San Lucas 1 - Táurinakene máechejiriruwa’i ema Viya tikaijare

¹ Némunarukene Teófilo, nukajurevi puiti apaesa pecha píti apanaware eta juka néchakeneana'i nuti. Ichapemuriana'i ena tiájuekene'ana'i eta máicharakawa'i ema Viákenu eta ani te vitaraku,

² Tamutu eta nájuekene'aira'i, taicha tamutu'i nukayasesereru naye'e ena tinekapaekene'ana'i, tíma'ana'i eta apaikape te táepanirawa'i eta máitaresira'i ema Viákenu.

³ Tetavikawa eta tauriwa eta nimaira'i te taekenepa eta nukayesereruira'i te taepaninewa eta vichakene'i, taka'e najuchinaviya eta juka apaesa pimatiekene'a yatupina tamutu piti Teófilo,

⁴ nuwara'a nímimatichavi apaesa yátupina pecha tamutu eta juka piárawa'uana'i.

Ema ángele makámetarapi eta máuchusirayare ema Juan tikachasirikara'i

⁵ Kape juka viásinekene'i te émaicha'a ema Aluresi akenuka'i, rey'i taye'e te Judea, matiari'i'iware ema achane tikaijare Zacarías. Ema, náumuriwana'i ena tikaijareana Abías. Eta náematanerepi ena, náechapajirika eta námawa'uasana ena achaneana taye'e eta templo. Esu mayena ema Zacarías tikaijaru'i Isabel, mámariekeneni'i esu ema víyara'aini Aarón.

⁶ Ema Zacarías ésupa esu mayena, tájina náichirawaina'ini te mamira'u ema Viya. Tamutu'i naitaucha eta mawanairipiana ema Viákenu, taka'e tájina náechejisiekenena'ini naye'e ena achaneana.

⁷ Nájinasera nachichaina'ini, macheru'i esu Isabel eta suítaresira. Wáipaware tikachichanaima'i, taicha tinunanaipa ichavikanaipa'i.

⁸ Te jena sache, náichu'apa ema Zacarías eta masiapirayare taye'e eta templo.

⁹ Taka'e, tikátuparakasipa ema. Émapa táetupiaka'i eta máematanerepiyare'i máijuchayare'i eta incienso te táina'u eta mesa náijuchirare'i.

¹⁰ Máijuchapa eta incienso. Ena apamuriana achaneana nanasipa te aneka, tiyujarakanaipa ena.

¹¹ Tiáramikarepa tímerekawa ema ángele te mamira'u ema Zacarías. Mawaneru'i ema Viákenu. Titupi'aipa ema te waure taye'e eta namawa'u náijuchirare'i eta incienso.

¹² Tiáramekaine'i ema Zacarías eta máimaira'i ema ángele.

¹³ Émasera ema ángele máichapa: –Zacarías wa'i pikupika, taicha ema Viya masama'i eta piyaseserepi'i píti eta maye'e. Puiti esu piyena Isabel tikachichayare. Juan eta máijareyare ema echichayare.

¹⁴ Ichapeyare eta piúrisamurewayare te máuchukapa ema echichayare. Énaipa ena achaneana, ichapeyarewa eta náurisamurewaya eta máuchusirayare.

¹⁵ Ema pichichayare, ichapeyare eta makunachakarewayare maye'e ema Viya. Wa'i písapaima'i tera eta vino, étaipa eta apamuriana térakareana murakakeneana. Taicha ema, eta máuchusirayare, máwa'áruyarepa'i ema Machanewa Viya.

¹⁶ Ema tétupirikayare eta táuriwayare eta napanereruana ena pijaneanana israelítana, tachavirayare eta nasuapirayare ema Viya.

¹⁷ Ema maka Juan, ema tínapumirauchayarepa'i ema Viya. Makutiyare eta máitupajijiasirawaini ema víyara'aini profeta Elías. Ichapeyare eta máitusirayare eta makajimuyasirayare eta nasamureana ena achaneana, apaesa tachawa eta nasuapiraina ema Viya, tákuti eta nasuapajiraiwaini'i ena náchukanaveanaini'i. Énaipa ena Wínarajipanereruana, tisuapajira'ianayarewa máicha. Mametakawakayare ena achaneana natsekawaipa eta najakapirayare ema Viákenu.

