San Lucas 18 - Táurinakene máechejiriruwa’i ema Viya tikaijare

Ema Jesús máimikutichinaware ema juez ésupa esu tepenaima

¹ Ema Jesús máimitukawakaware ena máimitureana wa'i nakukainajiruwa eta nayujarasiraina.

² Ánipa máichawaka'i: “Matiari'i ema achane juez taye'e eta awasare, ema wa'i mapikaucha'ini ema Viya. Nájinaware mapikauréna ena achaneana.

³ Sutiari'iware te awasare esu ésuna esena suépenaimakene'i, suchawauruirika'i ema juez taicha eta sumetauchira'i ema sukatianaru'i.

⁴ Émasera ema juez wa'i masuapa'ini eta sumetauresira'i esu, wá'isera sukainajiruwa'ini. Tási'a, mapanerekene'apa: ‘Wa'ineni nupika ema Viya wa'iware nupikauchawaka ena achaneana,

⁵ esusera esu suka esena, nuyakujipa eta suchawarasira, níchainepuka eta suwara'akene'i, apaesa waipa sukuápechawa suíteka.’ ”

⁶ Tasi'a ema Viákenu maka'epa: “Puiti, nuwara'a ekaikutiara eta juka makayemakene'i ema juez mapikauruira'a.

⁷ Ene maka'e'i ema Viya, wa'i máyererejima'i eta makatiuchira'ewaneya eti manerejiruana'i, esamakareyare'i taicha eta emakainajiruwaira'i eta eyujarasiraina'i tamutu sácheana, yátiana ¿tiyereyarepuke eta majikapira'e?

⁸ Wa'i jakaini enewaneyare'i jikapa'e, étaipa te táitekapa eta nuchavirayare nuti Manerejirunu'i ema Viya, ¿nuchimapayarecha'apuka ena tikasiñanuanayarecha'a ani te apake'e?”

Ema achane kasiñawawairika emapa ema achane tiuri

⁹ Ema Jesús apanaware eta máimikutichina'i eta máimituresira'i, naye'e ena tímijachawana'i tiúriana, tájina náichirawaina'i; náepuruwaka'isera ena apamuriana achaneana:

¹⁰ “Natiari'i ena apinana ajairana te templo, téñauchawana'i: Ema émana achane, fariseona ema apana achane, tisipekaturara'i.

¹¹ Ema fariseo, tupi'a'i eta maeñauchirawa'i, ánipa maka'e'i: Nu'asulupayachavi, Tata, eta núriwa'i te pimira'u, wa'i nákuti'ini ena apamuriana achaneana tiámera'iana'i, tisipekaturana'i, esenamareana'iware. Wá'iware nákuti'ini ema máka achane te juka nuchakaya ema tive'ara'i eta viyase'ana.

¹² Píti pímatinu'i eta api'eira'i níjimachawa te semanana. Níjarakaviware eta plata nuganareruasa, wa'i nuyawana'ini eta námawa'uasana eta piye'e.’

¹³ Émasera ema apana achane wa'i máemeña'awa'ini. Tiyere'ichucha eta máeñauchirawa'i. Wá'iware mapatsikawa'ini máesenika'ini te anuma, té'atupachawa'isera eta máeñeuchirawa'i, ánipa maka'e: ‘¡Tata, nukatisamurewa ichape eta nukapekaturaira'i piye'e. Pájapanunusera piperdonachanu eta nupekaturana!’

¹⁴ Tiuri, nutupiru numetaka'e: Ema maka achane, eta machaviraipa'i te mapena, tijakapakaréine'i me Viya taicha yátupi'i eta máeñauchirawa'i. Émasera ema fariseo wa'i majakapakare'ini. Taicha nákani tikasiñawawaikana'i, tímijachawana'i tikunachakare'i, ena tépurukareanayare'i me Viya. Nákanisera ena tiyaseakana'i ema Viya eta májapanuirawakaina, yátupi'i tijakapakareanayare'i maye'e.

Ema Jesús mayujaraucha ena amuyana

¹⁵ Éneichuware, námawakapaipa'i ena amuyachichana eta maye'e ema Jesús. Nawaraira'i máemama'akawakayare'i, énasera te naima'apa ena máimitureana tepanawanapa nakájacha'i ena tiámanapa'i ena amuyana.

¹⁶ Taka'e ema Jesús máichu'awakapa, tási'a maka'epa: –Ésamirikachucha ena amuyana, náitekaicha'a eta nuye'e. Taicha eta mawasa ema Viya akenuka te anuma, naye'eyare'i ena nani nakutiana'i ena.

¹⁷ Nutupiruwa numetaka'e, mákani wa'i makukuti ema amuya eta masuapajiraiwa, wa'i tisiapaima'i te mawasa ema Viya akenuka te anuma.

Ema achane riku téchejirikawa maye'e ema Jesús

¹⁸ Ema tachutiri'apa'i mayaserekapa ema Jesús: –Tata maestro, ¿tasája'apukaini nícha'ini eta taurikene, apaesa máichekuarakirena'ini eta nítaresira?

