San Juan 20 - Táurinakene máechejiriruwa’i ema Viya tikaijare

Eta ekari mawaku

¹ Te jena sache lumínkukene'i, tiyanapa esu María Magdalena taye'e eta máekari. Timapikuicha'a'i te suítekapauchapa eta ekari, suíma'apa, tájinaipa'i eta mari taji'aini'i eta tapajakura eta ekari.

² Taka'e tiyanapa tijunapapaipa'i te mavi'a'i ema Simón Pedro, tási'a émapa ema apana máimiture, ema maemunarukene'i muraka ema Jesús, tási'a suichawakapa esu: –¡Námechapa eta ñáke'eni eñi Viákenu te ñekari, waipa vecha távi'a'ipuka nanasi'a'i!

³ Ema Pedro, tási'a émapa ema apana máimiture, tiúchukanapa, tási'a tiyananapa te maekari ema Viákenu.

⁴ Ena apinana tikutikakanapa'i eta najunapirapa'i, émasera ema apana makachuriakapa ema Pedro eta majunapira'i, títekapawanepa te ekari.

⁵ Tétipaikapa, majiñañajuechapa, takarine'i maíma'a'i eta máyuru'anaini'i, wá'isera masiapajuecha'ini.

⁶ Taka'e títekapanecha ema Simón Pedro, tási'a tisiapapa ema, taye'e eta ekari. Éneichuware ema máima'awarepa eta máyuru'anaini'i,

⁷ tási'a maima'apa eta amáratataji maitisini'i ema Jesús, waipa tákachane'ini eta nainu'asine'i tiputsikawaipa'i kayurukipa'i.

⁸ Taka'e, tisiapawarepa ema apana máimiture ema tinapuka'i titekapa'i eta te ekari, tási'a, ichapeine'i eta masuapira'i.

⁹ Ena wicha'a'isera nakaikutiara'ini eta táechejiriruwa'i eta Ajureka, eta máechepusirayare'i ema Viákenu.

¹⁰ Taka'e ena máimitureana, tichawanapa te napena.

Ema Jesús tímerekawapa suye'e esu María Magdalena

¹¹ Esu María, sunasipa te aneka, sukachakaya'i eta maekari, tiya'a'i. Eta suiyaira'i tétipaikapa sujiñañakayare'i te taju'e,

¹² tási'a suíma'apa ena apinana ángeleana, tijapumuiri'awaka'i. Téjakana'i ena te taju'e eta máekarini. Ema émana te tanapaini'i eta machuti, ema apana te máiwape.

¹³ Ena ángeleana nayaserekapa: –Esena ¿Tája'a taicha'i piya'a'i? Esusera sujikapapa: –Taicha namecha'i eta ñake'e eñi Tata, waipa necha távi'apuka nanasi'a'i.

¹⁴ Te títapirikapa eta suíchirawaka'i, téviurukawapa, suíma'aine'i ema Jesús. Wa'isera suimati'ini eta amaira'i ema.

¹⁵ Ema Jesús mayaserekapa: –Esena, ¿taja'a taicha piya'a'i? ¿Naja'a pitanuka'i? Ésusera suímijachaichucha ema'i ema tijanearekara'i'i eta huerta, tási'a, suíchapa: –Tata, te píti'ipuka piáma'i eta ñake'e eñi Viákenu, pikatajikanu pimetakanu távi'apuka pinasi'a'i. Nuwara'a námayare nuti.

¹⁶ Taka'e ema Jesús maichapa: –¡María! Esusera suésenikaine'i, suichapa te hebreo: –¡Rabuni! (Ani taka'e'i eta takayemakene'i: “Tata Maestro”).

¹⁷ Ema Jesús máichapa: –Wa'i pikuemama'akanu, taicha wicha'a nápana'ini te mávi'a'i ema Tata. Piyana pimetakawaka ena apamuriana nímitureana eta nápanirayare maye'e ema Tata nukaiyakene, Ekaiyakene'iware eti apanawa.

¹⁸ Taka'e, esu María Magdalena tiyanapa sumetapanawaka'i ena máimitureana eta suímaira'i ema Viákenu, étapa eta mametarapiana'i.

Tímerekawa ema Jesús naye'e ena máimitureana

¹⁹ Étaichu te jena sachekene'i luminkukene, te yátipa, tiúrujikawana'i ena máimitureana ema Jesús te taju'e eta peti, térataekene'awana'i taicha eta napisira'i ena tuparairukana juriyuana. Tiáramikarepa titupi'a'i ema Jesús te namuri, maéchejikapa ánipa maka'e'i: –¡Ícharakawa, eti nuchichanaveana!

²⁰ Tási'a, maimechapa eta majarana te mawa'uana étapa te macheneji. Taka'e, ena ichapeine'i eta naúrisamurewa'i eta naimaira'i ema Viakenu.

²¹ Tási'a, máicha'avipa: –¡Icharakawa eti! Takuti'i eta mawanesiranu'i ema Tata núkupaikayare te juka apake'e, nímituka'eyare'i eti. Puiti nuwaneka'eyare nuti ímitukawakayare'i ena achaneana, apaesa náe'ikanu'ini ena apanawa.

²² Tási'a, machajuákawakapa ena, tási'a, máichawakapa: –Ejákapa ema Machanewa Viya.

²³ Te eti ejapanu eta napekaturana nákani tikapekaturana'i, éneichuware ema tijapanu'eyarewa, tási'a te wa'i ejapanuwaka, ema éneichuware wá'iware tijapanu'ema'i.

Ema Tomás wa'i masuapa eta máechepusiraipa'i ema Jesús

²⁴ Te jena sache eta máimeresirawa'i ema Jesús eta viye'e, májina'i ema vichamuri Tomás.

²⁵ Tási'asera, ena apamuriana nachamuriana nametakapa ema eta naimairaipa'i ema Jesús naka'epa: –Vima'a'i ema Tata. Emasera ema Tomás majikapapa: Té'esera te níma'a eta majara te mawa'u taicha eta clavo, nímisiapaware eta nuwauki taye'e eta majara te machene, tapaenumawa nusuapayare eta máechepusiraipa'i.

²⁶ Te uchupa sache eta táetavisirawa'i, tiúrujikawanaipaware te viúrujisirarewa. Matiari'ipa'i ema Tomás te namuri. Tási'a, tiáramikarewarepa tímerekawa'i ema Jesús. Titupi'a'i te namuri. Maechejikawarepa. –¡Ícharakawa, nuchichanaveana!

²⁷ Tási'a, máichu'apa ema Tomás: –Yare, píma'a eta nujarana te nuwa'uana, pímisiapa eta piwauki eta te juka nuchene, wa'i pikukuti ena maecharaireana ¡yatupina pisuapanu!

²⁸ Taka'e, ema Tomás tipiarakapa: –¡Tátachicha, piti yátupikenevi Viya!

²⁹ Ema Jesús majikapapa: –Pipaenumawa pisuapanu eta pímairanuipa'i. Tétavikawasera náurikakarewa nákani tisuapajira'iana'i wa'i tákamesa'ini náima'anu'ini.

Taja'apuka takayemakeneya eta libro

³⁰ Jukaicha'aware eta apamuriana tiáramikareana máichakeneana'i ema Jesús, eta naima'akeneana'i ena máimitureana, wáipasera tamutu'ini takaju'ini te juka libro.

³¹ Nuwara'asera ákaikutiara eta nájureana'i apaesa esuapa'ini ema Jesús eta émairakene'i Cristo, Machichakene'i ema Viya. Taicha te esuapapuka ema, máitawakakayare eta ítaresirayare te maijare ema.