¹⁸ Ema Zacarías mayarekapa ema ángele: –Ichavika'avipa víti ¿Nicharakawa eta nusuapiraina yatupi? Eta juka vikachichairayarepuka.

¹⁹ Émasera ema ángele majikapawarepa: –Nuti nukaijare Gabriel. Nuti mawanerunu'i ema Viya. Nutuparakasiwaichu'i eta numetasiraviyare eta juka Arairu techakare.

²⁰ Puítisera úpaviyare. Eta ekutiarareyare piye'e, taicha eta pimasuapiranu'i. Tiámainukawa te táitauchawapa eta juka numetaruvi'i, péchejikainawarepa.

²¹ Taka'e, ena achaneana nanasikeneana'i te aneka nakuchaparairikaipa'i ema Zacarías, náramipa eta mayerewaipa'i te taju'e te templo.

²² Jé'esareine'i, te tiúchukapa ema Zacarías, waipa máechejika'ini. Náimatiakapasera ena, eta máechejisira'i ema Viya te taju'e. Tisuveverekapaipa'i ema eta mawaraira'i máimikutiarachawaka ena achaneana, eta yátupira'i masamakene'i. Úpapaipa'i ema.

²³ Te títauchawapa tamutu eta jena sácheana'i eta matuparakasiwa'i, tiyanapa ema Zacarías te mapena.

²⁴ Tási'a, esu mayena Isabel, tikajaripa esu. Wáipasera súchuchureka'ini te supena. Wá'iware sumetajirika'ini. Tiámainukawapa te títauchawayarepa eta sinkukene'i kaje eta sukajarira'i.

²⁵ “Ichape eta ñijapanuiranu'i eñi Viya, tíjarakanu'i eñi nuchichayare. Wáipasare nayunakaima'i ena achaneana eta numacheruwa'i.

Ema ángele makametarapi eta máuchusirayare ema Jesús

²⁶ Te saisikenepa kaje, ema Viya mápechaware mawaneka ema ángele Gabriel tiúkupaika taye'e eta awasare Nazaret te Galilea.

²⁷ Máukupauchapa esu amaperu esena tikaijaru María. Esu, tájina suímatiya'ini ema ajaira, matiari'ipasera ema suímayare'i, ema tikaijare José. Téjakaipa'i eta natratune. Ema, mámariekeneini'i ema víyara'aini rey David.

²⁸ Taka'e, ema ángele máukupauchapa esu taye'e eta suávi'a'i. Máichapa esu: –Pícharakawa, María. Piti manerejiruvi'i ema Viya. Tétavikawa'i eta piúrikakarewayare, taicha ichape eta majapanuiravi'i ema Viya. Pikachurika'i namutu ena apamuriana esenana.

²⁹ Ésusera tiáramekaine'i eta máechejisira'i ema ángele. Supanerekene'aine'i tája'a'ipuka takayema'i eta máechejisira'i ema ángele.

³⁰ Émasera ema ángele máichawarepa: –Wa'i pikupika, María. Piti manerejiruvi'i ema Viya.

³¹ Numetapanavi'i puiti eta pikajarirayare. Ajairayare ema pichichayare. Jesús eta máijareyare.

³² Tétavikawaya eta napikauchirayare ena achaneana taicha Machichayare'i ema Viya. Ichapekeneyare eta akenukairayare ema taicha ema Viya manakayarewa eta máwakureyare akenukayare. Makutiyare'i eta akenukaira'i ema máchukaini David,

³³ ema téchayare'i namutu eta awasare mawasa ema Jacob. Máepenakakayare eta akenukairayare.

³⁴ Tási'a, esu María, suyaserekapa: –¿Tája'asika táicharakawayare eta juka Taicha nuti nájinaicha'a nímaina'ini?

³⁵ Émasera ema ángele máichawarepa: –Pikachichayare taicha eta máitupajijiasirawa'i ema Viya. Timikáuchaviyare eta majaraiwa, tási'a, tisiapa'akavinapa ema Machanewa Viya. Eta taka'e, ema amuya pínaruyare, santuyare ema, taicha machichayare'i ema Viya. Náimatiyare namutu eta machichaira'i ema Viya.

³⁶ Pikutiyare esu pijaneana Elisabet, éneichuware tikajaripa'i esu. Tayanapane'i ichavikachichaipa'inéni esu, macheruini'ineni. Saisiripasera kaje eta sukajarira'i puiti.

