San Juan 21 - Táurinakene máechejiriruwa’i ema Viya tikaijare

Tímerekawa ema Jesús naye'e ena sietekeneana máimitureana

¹ Te taekenepa eta juka, ema Jesús tiapechawaware timerekawapa naye'e ena maimitureana, te tachausi eta Kákiure te Tiberias. Tasi'a ánipa taka'e:

² Natiari'iware ena apinana naimijareru ema Simón Pedro emapa ema tomás ema naimijarecha chame, ema Natanael, ema tikawasaini'i te tikaijare Caná te Galilea, ena machichanaveana ema Zebedeo ema Santiago emapa Juan natiari'icha'aware ena apinana maimitureana ema Jesús.

³ Ema Simón Pedro maichapa: –Nuyana nenikayare. Ena najikapapa: –Viti'apanaware ve'ikaviyare. Taka'e tiyananapa, tiawaku'anapa te pakure; taka'e jena yati tajina naitukawa'ini eta jima.

⁴ Te tijárara'ichichayareipa, titupi'aipa'i ema Jesús te tachausi eta kákiure. Ena maimitureana, wá'isera naímatiwane'ini ema.

⁵ Ema Jesús mayaserekawakapa: –Nuchichanaveana ¿Tájinaicha'a íturewaina eta jima? Ena najikapapa: –Tájinaicha'a.

⁶ Ema Jesús maichawakapa: –Iákijieka eta yuta'e te apachakaya eta pakure tinapaika'i te waure. Eta ítusiawayare eta jima. Taka'e naicha'isera. Te nachuruekapa eta naye'e yuta'e, waipa naíchina'ini nachurueka, taicha táetaviucha'i eta kamurira'i eta jima.

⁷ Tási'a, ema máimiture maemunarupana ema Jesús maichapa ema Pedro: –¡Émara ema Tata! Masamineichu'i ema Pedro eta maíchira'i, tikamuiri'awanepa taicha mamuriare'i ema. Tási'a tépu'ekawapa te une, mawaraira'i makapayakawaneyare'i ema.

⁸ Ena apamuriana maimitureana titekapanapa te tachausi. Nachuruekapa'i eta napakure etapa eta nayuta'e, tínikapaipa'i eta kamurikene jima. Cien métruichu'iserapuka eta tayere'ira'i eta tachausi.

⁹ Te tiúkupaikapa te tachausi, naíma'aine'i eta yuku timuru'i, étapa eta jima jitaruka, étapa eta pan.

¹⁰ Ema Jesús máichawakapa: –Iáma eta íturewana'i jima.

¹¹ Ema Simón Pedro machurupaikapa eta yuta'e. Tinika'i eta ichapemurikene jima. Ciento cincuenta y tres eta tasimuriwa'i. Wá'isera táetsayuka'ini eta naye'e yuta'e.

¹² Ema Jesús maichawakapa: –Yarepa, enika. Tási'a, wá'isera napatsikawa'ini ena máimitureana nayasereka'ini te nája'a'ipuka ema, taicha tétavikawa'i eta náramesira'i. Naímatiaka'isera eta émaira'i ema Tata.

¹³ Tási'a, ema Jesús témeña'awapa. Mave'apa eta pan. Maíjarakawakapa. Étapa eta jima táimakikenepa.

¹⁴ Eta juka, mapa'ekenepa eta máimeresirawa'i ema Jesús eta naye'e ena máimitureana eta máechepusira'i te máekari.

Maechejiriruwa ema Jesús maye'e ema Simón Pedro

¹⁵ Te títanesianapa eta nanisira'i, ema Jesús mayaserekapa ema Simón Pedro: –Simón, machicha ema Juan, ¿Pikachurikapuka píti ena nani, eta pémunasiranu'i? Ema Pedro majikapapa: –Némunakavi, Tata. Péchaichu'i píti, eta némunasiravi'i. Ema Jesús máichawarepa: –Tiuri, nuwara'a pijaneasinanuwaka ena té'ikanuanayare.

¹⁶ Te táekenepa eta nanisira'i, mápechaware mayasereka: –Pedro, machicha ema Juan, ¿yátupi eta pémunasiranu'i? Ema Pedro majikapawarepa: –Némunakavi, Tata. Pécharichu'i píti eta némunasiravi'i. Ema Jesús máichawarepa: –Tiuri, te yátupipuka pémunakanu, pijaneasinanuwaka ena té'ikanuana'i.

¹⁷ Te mapa'ekene papechaware mayasereka: –Pedro, machicha ema Juan ¿yátupi eta pémunasiranu? Émasera ema Pedro tikatisamurewapa taicha mapa'eipa eta mayaseresira'i te yatupi'ipuka eta maemumaka, majikapawarepa: –Tata, piti pécha'i tamutu: piti pechaichu'i eta némunasiravi'i. Máichawarepa ema Jesús: –Tiuri, te yátupi'ipuka pémunakanu, pijaneasinanuwakayare ena té'ikanuana'i.

¹⁸ Nutupiruwa numetakavi, eta piámaperuwa'i, píti péchinawa'i eta pítaresira'i. Pikamuiri'a'i, piyana'iware te jákani piwara'akeneana'i pikaiju'e, jákanisera añuanayare etasera te ichávikavinapa, apanainapa eta pítaresirayare, apananainapa ena timuriachavianayare, tási'a tiámavianainapa te jákani pimawara'akenéni'i pikaiju'e.

¹⁹ Eta juka máichira'i ema Jesús, mawaraira'i máiminekapaekene'ayare'i eta máichararakawayare'i eta máepenirayare ema Pedro tási'a etapa eta máimairayare eta majaraiwa ema Viya. Tási'a, máichaware ema Jesús: –Yárepasera pe'ikanu Pedro.

Ema Juan, máemunarukene'i ema Jesús

²⁰ Tási'a, téseniekene'awapa ema Pedro, maima'apa eta mae'iekene'airapa'i ema máemunaru'i ema Jesús, émaichu'i ema tiyasereka'i te mesa taicha mavi'a'i te machakaya: “Tata, ¿naja'asikara ema tíjararekaviyare?”

²¹ Eta máimaira'i ema Pedro, mayaserekapa ema Jesús: –Tata, tási'a ema maka, ¿tája'apuka máicharakawayare?

²² Ema Jesús majikapapa: –Nuti nécha te nuwara'apuka máitareka máima'ayare eta nápechirawayare nuchavirayare, pitisera wa'i pikuimisiapawa, píti pítaucha tamutu eta nutuparasiraviana takuija ta'apapirika'ini eta pé'isiranu'i.

²³ Taka'e, ena machamuriana, ichapeine'i eta napanerekene'aira'i eta mamaepenirayare'i. Wá'isera mametaka'ini eta mamaepenirayare'i, takarichu maka'e'i: “Te nuwara'apuka nuti máitareka máima'ayare eta nápechirawayare nuchavirayare, pitisera wa'i pikuimisiapawa”

²⁴ Yátupikene ema'i ema maka ema máimiture yátupikene'i timecha'aviyre tamutu eta juka makajure'i eta yátupikeneana maima'akeneana'i.

²⁵ Jukari'icha'a eta apamuriana máichakeneana'i ema Jesús. Wáipasera támutu'ini nájuekene'a'ini, taicha tétavikawa'i eta táichapemuriwa'i. Te vítametakapukaini tamutu eta máichakeneana'i, wáipapuka nakurata'a'ini naítuka, namutu'inéni ena achaneana te juka apake'e tiájuekenera'iana.