San Lucas 21 - Táurinakene máechejiriruwa’i ema Viya tikaijare

Eta sunakiruwa esu esena paure suepenaimakene

¹ Ema Jesús máimararaka'i ena ríkuana eta nanakisirawa eta plata taye'e eta chapama'i nanakakuirare'i eta námawa'uana,

² Éneichuware máima'aware tinakikawa esu esena suépenaimakene'i, páurekene'i esu, sunakika'isera eta apipechicha'i eta suplatane.

³ Taka'e, máichawakapa: –Íma'a esu suka esena páurechicha, jé'esare esu, tímepanawa'i eta sunakiruwa'i, sukachurikawaka'i namutu ena apamuriana,

⁴ taicha namutu ena, nanakika'i eta náemacharajiana naplataneana. Ésusera esu suka páure'ineni, sunakika'isera tamutu eta sukaye'ekene'i. Suíta'i eta suníkawachayare'ini.

Ema Jesús máimereuchaipa eta tákipaisirawaya eta templo

⁵ Natiari'i'i ena téchejisi'ana'i eta mapena ema Viya, eta táurinakeneana tayereruwana, nanakiruana'i ena achaneana, étapa eta táurinawawaka'i eta máriana taye'eana'i. Ema Jesús maka'epa:

⁶ –Járajapayare eta sachewayare tikakipaikasiyare tamutu eta jukana íma'akene'i, wa'i tanasima'i eta íma'akene'i puiti, tikakipaikasiyare tamutu eta juka.

Eta ekutiarareanaya te táne'ipa eta táichekuiraya

⁷ Taka'e, nayaserekapa: –Tata Maestro, ¿tajamu'upuka eta taitauchirawayare? ¿Tájamu'upuka eta náimiakipaisirayare eta mapena ema Viya Jarari'iyarepuka eta ekutiarareyare te táne'ipa eta táitauchirawayare eta apana péchejisi'akeneana'i?

⁸ Ema Jesús majikapapa: “Ekuneuchawa, apaesa nakuija nakuwayuaka'e, taicha nárajapayare ena tépiyakawanayarepa'i tímiwasichawana nuye'e. Naka'enapa ‘Nútipa’ ‘Puiti táitekapakenepa eta sache.’ Étisera wa'i ekue'ikawaka.

⁹ Tási'a te ésamairikapa eta techakareyare, táe'akakairayare eta ichapekeneana awasareana. Wá'isera ekuarameka eta esamairisiraya, eta ekutiarareanayare wícha'asera étaima'i eta táichekuiraina.”

¹⁰ Tímiyanawapa maichawaka'i: “Taicha eta awasareana te'ajirikakawakainapa etajikaka.

¹¹ Tatiari'iyarewa eta ichape eku'amu'uya te awasareana, éneichuwa tiyamuripaikaya eta apake'e tatiari'iyare eta jumaremu'uya, te anuma tímerekawainapa eta ichape ekutiarareya.

¹² “Tatiwanumayaresera tipanajirika'eanayare eti. Tikarataka'eanayare, tiáma'eanayare te peti náurujisirarewa ena juriyuana, taka'e temerataka'eanainapa, tási'a, tiáma'eanaya te namira'u ena reyeana, te'epa te namira'u ena akenukana, ekaviurewayare táichavene'i eta é'isiranu'i.

¹³ Taka'e ekamapurawainapa échejisianuyare eta nuye'e.

¹⁴ Wá'i ekueñamawa eta ekayemayare eta ekatiuchirawaya.

¹⁵ Taicha nuti, níjaraka'eyare eta ítusirayare ekatiuchirawaya, nájina ákutima'i eta ítupaijiasirawaya, ichape ekachuriakayare ena iánaranaya.

¹⁶ Étisera, tíjarareka'eanaya ena tikachicha'eana énaipa nákani eparapepuka, énapuka ena ejaneanana, ena ítunakasareana. Enerejikawainapa eti nakaparuanaya,

¹⁷ tási'a namutuya ena achaneana tikatianaka'eanayare, táichavene'i eta é'isiranu'i,

¹⁸ wa'isera, temitiakaima'i etapima'i eta echutimakana.

