San Lucas 22 - Táurinakene máechejiriruwa’i ema Viya tikaijare

Napanerechapa eta nakaratasiraya ema Jesús

¹ Tamira'upaipa eta piesta, eta nanisira'i eta pan maye'ere levadura, eta piesta tikaijare Pascua.

² Ena tachutiri'ana naye'eana ena tiyujarakara'iana, tási'a énapa ena escriwánuana, napika'isera ena achaneana, natanuka'i eta náimikapasirayare'i ema Jesús.

³ Taka'e, ema Wínaraji máwa'akapa ema Júlasi. Émaichu'i nachamuri'i ena dósekeneana'i máimitureana ema Jesús, ema naimijarechakene'i Iscariote.

⁴ Ema maka tiyanapa maima'apanawaka'i ena tachutiri'ana naye'e ena tiyujarakara'iana, énapa ena nakapitarana ena suntaruana taye'e eta mapena ema Viya, tási'a téchejirikawapa ema naye'e ena, táicharakawayare'i eta máijararesirayare'i ema Jesús.

⁵ Ena tiúrisamureanaine'i, tási'a tíjarakawanapa eta náijarasirayare'i eta plata ema Júlasi.

⁶ Tási'a ema majikapapa, taka'e matanukapa eta nakuijapa ena achaneana eta máijararesirayare'i ema Jesús.

Nanisiraya taye'e eta Pascua

⁷ Títekapapa eta sache táepanirawa'i eta tapiestara eta nanisiraya eta pan maye'ere lewadura, étaichuware eta jena sache, nakapasiraya eta uvesa tikaijare cordero taye'e eta Pascua.

⁸ Ema Jesús mawanekawakapa, ema Pedro émapa ema Juan. Máichawakapa: –Eyanayare étupiripanaya eta viniruyare taye'e eta Pascua.

⁹ Ena nayaserekapa: –¿Távi'apuka piwara'a'i vétupirisi'ayare?

¹⁰ Ema Jesús májikapawakapa: –Te esiapapa eti te awasare, iákapajikayare ema achane tiámapa'i eta une te yupi. É'ikayare ema te peti masiapi'ayare,

¹¹ tási'a emetakayare ema tikaye'e eta peti: ‘Ema Maestro tiwaneka'avi'i pímecha'avi: ¿Tavi'apuka eta cuartu nunisi'ayare te Pascua, nukachaneyare ena nímitureana?’

¹² Ema tímecha'enapa eta ichape cuartu te anuke'e piso, táurikeneipa'i eta jákara. Étupirikapa eta viniruyare eta ánaki.

¹³ Ena nakaiju'epa, tási'a náima'apa étapaichu'i eta makayemakene'i ema Jesús, tási'a náetupirikapa eta naniruyare taye'e eta Pascua.

¹⁴ Te urapa títekapapa ema Jesús, tási'a ena apústuleana tejakanaipa te mesa.

¹⁵ Ema Jesús, máichawakapa: –¡Ichapemuri eta nuwaraira'i nukachane'e eta nunisirayare'i eta juka nénisira'e'i puiti eta juka yati páscuaira'i, mapurare wícha'a táitekapa'ini eta népenirayare!

¹⁶ Tási'a, numetaka'ewaneya puiti, waipa nápechawaima'i nunika, tiámainukawa te táitauchawapa eta Mawasa ema Viya Akenuka te anuma.

¹⁷ Taka'e, mave'apa eta wasu náerirare, ma'asulupayachapa ema Viya. Tási'a, maka'epa: –Era eta juka. Ekajijirikakaya eti.

¹⁸ Taicha numetaka'ewane waipa nápechawaima'i néra'iwareni eta juka tachi eta uwa, tiámainukawa te mawasa ema Viya akenuka te anuma.

¹⁹ Te taekenepa, mave'apa te mawa'uana eta pan, tási'a ma'asulupayachapa ema Viya, mayuvetukapa máijarakawakapa ena, tási'a máichawakapa: –Eta juka náke'e, étivene'i níjararekawa'i eta népenirayare. Epiyaka eta juka, temecha'eya eta nuye'e.

