Marcos 11 - Táurinakene máechejiriruwa’i ema Viya tikaijare

Eta masiapira ema Jesús eta te Jerusalén

¹ Te títekapanayarepa te Jerusalén, tachakayara'a eta awasare Betfagé tási'a étapa eta Betania, te tachakaya eta masi'i Ulivukiji, ema Jesús mawanekawakapa ena apinana máimitureana.

² Máichawakapa: –Eyanayare te jena awasarechicha, tási'a te ítekapapa, íma'ayare eta burriku tikaiti'a'i, eta jena sárare máwaeke'echa'a, nájinaicha'a nakapera'ini. Evejapuakayare, tási'a iáminanuyare.

³ Te natiari'inapuka nákani nayasereka'e, ¿taja'a ta icha'i? Emetakayare ema Tata makamunuyare. Wa'i táyerema'i vímichawawaneyare.

⁴ Tiyananasarepa, jé'esare'i nachimapapa eta burriku tikaiti'a'i eta te calle te tapajachakaya eta peti, tási'a navejapuakapa.

⁵ Ena natiari'ikeneana'i ánaki nayaserekapa: –¿Tája'a ta icha'i eti? ¿Taja'a takayema evejapuakaya eta burriku?

⁶ Ena najikapapa nametakapa eta máimiturapi'i ema Jesús, tási'a náisapapa eta námira'i.

⁷ Taka'e, náepakamaekechapa eta náepaku'ana taye'e eta burriku, tási'a náminapa ema Jesús. Tási'a ema Jesús makáperapa.

⁸ Kamuriana ena náepakapaikapaipa'i eta naepaku'ana te achene, tási'a ena apamuriana nave'apa'i eta tapakaji eta káchipaka eta naechureana'i te náesaneana.

⁹ Tási'a ena tínapumirauchanapa'i, énapa ena tékene'anapa'i tipiararekanapaipa'i: –¡Pikatiucha'avi! ¡Pájapanu'avi! ¡Asulupaya eta pítekapira'i te maijare ema Tata, piti yátupikene'i Viakenuvi'i!

¹⁰ ¡Asulupaya eta pítesira, píti yátupikenevi'i, rey-vi'i viye'e! ¡Wanairukavi'i me Viakenu tiasi'a te anuma!

¹¹ Tisiapapa ema Jesús te Jerusalén, tási'a matupirupa tiyana'i te templo. Tamutupa máima'a'i, tiyanapa tichawa te Betania, namutupaichu ena dóseana máimitureana.

Ema Jesús májiki'a eta yukuki tikaijare higo maikuñakapa

¹² Te apanawarepa sache, te tiuchukanapa eta te Betania, téku'aine'i ema Jesús.

¹³ Máima'apa te tiyere'i eta yukuki tikaijare higo, tási'a, tiyanapa mapaucha'i eta, tájina'isera tá'ina'ini, takarichu'i eta tapakajiana. Taicha wícha'a taka'iraina'ini.

¹⁴ Taka'e, ema Jesús máichapa eta higo: –¡Piti pépiyainapa eta má'irikireviyare! Nasámapa ena máimitureana.

Ema Jesús makuchuchujikawaka ena tíjararekana'i te mapena

¹⁵ Te títekapanapa te Jerusalén, tisiapapa ema Jesús te mapena ema Viya, máima'aine'i ena achaneana tíjararekana'i eta sárareana, káyureana. Natiari'iware ena títsiriperekara'iana eta naplataneana. Tási'a, makuchuchujikapa namutu. Máeke'epuichinawakapaipa eta namesarana étapa eta nasiyana,

¹⁶ wa'i máisapa'ini nánukujuecha eta mapena, wa'iware maisapa'ini námapa'ini jákani náijarareruana'i.

