San Lucas 19 - Táurinakene máechejiriruwa’i ema Viya tikaijare

Ema Jesús emapa ema Zaqueo

¹ Taka'e, eta máitekapiraipa ema Jesús te awasare Jericó, tianukupaikapa

² Matiari'i ema achane riku, tikaijare Zaqueo. Nakapitara'i ena tive'ara'iana eta nayase'ana.

³ Te masamairikapa eta émaira'i ema Jesús títekapapa'i, mawara'apa máimatiyare'i. Étasera eta máichipichuwa'i ema, wa'i márata'a'ini máima'a'ini ema Jesús te namuri ena kamurikeneana achaneana.

⁴ Tási'a, tijunapapa eta te mayani'ayarepa'i ema Jesús. Tiápanapa te yukuki, eta tikaijare Sicómoro, máimararakasaréipa'i ema mawara'akene'i máimati.

⁵ Taka'e, te makapekupa ema Jesús eta yukuki mávi'a'i ema Zaqueo, máesenikapa ema Jesús te anuke'e. Tási'a, máichapa: –Zaqueo. Yare, piúkupaika, taicha puiti nuwara'a'i nunasinumayare te pipena.

⁶ Taka'e, ema Zaqueo titátajipa tiúkupaikapa. Tiúrisamureine'i eta majakapira'i ema Jesús.

⁷ Eta náimaira'i ena achaneana eta juka, téchejikanapa maye'e ema Jesús, náka'epa émamesapa máitekapauchayare'i ema maka tikapekatura'itátaji.

⁸ Te téjakanapa te taju'e, témeña'awapa ema Zaqueo te mamira'u ema Jesús. Tási'a, maka'epa: –Píma'a, Tata Nákenu. Nuti néñeuchawapa me Viya. Puiti níjarakayare ena páureana tikutimuri'akaka eta níma'akeneana. Nímichawayarewa te natiari'ipuka ena nukaetemakeneana'i, kuatru'enapasera eta táitsiwayare eta nímichawakeneya.

⁹ Tási'a, ema Jesús majikapa: –Puiti titekepapa eta nauchukuiraya te juka peti, taicha émaichu'i maumuriwa'i ema viyara'aini Abraham.

¹⁰ Taicha eta tímitekanu'i nuti Manerejirunu'i ema Viya. Nutanukawaka'i tási'a nukuchuku'awakayare'i ena naemitiaruana.

Eta máimikuticha eta plata

¹¹ Taka'e, ena achaneana, eta náimaira'i eta máne'iraipa eta Jerusalén, ena náimijachaipa'i titekapayarepa eta mawasa ema Viya akenuka te anuma.

¹² Máichawakapa: “Matiari'i'i ema achane. Ichape eta mapikakarewa'i, tiyanayare'i te apana awasare, eta tímiyanayare'i máepani'ayare'i eta máwakureyare'i eta marrey-wayare'i. Eta machavirayarepa, téjakayarepa ema.

¹³ Te tiyanayarépa, máichu'awakapa ena diéskeneana mamusurana, máijarakawakapa ena eta kamurikene maplatane tási'a, máichawakapa: ‘Ekajurukayare eta juka plata, te nuchawa táimekawaipa.’

¹⁴ Te máekenepasera, tisemamurianapa ena majaneanana, naewatakapa ema wanairuka, mayaseserekayare'i wa'i nakuijaraka eta mawakurena, ánipa naka'e: ‘Wa'i wáwara'a émaina viye'éna rey ema maka.’

¹⁵ “Émasera majakapa'i eta máwakure'i, tichawapa te máwasa. Tási'a máichu'awakapa ena mamusurana ena máijararuana'i eta plata, mayaserekapa te tímekawa'ipuka.

¹⁶ Ema tínapuka'i tímerekawapa, tási'a máichapa: ‘Tata, eta píjararunu'i tímekawaipa eta tachichana'i. Diéspe'i eta tajurusira'i.’

¹⁷ Ema rey majikapapa: ‘Tiuri tájina táichawa, tétavikawa eta piúriwa piti numusura. Puiti wa'i támapurujima'i eta juka ánichichakene'i níjararuvi'i, puiti níjarakaviyare tákenuviyare eta diéskene awasareana.’

¹⁸ Tímerekawawarepa ema apana, tási'a máichapa: ‘Tata, eta piplatane tímekawaipa'i, sinku eta tajurusira'i.’

¹⁹ Éneichuware ema maka majikapawarepa: ‘Piti nunakaviyare akenukaviya taye'e eta sinkukeneana awasareana.’

²⁰ “Tási'a tímerekawaware ema apana mamusura. Máichapa: ‘Tata, júka'i eta piplatane, núnakaichucha, nítipuika'i te pañuelo,

²¹ nupika'i eta nákaete'a'ini. Taicha pétaviucha'i píti eta pimajapanuraiwa'i, taicha píti pive'ayare'i eta nématanewacha.’

²² Taka'e, ema rey máichapa: ‘Musu, eta juka péchejiriruwa'i eta tímikaecherachavi'i eta piplujuwa'i eta tíviuchaviya. Te pímatinu'ipuka eta numajapanuraiwa'i, níta'ara'i eta apaematanewacha,

²³ wá'iyapa pinakapa'ini eta nuplatane te wanku, étaina'ini tajurusi'a'ini nuve'aipa'ini eta táejapa eta nuchavirapa.’

²⁴ Tási'a, máichawakapa ena natiari'ikeneana'i ánaki: ‘Everejika ema mákatataji eta nuplatane. Íjaraka ema tikajuruka'i eta diez mil.’

