San Juan 4 - Táurinakene máechejiriruwa’i ema Viya tikaijare

Ema Jesús tás'ia esupa esu esena Samaritana

¹ Taka'e nasamairikapa ena fariseona, eta kamurianaipa'i ena tíjarakawana'i náe'ikaya ema Viákenu. Tási'a kamurianaipa'iware ena maikachasiruana'i, naye'e ena máikachasiruana'i ema Juan,

² éna'isera ena máimitureana ena tíkachasikawaka'i ena achaneana, wa'i émaina'ini ema Jesús.

³ Te tisamauchawapa ema Jesús, majunijikapa eta Judea, tiyanapa tichawa'i te Galilea.

⁴ Eta mapaisirapa'i, tiánukupaikayare'i eta te tinapaika te Samaria.

⁵ Taka'e títekapanapa te Samaria, eta awasare tikaijare Sicar, te tachakaya eta maye'e apake'e ema Jacob, eta juka apake'e maye'e'i herencia ema José, maijararu'i ema maiya.

⁶ Ánaki tatiari'i'i pusu naisirare'i, maye'e ema Jocob, eta mavitairapaipa'i ema Jesús, tíchekanumapa te tachausi eta pusu. Tupiriku'aipa'i eta sache te anuma.

⁷ Ena máimitureana tiyananapa tiwacharepananayare'i eta tinikakare te awasare.

⁸ Taka'e suka'epainecha esu esena samaritana tíkapanayare'i eta te pusu, tási'a ema Jesús máichapa: –Pijarakanu eta une nerayare.

⁹ Taicha ena israelítana, tási'a énapa ena samaritanoana wa'i náurianakaka'ini, esu esena sujikapapa: –¿Tája'a takayema piyaseakanu eta une? Nuti samaritánanu'i, wa'i pijaneananuina'ini.

¹⁰ Ema Jesús májikapapa: –Te pímati'ini eta mawara'akeneana'i tíjarakavi ema Viya, té'eware pímatinu'iwareni nuti nuyaseakavi'i eta une, németeaka piyaseakanuipa'íni eta une tikaitarekara'i. Tási'a, nuti níjarakavi'ini.

¹¹ Esu esena suíchapa: –Tata, tájina piviyaima'i eta une, eta pusu tiupena'i. ¿Távi'asika tási'ayare eta une tikaitarekara'iya?

¹² Eñi viáchukaini Jacob, vímaekene'a'i eta juka pusu ñépiyaru'i. Ñérirareni'i eñi, énapa ena ñichichanaveana. Éneichu'iware táeri'a'i eta ñiye'eanaini sárareana. Piti pímijachawapuka pikuchuka'ini eta tiúriamapana une.

¹³ Ema Jesús májikapawarepa: –Namutu nákani térana eta juka une, tiápechawanayare'i timauneanaya.

¹⁴ Nákanisera téranayare eta une níjararuyare'i nuti, waipa tiápechawanaima'i timauneana. Máichekuarakirenapa eta náitaresira.

¹⁵ Esu esena suíchapa: –Tata, píjarakanupaini eta une tikaitarekara'i, apaesa waipa nukuapechawaini numaune. Wáipawareni nukuiteka'ini eta te juka pusu népana eta une.

¹⁶ Ema Jesús máichapa: –Piyana, píchu'apana ema pima. Piáma eta ani.

¹⁷ Esu esena sujikapapa: –Nájina nímaina. Ema Jesús máichapa: –Pitupiruwa eta juka pimetasiranu'i eta nájinaira'i pímaina'ini.

¹⁸ Taicha sinkuanaipa'i ena pímanaveanaini'i, tási'a puiti, ema pikachanekene'i wá'iware pímaina'ini. Pitupiruwa'i eta péchejiriruwa'i.

¹⁹ Te susamapa eta juka, esu esena suíchapa: –Tata, németeakavi'i eta pítikeneravi'i profeta.