²⁰ Éneichuware te titanesianapa, mave'awarepa eta náerirare wasu, máichawakapa: –Eta juka wasu, eta arairu matratune taitauchirawa'i eta nítine, eta taepusairuwa'i eye'e eti.

²¹ Puítisera, marari'i ema tíjararekanuyare ani te juka te mesa.

²² Ema Machicha ema Ajaira, títauchawayare'i maye'e eta maichakene'i, étasera ¡páuresamisera ema tíjararekanuyare!

²³ Taka'e, ena máimitureana tiyaserejirikakanapa, nája'apuka mákani te vitaraku ema tíjararekaya ema Viákenu.

¿Naja'apuka ema kapika'upana?

²⁴ Te táekenepa, tiákapaemajirikakanapa ena máimitureana taye'e eta nája'ayarepuka ema ichapekenepanaya akenuka te nataraku te náejasiraya te náwakureanayare.

²⁵ Ema Jesús, máichawakapa: “Ena reyeana, énapa ena tachutiri'ana, échaichu'i eti, ena akenukana taye'e eta awasare, muraka eta nakawanairipira ena achaneana, nawaraira'i tikapika'uanayare'i.

²⁶ Wá'isera ekuka'e eti. Mákani tímerekawa'i tikapika'upana eye'e eti, makutiyare ema amaperu, takutikene nákani tiwanerekana'i, tatuparaka'i téñamawanayare eta máechapajirisirawakayare.

²⁷ Taka'e ¿Naja'apuka tikapika'upana, émapapuka ema tejaka'i te mesa tinika'i, wa'i emapuka ema wanairukana téchapajirikana'i eta mesa? ¿Emara ema tejaka'i te mesa? Puítisera, nímituka'eyare eta juka Arairu nuwanairipi. Puiti íma'anuipa eta nítatira'e'i, nuwara'a ekutinuya, ítatikakayare eti.

²⁸ “Eti, ímararakanu'i eta náichiranu'i ena tikatianakanuana'i, wá'isera ejunijikanu'ini.

²⁹ Eta taka'e, níjaraka'eyare nuti eta etupara'anayare ekutinuyare nuti eta nukatupara'airaya maye'e ema Tata,

³⁰ tási'a étinapa enikayare erayare te numesara te navi'a'i, éjakainapa taye'e eta ekatupara'airaya, étinapa ewanerekaya naye'e ena dósemurikeneana israelítana.”

Ema Jesús máimereucha ema Pedro eta tepiyakawa wa'i máimati

³¹ Ema Viákenu máichapa ema Pedro: –Simón, péchapawayare. Ema Wínaraji, yaseakanu'i mawaraira'i tikaikutiara'eyare tiákipaika'eyare emutu eti, emasera maisapa'i;

³² nútisera nuyaseuchavi'i me Tata, apaesa wa'i takuemitiaka eta pé'isiranu'i. Piákipaikawayasera, tichawayaresera eta pikasiñairanuya, tási'a pétumechawakainawarepa ena apamuriana pichamuriana.

³³ Ema Simón máichapa: –Tata, níjarakawa né'ikavi taye'e eta pikaeratairayare, níjarakawaware nakapakanu, apaesa nákachanevi.

³⁴ Ema Jesús májikapapa: –Pedro, numetakaviwane, puiti te tamira'upaicha'a eta táechejisirayare eta warayu, mapa'eyare eta péñauchirawayare, eta wa'i pímatinu'ini.

Tiane'ipa eta ura nakaitsamarajiraya

³⁵ Taka'e, ema Jesús mayaserekawakawarepa ena máimitureana: –Te nuwaneka'énapa epaika, nutuparaka'e'i wa'i ekuama eta tarera, eta tavirare eta plata, eta éparupewana, ¿échuriaka'i eta ekamunukeneana? Ena najikapapa: –Tájina wákamunu'ini.