¹⁷ Tási'a, máimitukawakapa ena natiari'ikeneana'i, máichawakapa: –Taka'e'i eta táechejiriruwa'i eta Takapika'ukene Ajureka: ‘Eta nupena takarichu táikuchi'i eta nayujarasirareya ena achaneana tiási'ana te tamutu awasareana’, étisera tiámera'iana ekasiapawapa eta juka.

¹⁸ Eta nasamira'i ena tachutiri'ana naye'e ena tiyujarakara'iana, tási'a énapa ena escriwánuana eta máechejiriruwana'i, tisemanapa, natanukapa eta náicharasirayare eta náimikapasirayare'i ema, taicha napikaine'i ema, taicha náima'a'i tétavikawa'i eta masuapakarewa'i eta naye'e ena achaneana.

¹⁹ Taka'e, te kápere'ichichapa, tiyanawarepa ema Jesús, tiúchuka te Jerusalén makachanemuri ena maimitueana.

Maimiturapi taye'e eta vikasiñawairaya maye'e

²⁰ Taka'e, te yátikara'ipa, nachavirawarepa te Jerusalén, náetavikapaipa'iware eta yukuki higo. Náima'aine'i tiájikipa'i, tamutu ta tapareana.

²¹ Taka'e, téchawapa ema Pedro eta máechejiriruwana'i ema Jesús, tási'a, máichapa: –Maestro píma'a, tiájikipa eta higo eta péwajiriaru'i.

²² Ema Jesús majikapawakapa: –Yátupina ákasiñawa me Viya.

²³ Nutupiruwa numetaka'e, jé'esare, eti apana esamakareyarewa, te yátupina ákasiñawa me Viya. Tájina émaitukaima'i. Erata'ayarewa ekayejeka eta mari te apachakaya eta ichape une, tájina iáwamira'uima'i te esamureana.

²⁴ Eta taka'e numetaka'e, eta eyaseserepiyare eti, eyujarakayare me Viya. Tási'a, tíjaraka'enapa ema tamutu eta eyasearuanaya.

²⁵ Éneichuware, te éñauchawa emetavika eti, eta naviurewana'i nákani tejekapawana'i eta eye'e. Apaesa éneichuwa maemetavika'e eta eviurewana ema Tata Vikaiyakene tiavi'a'i te anuma, tamutu eta epekaturana.

²⁶ Té'esera wa'i ekuemetavika, wá'iware maemetavikaima'i eta éjekapirawana, ema Tata vikaiyakene te anuma.

Nayasereka ema Jesús nája'a'ipuka tituparaka'i ema

²⁷ Te taekenepa eta juka, tichawanapa te Jerusalén. Taka'e ema Jesús mapaikajuechapa eta mapena ema Viya, napauchapa ena tachutiri'ana ena tuparairukana, énapa ena escriwánuana, tási'a énapa ena viyakara'ana,

²⁸ tási'a nayaserekapa: –¿Nája'asika tiwanekavi'i? ¿Nája'a tituparakavi'i picha eta juka píchakeneana?

²⁹ Ema Jesús majikapawakapa: –Nuti apanaware nuyasereka'eyare: ¿Naja'a tiwaneka'i ema Juan eta maikachasirisira'i, ema Viya, énapuka ena achaneana?

³⁰ Ejikapanuyaresera, apaesa numetaka'e eta nukatupara'aira'i eta níchira'i eta júkana.

³¹ Enajikakanapa tiákapaemajirikakanapa: “Te vémuna'akawa vicha mawaneru'i ema Viya, ema maka'énapapuka: ‘Tási'a ¿wá'iyapa esuapa'ini ema?’

³² Taicha, wa'i taurika'ini vémuna'akawa vícha émajiwaichucha eta máitesira'i...” Ena napika'i ena achaneana, taicha namutu'i nasuapa'i ema Juan eta émaira'i profeta.

³³ Tási'a, najikapapa ema Jesús: –Wa'i vecha. Taka'e, ema Jesús majikapawakapa: –Nuti apanaware wá'iware numetaka'ema'i nája'apuka ema tijarakanu'i eta juka nutupara'a'i.