²⁰ Taicha ena viáchukanaveanaini samaritánuanaini, eta nayujarasiraréni'i eta te juka táina'u eta mari. Étisera eti israelítana, eta emetarapi, eta viyujarasirareyare ñe Viya, té'enapa te Jerusalén.

²¹ Ema Jesús májikapawarepa: –Nutupiruwa numetakavi, ánipa táenasi'ayare puiti, wáipa tákamesaima'i íteka eyujaraka me Tata, te juka táina'u eta mari, etaipa eyana'ipukaini te Jerusalén.

²² Eti wa'i ímati ema eyujaraure'i, vítisera vímati'i ema, taicha eta máechejiriruwana ema Tata, eta makuchukuirayare namutu ena achaneana tikasiñawana'i maye'e.

²³ Ema Tata, jé'eware ema, yátupikene'i Viya. Eta taka'e, nákani tiyujarakana maye'e, tatupiruwayare eta nasamure, tisuapajira'iana'yare taye'e eta máechejiriruana.

²⁴ Ema Viya Espíritu'i ema, nákani tiyujarauchana, tawara'a'i maicha eta je'esarekenena. Eta juka taka'eyare'i eta mawara'akeneana'i ema Tata eta eyujarasirayare'i.

²⁵ Esu esena suíchapa: –Nuti necha'i eta ñítekapirayare'i eñi ñiwaneru eñi Viya (eñi naichakeneasa'i Cristo), techakare'iware eta ñimetasira'aviyare'i tamutu.

²⁶ Ema Jesús majikapapa: –Nútira nuti mawanerunu'i ema Viya. Nútira ekuchapakenenu'i.

²⁷ Tási'a, títekapanecha ena máimitureana, taka'e, náramine'i eta máechejirisirawa'i eta suye'e esu esena, viwara'a'i viyasereka esu esena tája'apuka suwara'a eta maye'e. Viwara'a'iware viyasereka ema Jesús tája'a takayema eta máechejisira'i esu esena. Wá'isera vipatsikawa viyasereka'ini.

²⁸ Tási'a, esu esena sunakikapa eta suyupi. Tijunapapa tiyana te awasare, sumetapanawakapa ena achaneana. Te títekapapa, suíchawakapa:

²⁹ –Yare, íma'aya eñi achane ñímati'i tamutu eta níchakeneana'i néjekapirawana'i. Tamutu'i ñikuchuchujisinánu'i. ¿Wa'ipuka éñina ñiwaneru'i eñi Viya, vikuchapakene'i tikaijare Cristo?

³⁰ Ena achaneana sumetaruana'i tiyananapa náe'ika esu eta te mávi'a'i ema Jesús, náima'apanayare'i.

³¹ Eta nayerewapaicha'a ena achaneana suíchu'akeneana'i esu esena, ena máimitureana naichu'apa ema Jesús tiníkanumayare'i: –Tata maestro, yare pinikanuma, apaesaina piáwamina.

³² Tási'a, ema majikapapa: –Nuti, jukari'i eta tinikakare tanikasare'i eta náchanewa emáimatiekeneru'i eti.

³³ Tási'a, ena maimitureana náichakakapa: –¿Náenikaipapuka jákani?

³⁴ Ema Jesús máichawakapa: –Eta tikaitarekanu'i nuti, eta nítauchira'i eta mawanairipiana ema Nukaiyakene, taicha nuwara'a nítauchaya tamutu eta nuwana'i'i maye'e.

³⁵ Eta viye'erepi te véchejiriruwa: ‘Puiti vítapa eta véwasirapa eta trigo, kuatruyare kaje eta vikuchapira eta vikurujisiraya’ naka'e'i. Puítisera numetaka'e núti: Waipa táyerema'i eta vikurujisirainapa. Ésenika puiti te achene, nárajapa ena achaneana ena néwarakiana'i.

³⁶ Ema Tata tíjaraka'eya eta íkuchiyare te ímikatakanu eta vikurujisira ena nani achaneana apaesa náuchuku'a, máichekuarakire eta náitaresira. Tási'a, tétavikawaya eta viúrisamurewa vimutu viti, nútipa.