²⁵ Ena naka'ewarepa: ‘Tata, ¡tímekawaipa'ineni diéspepa'i eta tajurusira'i!’

²⁶ Ema rey majikapawarepa: ‘Eta taka'e numetaka'e, ema tikaima'akene najanechinaya eta apana maima'akeneya, emasera mákani achane tajina maima'akenena naverejinaya tamutu eta maima'akeneanaini, tayanapanepuka ánimurichichaichu.

²⁷ Énasera ena tikatianakanuana'i ena wa'i najakapanu'ini eta nurey-wa'i, iáminanuyare ani te numira'u. Ekapapajikawaka te numira'u.’ ”

Ema Jesús tisiapa te Jerusalén

²⁸ Te tamutupa eta juka máimituresira'i, ema Jesús tímiyanawawarepa tipaika'i, makaiju'epa te Jerusalén.

²⁹ Te títekapapa te tachakaya eta Betfagé tási'a étapa te Betania, te tachakaya eta masi'i tikaijare Ulivukiji, mawanekawakapa ena apinana máimitureana,

³⁰ máichawakapa: –Eyanayare te jena awasarechicha, tási'a te ítekapapa, íma'ayare eta burriku tikaiti'a'i, eta jena sárare máwaeke'echa'a, nájinaicha'a nakapera'ini. Evejapuakayare, tási'a iáminanuyare.

³¹ Te natiari'inapuka nákani nayasereka'e, ¿taja'a takayema eta evejapuaka'i? Emetakayare ema Tata makamunuyare.

³² Ena máimitureana tiyananapa, tási'a nachimapapa, étapaichu'i eta mametarapi'i ema Jesús.

³³ Te navejapuakaipa eta burriku, ena tikaye'eana nayaserekapa: –¿Taja'a takayema evejapuakaya?

³⁴ Ena najikapapa: –Taicha ema Tata makamunuyare.

³⁵ Tási'a, náepakamaekechapa eta náepaku'ana taye'e eta burriku, tási'a náminapa ema Jesús, tási'a náimiperachapa.

³⁶ Te náima'apa ema Jesús eta mapaisirapa'i, ena achaneana náepakapaikapaipa'i eta naepaku'ana te achene.

³⁷ Tási'a eta napaisira'i, témirikanapaipa te tachausi eta masi'i Ulivukiji, namutu ena té'ikanapa'i tipiarakanapaipa eta náurisamurewa'i, taicha eta náima'akeneana'i tiáramikareana máichakeneana'i ema.

³⁸ Naka'epaipa'i: –¡Yare piti rey-kene'i, wanairukavi'i te maijare ema Viákenu! Asulupaya ¡Puiti te anuma vikutikaka'i eta viúrisamurewa'i víti te juka apake'e! Tétávikawa eta vikunachira ema Viya eta makatajisira'avi'i.

³⁹ Taka'e, eta nasamirapa'i ena fariséuana natiari'ikeneana'i eta napiarasirapa'i ena achaneana, náechejikapa ema Jesús: –Tata maestro, pikamatinakawakaichu ena nani te'íkavianapa'i.

⁴⁰ Ema Jesús majikapawakapa: –Numetaka'e puiti, te namatinapuka ena nani, táitsiwasera étainapa tipiarakaya eta máriana.

⁴¹ Te, títekapanapa te tachakaya eta Jerusalén. Eta máimaira'i ema Jesús eta awasare, tíya'apa táicha.

⁴² Maka'epa: “¡Páurevisami piti náwasasami Jerusalén. Te nákaikutiaraini apaesachichaina'ini ena pichichanaveana'i eta nuwaraira'i nukuchuku'awaka! Puiti juka sache nutiari'iraipa ani piye'e, náuri'aine'i nákamapurawa'ini eta náurikakarewa'ini.

⁴³ Taicha járajapayare eta sácheyare táetaviuchawaya eta nakatajiwairaya, ena piánaranaya tichayakavianayare. Té'avianainapa, tájinapa piviyawaima'i pikatiuchiawaima'i,

⁴⁴ Témestapaikavianainapa te apake'e. Nakapapajikawakainapa ena pichichanaveana. Tájina nakaemachakenéma'i eta peti. Tamutuyare nákipapaika. Eta piviurewaya, eta juka pimajakapiranu'i eta néjirairavi'i nuti mawanerunu'i ema Viya.”

Ema Jesús makuchuchujikawaka ena tíjararekana'i eta sárareana,

⁴⁵ Taka'e, ema Jesús tisiapapa te mapena ema Viya. Máima'aine'i ena achaneana tíjararekana'i eta sárareana, káyureana, makuchuchujikapa,

⁴⁶ tási'a máichawakapa: –Taka'e'i eta táechejiriruwa'i eta Takapika'ukene Ajureka: ‘Eta nupena táikuchi'i eta nayujarasirareya ena achaneana’, étisera tiámera'iana ekasiapawapa eta te juka, emaeperajikapa eta takapika'uira'i.

⁴⁷ Ema Jesús tamutu'i sácheana tímitureka'i taye'e eta mapena ema Viya, tási'a ena tachutiri'ana naye'e ena tiyujarakara'iana, tási'a énapa ena escriwánuana, napanerechaipa'i eta nawaraira'i nakapaka ema.

⁴⁸ Wá'isera napatsikawa'ini, taicha natiari'i'i ena kamurikeneana achaneana tisamararakana'i eta máimiturapiana ema.