¹⁹ Ema Jesús majikapapa: –¿Tája'a takayema pímijarechanu Piti piúrikene? Najina emanaina tiurina, emanaichu ema Viya. Jé'eware ema, tétavikawa'i eta máuriwa'i.

²⁰ 19 Pechaipa eta mawanairipiana: ‘Wa'i pikukapareka, wá'iware pikuve'a esu esena apayena, wá'iware pikuamereka, nakuija pepiyáekeneruina, wá'iware pikuwayuareka, pipikauchayarewa ena tikachichaviana.’

²¹ Ema achane máichapa: –Tamutuipa'i eta juka nítaucha'i eta námaperuwa'i.

²² Te masamapa eta juka ema Jesús májikapapa: –Jukari'icha'a eta pítauchakeneyare: piyana píjararekaya tamutu eta píma'akeneana, tási'a píjarakawakapa ena páureana. Jé'eware eta pijakapayare eta píma'akeneyare te anuma. Tási'a pitekapa pé'ikanu.

²³ Émasera ema achane te masamapa eta juka, katisamurewaine'i, taicha ema mawayucha'i eta marrikuwa'i.

²⁴ Eta máimaira'i ema Jesús máichawakapa: –¡Máitujianaya ena ríkuana eta nasiapiraina'ini te mawasa ema Viya akenuka te anuma!

²⁵ Maejerarepana eta tasiapira eta vipera camello taye'e eta ánikuchicha tapaja, eta masiapiraina'ni ema achane riku taye'e eta mawasa ema Viya akenuka te anuma.

²⁶ Ena achaneana tisamararakana'i, nayaserekapa: –¿Tási'a nája'apapuka títujikawanayare tiuchuku'ana?

²⁷ Ema Jesús, majikapapa: –Nájina émanaina achane émajiwaima'ini tikuchuku'awa, makarichu marata'a tikuchuku'a'avi ema Viya.

²⁸ Ema Pedro máichawarepa: –Tata vítisera, tamutu eta vikaye'ekeneanaini vinakika'i, viwaraira'i vé'ikavi.

²⁹ Ema majikapawakapa: –Nutupiruwa numetaka'e, namutu nákani nanakika'i eta napena, najunijika'iware ena tikachichana, ena naparapenaveana, ena nayenana, ena nachichanaveana, táichavene'i eta mawasa ema Viya akenuka te anuma,

³⁰ najachapayare eta taitsiwayare te juka apake'e. Tási'a te táitekapapa te apana víitaresira tavetijinapa, máichekuarakirenapa.

Ema Jesús tiápechawaware máechejisi'a eta máepenirayare

³¹ Ema Jesús maichu'awakapa ena dúsekeneana máimitureana, tási'a máichawakapa: “Puiti, vikaiju'épa'i te Jerusalén, ánaki táitauchiawayare tamutu eta nájukunachakeneana'i ena profetanaini eta maíchararakawayare'i ema Machicha ema Ajaira.

³² Naijararekainapa naye'e ena suntaruana rumanuana, nakaeka'inapa ema, nakaetemajirikainapa tási'a, nátutukichainapa.

³³ Nae'ainapa, tási'a naemetatarekainapa te crusu, tási'asera te mapanakenenapa sache, téchepukainapa te maékari”

³⁴ Énasera ena máimitureana wa'i nakaikutiara'ini eta juka mametasirawaka'i. Wá'iware náimatiekene'a'ini tája'apuka eta máechejisi'a'i.

Ema Jesús makaimairika ema achane púchuki tikawasa te Jericó

³⁵ Te tiáne'ipa títekapa ema Jesús te awasare Jericó. Matiari'i'i ema púchuki, téjakana'i te achenechakaya. Tiyasesereka'i eta limusna,

³⁶ Te masamapa eta mánukuirapa'i ena achaneana, makayasesererupa tája'a'ipuka eta téchakare'i.

³⁷ Nametakapasera eta émaira'i tiánuku'ayare'i ema Jesús Nazareno.

³⁸ Taka'e, tipiarakapa ema achane púchuki: –¡Tátachicha, pítikeneipa yátupikenevi'i Cristo pikatajika'avipaini pájapanu'avi!

³⁹ Taka'e, nakawakapa ena natiari'ikeneana'i, apaesa mamatina'ini, emasera tipiarekapanapa muraka: –¡Tátachicha, pítikeneipa yátupikenevi'i Cristo pikatajikanupaini pájapanunuini!

⁴⁰ Ema Jesús eta masamirawaka'i, titupi'apa. Makawanairipipa náepana ema púchuki, te nakaitekapa, mayaserekapa:

⁴¹ –¿Tája'a pikamunu nuye'e? Ema púchuki majikapapa: –Tátachicha, nuwara'a pikaimairikanupaini.

⁴² Máichapa ema Jesús: –Tiuri, nuchicha. Táichavene'i eta pikasiñawaira'i me Viya, pinarakapa puiti.

⁴³ Jé'esareine'i, tíja'uchawapa timairika ema púchuki. Taka'e, máe'ikapa ema Jesús, makunachapaipaware ema Viya. Énapa ena achaneana tímararakana'i eta manarasira'i, ichapeine'i eta nakunachira'i ema Viya.