³⁷ Yátupi eta takayemakene eta panereruka, ani taka'e'i ‘Vítira véwaka'i eta vésane, apánapasera ema techatijikana'i.’

³⁸ Nuti nuwaneka'e'i eti ekurujisiraya eta néwaru'i. Éneichuware narari'i'i ena tínapukana'i viye'e eta nakaematanera'i eta juka, puiti viwapinawaya eta víkuchiyare taicha vikutikaka'i eta vikaemataneasira'i ema Viya.

³⁹ Ena tikawasana'i te jena awasare Samaria, kamurikeneana'i ena tisuapana'i eta sumetasirawaka'i esu esena: “Eñi timereuchanu'i tamutu eta nichakeneana'i.”

⁴⁰ Taka'e ena Samaritanuana te titekapanapa, naichejikapa ema Jesús eta mánasinuma naye'e ena. Taka'e ema manasinumapa apina sache,

⁴¹ tási'a namutupa nasama'i eta máimiturapiana, taka'e, kamurianaine'i ena yátupipa tisuapana'i, té'ikana'iware ema.

⁴² Tási'a, náichawarepa esu esena: –Puiti émakenepa visama'i. Waipa tákarichu'ini visuapa'ini eta pimetarapi'i. Véchapa viti apanawa eta émakenera'i ema Cristo, ema vikuchapakene'i, ema tikuchuku'a'aviyare vimutu viti achaneana.

Ema Jesús makanaraka ema machicha ema tuparairuka majupa'a'i ema rey

⁴³ Te táekenepa eta apinakene'i sache, tiyanawarepa ema Jesús, makaiju'e eta te Galilea.

⁴⁴ Taicha émaichu'i maka'e'i, ema profeta, wa'i najachapaima'i te mawasa.

⁴⁵ Té'esera te máitekapauchapaipa ema Jesús eta awasarechichana tinapaikana'i te Galilea, namutu najakapa'i. Taicha náimatipa ema taicha náima'apa eta tiáramikareana máichakeneana te mávi'aipa te Jerusalén te jena piéstaira'i eta Pascua.

⁴⁶ Ema Jesús tichawapa te Caná te Galila, eta te máepiyasine'i vino eta une. Tási'a ema majupa'a ema rey, matiari'i'i ema machicha tikajuma'i te Cafarnaúm.

⁴⁷ Te masamairikapa ema nakapitara ena suntaruana eta máitekapira'i ema Jesús, másinepa'i te Judea, titekapapa te Galilea, tiyanapa maima'apana'i, tási'a makamesapa eta mayana'ini te mapena, makanaraka'ini ema machicha, taicha ema tiáne'ipa tépenayare'i.

⁴⁸ Ema Jesús májikapapa: –Eti wa'i esuapanuima'i, te wa'i nímecha'e'i eta tiáramikareana.

⁴⁹ Émasera ema nakapitara ena suntaruana máichapa: –Tata pikatajikanuchucha. Pé'ikanu, machu máepenakaru ema nuchicha.

⁵⁰ Taka'e ema Jesús maichapa: –Pichawa te pipena, ema pichicha wa'i tépenaima'i. Taka'e, ema achane masuapapa eta máichira'i ema Jesús. Tiyanapa tichawa'i te mapena.

⁵¹ Te tiáne'ipaipa'i títekapa te mapena, nákapapa ena makajurureana. Náichapa: –¡Ema pichicha tinarakaipa'i!

⁵² Ema mayaserekawakapa, ¿tája'a ura te tinarakapa ema nuchicha? Tási'a ena nájikapapa: –Kape te las una te kápere'i, táetaviakapa eta fiebre.

⁵³ Ema achane máechapa, étaichu'i eta ura eta mametasira'i ema Jesús eta manarasiraipa ema machicha. Taka'e, ichapeine'i eta masuapira'i ema, énapa ena machichanaveana'i te peti, eta émaira'i ema Cristo.

⁵⁴ Eta juka eta tápinane'i eta tiáramikare'i máichakene'i te Galilea, te táekenepa eta machavira'i eta te Judea.