³⁷ Taicha ema Viya, tájinakene máemaituka ema.

³⁸ Taka'e, esu María sujikapapa: –Nuti ñiwanaranuichu'i eñi Viya. Nutiari'i puiti. Ñíma'anuinepa eñi, eta ñícharakanuyare te ñiwanairipiana. Taka'e, eta masamira'i ema ángele, tiyanapa tichawa'i.

Esu María suéjirapanapa esu Isabel

³⁹ Taka'e, te jena sácheana titátajipa esu María tiyana taye'e eta awasarechicha te tatarakukujiana'i eta máriana taye'e eta tinapaika te Judea,

⁴⁰ te títekapapa esu María taye'e eta mapena'i ema Zacarías, suéchejikapa esu Isabel.

⁴¹ Te susamapa esu lsabel eta sua'u esu María suéchejisira'i, tiyamurikaine'i eta amuya te suju'e esu lsabel, énewanepa máwa'aka'i esu ema Machanewa Viya.

⁴² Taka'e, téchejikapa muraka esu lsabel, suíchapa: –¡Píti, tétavikawa'i eta piúrikakarewa'i ñicha eñi Viya. Pikachurika'avi'i vimutu viti esenana. Éñiripa eñi pichichayare, tétavikawa'iware eta ñikunachakarewaya!

⁴³ Nusapi'asamipa nuti péjirapananu'i piti ñénaviyare'i eñi Nákenu.

⁴⁴ Te nusamapa eta pia'u eta péchejisiranu'i, tiyamurikaine'i te nuju'e eñi nuchicha, taicha eta ñurisamurewa'i eñi.

⁴⁵ ¡Tétavikawa eta piúrikakarewaya píti taicha eta pisuapajiraiwa'i ñiye'e eñi Viya. Títauchawainapa tamutu eta ñimetarapi'i eñi Viákenu eta piye'e!

⁴⁶ Taka'e, esu María suka'epa: “Ichapemuri'i te náchanewa eta nukunachira'i eñi Viákenu,

⁴⁷ taicha tétavikawapa eta táurisamurewa eta nusamure ñicha eñi Viya tikatiura'ikene eta nuye'e.

⁴⁸ Taicha eñi Viya tinerejikanu'i nuti páurenu'ineni ñiwanara'i, taicha namutu ena achaneana natiari'ikeneana'i puiti, tási'a énapa ena arajuruanayare, tetavikawainapa eta nakunachiranuyare

⁴⁹ taicha eñi tétavikawapa eta Ñítupajijiasirawa'i tíjarakanu'i eta núriwayare'i ñicha. ¡Je'eware eñi Santukene'i eta ñijare!

⁵⁰ Eñi Viya ñijapanuwaka'i nákani tipikauchanayare eñi, nachichanaya ena arajuruanayare.

⁵¹ Taicha ñicha'i eta ñítupajijiasirawaya: ñikaerajikawakaya eta napanereruana ena tikasiñawawairikana.

⁵² Nákani reyeana ñikapakechawakayare'isera eñi nasapi'apa ena páureanasami'i, ñinerejiruanaya ena ñijupa'anayare.

⁵³ Ñíjarakawakapa ena teku'anapa'i tási'a ena rikuana ñikaerajikawakapa mawawa'uanapaipa.

⁵⁴ Ñímikataka'i eta awasare Israel, eñi ñichanera, tási'a wa'i ñemitisika'ini eta ñijapanuirawaka'i.

⁵⁵ Eta taka'e'i eta ñimetasira'i ena viáchukanavanaini, eñi Abraham, tási'a énapa ena náekenereruana arajuruana.”

⁵⁶ Sunasipanapa esu María te supena esu lsabel, mapana kaje eta suyerewa'i, tási'a tichawapa te supena.

Eta máuchusira ema Juan Tikachasirikara'i

⁵⁷ Taka'e, títauchawapa eta sukajera esu lsabel, suínakapa ema suchicha.

⁵⁸ Tiyananapa ena sujaneanana, énapa ena suchakayapenana'i náejirapana'i, tiúrisamureanaine'i namutu ena, táicha ema Viya majapanu'i esu.

