuka. Taicha wa'i échaima'i tájamu'upuka nítekapayare nuti iákenunu.

³⁷ Eta juka numetaru'eana'i puiti, nuwara'a emétakayareware ena echamuriana: ¡Apaesa ekauneyare emutu!”