³⁶ Tási'a, máichawakawapa: –Puítisera mákani tikatarera'i, mámayare, étapa eta tavirare eta maplatane. Émaipa mákani tájina'i maye'éna'i espada, tiúripana'i máijarareka eta maye'e saku, mawacharesi'aya eta maye'eyare espada,

³⁷ taicha puiti numetaka'e títauchawainapa eta táechejiriruwana'i eta Ajureka: ‘Tímikutijirikawa'i nukapa'i'ini náicha.’ Tamutu eta juka títauchawayare'i.

³⁸ Ena naká'emuripa: –Tata, jukari'i apina'i eta espada. Ema majikapawakapa: –Tiuri taratapa, waipa ekuechejika.

Ema Jesús tiyujaraka te Getsemaní

³⁹ Taka'e ema Jesús tiúchukapa, tíyanapa te Ulivukiji, tási'a énapa ena máimitureana, taicha taka'e'i eta naye'erepi'i.

⁴⁰ Te títekapanapa máichawakapa: –Eyujarakayare, apaesa wa'i makuituruka'e ema wínaraji.

⁴¹ Térajipanawapa ema Jesús eta naye'e ena. Tépuyukapa eta mayujarasira'i.

⁴² Maka'epa: “Tata Nukaiyakene, tajina temaituka, pikatajikanusera pikatiuchanu eta juka nichararakawaya, wá'isera takuitauchawa eta nuwara'akene nuti, étasera eta piwara'akene piti, eta taitauchawa.”

⁴³ [Taka'e, máukupauchapa ema ángele tiási'a'i te anuma, máetumechapanayare'i.

⁴⁴ Ichape eta máeñamirawa'i eta mayujarasira'i. Témirikapa eta máepatsure murakakama eta taemirisira'i te apake'e, takasirikiamapa'i eta máitine.]

⁴⁵ Te títapirikapa eta mayujarasira'i, téchepukapa, tiyanapa te návi'a'i ena máimitureana. Máima'aine'i ena, tímakanaipa'i táichavene'i eta nakatisamurewaira'i.

⁴⁶ Máichawakapa: –¿Tája'a takayema ímakaichucha eti? Échepuka, eyujarauchawa apaesa, eyaseaka ema Viya eta etúmewaina.

Nakaratakapa ema Jesús

⁴⁷ Téchejirikawainicha'a ema Jesús, te títekapananecha ena kamurikeneana suntaruana. Máinapumirauchawakapaipa'i ema Júlasi. Témeña'awapa maye'e ema Jesús, máetserarekapa.

⁴⁸ Tási'a, ema Jesús máichapa: –Júlasi, eta pétseraresiránu'i píjararekanu'i nuti Manerejirunu'i ema Viya.

⁴⁹ Taka'e, ena máimitureana natiari'ikeneana'i, eta náimaira'i ena, nayaserekapa ema Jesús: –Tata, ¿vikatiuchawa te espada?

⁵⁰ Taka'e, ema émana mave'apa eta maye'e espada. Makijikapa eta machaka tinápa te waure ema makajurure ema nákenumuri ena tiyujarakara'iana.

⁵¹ Ema Jesús máichapa: –Ésamirikawachucha; taratapa. Mave'apa eta machakaini ema achane, máimichawapa máipistaka, tinarakawanepa.

⁵² Tási'a, máichawakapa ema Jesús, ena tuparairukana natiari'ikeneanapa'i eta nakaratasira'i ema, énapa ena akenukara'ana, énapa ena uficiáleana taye'e eta mapena ema Viya. –¿Tája'a takayema ekasiña eta espada, ekaepuchirikipa'iware eta etánusiranupa'i, tímikutijirikawapa námera'i'ini nuti?

⁵³ Étayapasika kape, tamutu'i sácheana nukachane'e'i taye'e eta mapena ema Viya. Wa'iware epatsikawa'ini ekaratakanu'ini. Étisera iúrikapuka eta tamapikuwa'i eta yátimu'u'i eta íchira'i eta tamaurikeneana'i, taicha mawa'aru'e'i ema Wínaraji.