⁵⁹ Te uchukenepa sache eta máuchusira'i ema amuya, námapa, nanakayarepa eta maikutiarayare, eta naechatikuerechanayare'i eta taparumakuerena eta make'e ema amuya. Tási'a nawara'apa nanakayare'i eta máijareyare Zacarías, mámapikayare'i eta máijare ema máiya.

⁶⁰ Ésusera esu maena suíchawakapa: –Wa'i. Juan eta ñíjareyare.

⁶¹ Najikapapa ena: –Nájina tikaijarena eta Juan, ena pijaneanana.

⁶² Taka'e ena, náimikutiarachinapa eta nayaseresira'i ema Zacarías, tája'apuka eta máijareyare'i maicha ema amuya.

⁶³ Ema Zacarías mayaseakapa eta táblamechicha, májuchi'ayare'i eta máijareyare'i ema machicha: ‘Juan eta máijareyare.’ Náramine'i ena, taicha eta máijareyare'i ema amuya.

⁶⁴ Tási'a, tíja'uchawapa tichawapa eta máechejisira ema Zacarías. Makunachapa ema Viya eta máurisamurewa'i.

⁶⁵ Ichape eta tiáramikare'i naye'e ena natiari'ikeneana'i. Nasamairikawanepa namutu ena tikawasana'i te awasarechichana te Judea. Náechejisi'apa eta juka nasamairiruana'i.

⁶⁶ Namutupa napanerekene'a'i. Nákani tisamairikanapa'i, tiyaserejirikakanaipa. “¿Kañari'i takayemakene'i eta juka máuchusira'i ema amuya?” Táicha ema amuya, tétavikawa'i eta majaneasira'i ema Viya eta majurusirapaipa'i.

Eta majirarapi ema Zacarías

⁶⁷ Ema Zacarías, maiya ema amuya, makunachaipa ema Viya, taicha máwa'akaipa ema Machanewa Viya, tási'a tikametarairupa. Ánipa maka'e'i:

⁶⁸ “¡Kunachakare ema Viákenu, ema Viya naye'e ena Israelitana, taicha ema titeka'i makuchuku'apana eta mawasa!

⁶⁹ Mawaneka'i ema yátupikene Makatiuraiwa, ema émana'i mámariekene'i ema David, ema mawanaraini'i ema Viya.

⁷⁰ Etaipa'i eta juka maikure'avi'i eta akane naye'e ena santo profetanaini:

⁷¹ ema tikatiucha'aviyare'i naye'e ena vianaramuriana tási'a namutu ena tikaticha'aviana'i,

⁷² taicha ema majapanuirawakayare'i ena viáchukanaveanaini tási'a wa'i maemitisikaima'i eta matratune'i.

⁷³ Tási'a eta'i eta juka, eta maechejiriruwa, maye'e ema tata Abraham: eta maisapira'aviyare,

⁷⁴ wa'i vikupika eta vitaresira, taicha ema tikatiucha'aviyare'i naye'e ena vianaramuriana, taka'e vitatinapa ema

⁷⁵ eta víchiraya eta taurikeneana, tási'a vika'erayare'i te mamira'u ema tamutu eta vítaresira.

⁷⁶ Píitisera nuchicha, píchuarekasiwa'i maye'eviyare profeta ema Ichape Vikaiyakene, taicha piti pinapumirauchaya ema Viya petupirikaya eta achene,

⁷⁷ apaesa pimimaticha eta mawasa eta makaepa'airaya ema Viya eta napekaturana tási'a maijaraka'i eta nauchukuiraya.

⁷⁸ Taicha ema Viya ichapekene'i eta majapanuira'avi'i, mamina'avipa'i te anuke'e takuti'i eta sache te yatikara'i,

⁷⁹ ema maijaraka'i eta majaraiwa ena tiavi'ana'i te ichapekene mapiku'ana, tási'a timecha'aviya eta tauriwaya eta vipaisira te taurikakarekene achene.”

⁸⁰ Ema amuya eta majurusira'i, tiámawaipa'i eta masuapajiraiwa'i maye'e ema Viya. Wá'iware étaina'ini te taju'e eta awasare eta majurusine'i. Wáma'ikuru'a'i eta majurusira'i. Tiámainukawapa te ajairapa, tímerekawapa naye'e ena israelítana, tépanawapasera tikametarairu.