¹⁹ ¡Ekamichawachucha, apaesa ítujikawa eta iuchukuiraina!

²⁰ Te íma'apa nachayaka eta Jerusalén, etanakeneyare'i ejército eta náichapemuriwaya, étainapa íkutiaraya eta táitavi'ayare eta awasare.

²¹ Taka'e, te íma'apa eta juka, táurikapa etátajipa ejunawane, eti etiari'ikeneana'i te Judea, ekaiju'eyare eta te simena, nákani tiávi'ana'i te taju'e eta awasare Jerusalén, náuchukawane taye'e, nákani tiávi'ana'i te wáma'iana, waipa nakuchawa taye'e eta awasare.

²² Taicha táitekapauchainapa eta tasacherayare eta takaikuñairaya, títauchawainapa eta tametarapi eta Takapika'ukene Ajureka.

²³ ¡Páureanasami nákani esenana tikajariana'ipuka tachimararuanayare, nákani esenana tikachichana'i eta amuya tiájikacha'a! Taicha támairijikainapa eta nakatajiwairayare ena achaneana tiávi'ana'i te awasare.

²⁴ Natiari'iyarewa ena takaparuanaya eta espada, ena apamuriana nakaratatajikainapa. Námawakainapa te apanakeneana awasareana. Eta awasare Jerusalén énapa téchanayare ena apawasana. Tiámainukawa te máikutichapa ema Viya, enapawainapa kaikuñanayare.

Eta machaviraya ema Manerejiru'i ema Viya

²⁵ “Jarari'iyare eta ekutiarareya te sache, te kaje, étapa te jarairikiana, tipikanainapa ena achaneana te juka apake'e. Tiáramekanainapa taicha eta nasamirayare eta murakakene táepakuru'a eta ichapeama une.

²⁶ Ena achaneana tiákipaikawanainapa eta napísiraya, wá'isera náimatiekene'aima'i tája'apuka eta náichararakawayare'i. Éneichuware yejejekawanainapa eta tiávi'ana'i te anuma.

²⁷ Taka'e tikaecherainapa ema Machicha ema Ajaira eta maitekapirayare, támainapaipa eta úkaji, tétavikawayare eta majaraiwayarepa'i.

²⁸ Te íma'apa tanakuchawapa eta juka, échainapa eti, taicha tiáne'ipa eta nítekapiraya nukatiuchirá'eyare.”

²⁹ Éneichuware máimikutichinawarepa eta juka: “Ekuneyare eta juka yukuki, étapuka jákani apanana yukukiana.

³⁰ Te íma'apa títsiwachawapa eta tapakajiana, tiáne'ipa eta únemu'uirayare.

³¹ Ene taka'eya, te íma'apa eta juka, échainapa eta táne'irainapa eta taitekapiraya eta mawasa ema Viya akenuka te anuma.

³² Numetaka'ewane, tamutu eta jukana téchakareana'i, naima'ayarecha'a ena achaneana naitareruana'i puiti juka sacheana.

³³ Títawayare eta anuma étapa eta apake'e, étasera eta nechejiriruwa titauchawayare, wa'i tianuku'aima'i.

³⁴ “Échapawa, machu tachimaraka'e eta jena sache, wa'i ekukuti ena tawayuaruana eta térakare. Wa'i ekueñamawa eta ítaresira, machu ta'apapika'e eta é'isiranu'i.

³⁵ Tímikutijirikawainapa eta táija'uchirawa eta táeratasirawa eta trampa. Ene naka'eyare ena achaneana te tamutu awasareana eta namánekapauchirawaya.

³⁶ Etsekawaicha yátupina. Eyujarauchawa'i támutu sacheana, apaesa tume'énapa eta ekamichiraina tamutu eta juka táichararakawayare, apaesa takuija ekuichirawaina eta ítekapauchiranuya te numira'u nuti Manerejirunu'i ema Viya.”

³⁷ Ema Jesús timitureka te sachemu'u ánaki eta te templo. Te yátiware tiyanaware te táekene'i eta tikaijare Ulivukiji.

³⁸ Ena achaneana tamutu yátikara'iana, tiyanana te templo, titsekawanaipa eta nasamararasirayare ema Jesús.