Ema Pedro tépiyakawapa wa'i máimati ema Jesús

⁵⁴ Taka'e, nakaratakapa ema Jesús. Námapa te mapena ema Caifás. Émasera ema Pedro máe'iekene'apa'i mayere'ipa'isera.

⁵⁵ Ánaki te taju'e te canchón, tikamururekanapa eta yuku násasiawayare'i. Téjamuri'anapa te tachakaya eta yuku. Téjakawarepa ema Pedro te namuri.

⁵⁶ Suka'epaipa'i esu nawanara, suíma'apa ema Pedro eta máejasira'i te tachakaya eta yuku. Suímararakaipa'i. Tási'a, suíchapa: –Eñi ñika achane éñi'ichu ñichamuri eñi Jesús.

⁵⁷ Émasera ema Pedro tépiyakawapa wa'i máimati. Máichapa: –Píma'a, esena, wa'i nímati nuti ema píchakene'i.

⁵⁸ Te tiyerere'achichaware, máimararakaipaware ema apana, máichapa: ¡Píti'ichu machamurivi ema Jesús! Ema Pedro majikapawarepa: –¡Wa'i ajaira, wá'iware machamurinuina!

⁵⁹ Te urapa eta táetavisirawa'i, máima'awarepa ema apana, máimatipa eta máechejirisirawa ema Pedro. Máichapa: –Yátupikene píti'ichu machamuri ema Jesús, taicha eti ekawasana te Galilea.

⁶⁰ Ema Pedro maka'epa: –Wa'i nímati, nája'apuka ema maena píchakene'i. Taka'e téchejirikawaicha'a'i ema Pedro, énewanepa téchejika'i eta warayu.

⁶¹ Taka'e ema Viakenu máesenikapa ema Pedro, tási'a maéchapa ema Pedro eta mametarapi'i ema Viakenu: “Te tamira'uinaicha'a eta táechejisirayare eta warayu, píti mapa'eyare eta peñauchiranuya.”

⁶² Taka'e tiúchukawanepa ema Pedro, tíya'apa eta makatisamurewa'i.

Nakaeka'ijirikapa ema Jesús

⁶³ Ena suntaruana tijaneakana'i ema Jesús, nakaeka'ijirikapa ema. Náe'ararakapa.

⁶⁴ Náitiukichaware, tási'a ena nayaserekaware: –¡Te pijarauki'ipuka, pímatiyare nája'a'ipuka ema té'avi'i!

⁶⁵ Ichapemuriware eta napanararachira'i ema.

Nakatupi'apa ema Jesús te namira'u ena Akenukara'ana

⁶⁶ Te tijara'ipa, tikurujikakanapa ena viyakarana naye'e ena juriyuana, ena tachutiri'ana ena tiyujarakara'iana, énapa ena escriwánuana, námapa ema Jesús te namira'u ena Akenukara'ana. Ánaki nayaserekapa:

⁶⁷ Picha'avi, ¿Pítisareji ema Cristo? Ema májikapapa: –Te numetaka'e eta nútira'i, eti wa'i esuapanuima'i.

⁶⁸ Te nuyasereka'epuka, eti wa'iware ejikapanuima'i.

⁶⁹ Étainapasera makaiju'eyare te anuma ema Machicha ema Ajaira, eta maéjasi'ayare te mawaure ema Viya, máitupajijiaruwakene'i.

⁷⁰ Tási'a namutupa nayasereka'i: –¿Taka'e pitikene'i Machicha ema Viya? Ema Jesús majikapapa: –Etupiruwa eta eka'eira'i.

⁷¹ Taka'e, ena naka'emuripa: –Waipa tákamesa vikayasesereru'ini ena apanana. Émakenepa'i visama'i puiti eta juka máechejiriruwa'i, étapa tiviuchayare.