San Juan 16 - Táurinakene máechejiriruwa’i ema Viya tikaijare

¹ “Numetaka'e eta juka, apaesa wa'i ekuinajikawa eta ekasiñairawa eta nuye'e.

² Ena tiákijika'eanayare taye'e eta peti naúrujisirarewa ena juriyuana. Éneichuware nawara'ayare tikapaka'eana, ena náimijachayare'i tiúriyare'i eta náichirayare te mamira'u ema Viya.

³ Ena, náichayare eta juka táichavene eta namáimatira'i ema Tata, wá'iware náimatinu'ini nuti.

⁴ Numetaka'ewane eta juka, apaesa te táitekapapa eta íchawakenewaya, waipa ekuarameka. Échainapa eta numetasira'e'i. “Wa'i nicha'ewane'i eta juka te taepaninewapa taicha nuti nutiari'icha'a'i eta eye'e eti.

Eta taematane eta Machanewa Viya

⁵ Puiti tiáne'inapa eta nuyaniraya nuchawa maye'e ema tiwanekanu'i, tási'a nájinasera émanaina'ini'i eye'e eti nayaserekanu'ini távi'apuka eta nukaiju'eyare,

⁶ eti ekatisamurewachucha, taicha eta juka numetasira'e'i.

⁷ Nutupiruwasera numetaka'e: tatuparaka'i eta nuyaniraya nuchawa, taicha te wa'i nukuyana, wa'i títekaima'i ema Tikatiucha'eya, ema tiúricha'eyare, tímikataka'eyare, tikurisamurecha'eyarewa.

⁸ Te máitekapa ema, maimikaecherachainapa ena achaneana te juka apake'e, ena yátupikeneana'i kapekaturara'iana'i, énapa ena matapirawareana, tási'a naja'apuka nákani tijachapanaya eta maikuñarakiyare ema Viya.

⁹ Naja'asika ena kapekaturara'iana: nákaini wa'i nasuapanu'ini,

¹⁰ naja'apuka ema matapiraware'i: nuti, taicha nuyaninapa maye'e ema Tata, tási'a eti waipa ima'anuima'i,

¹¹ mákani tijachapaya eta maikuñaraki ema Viya: émara ema wínaraji tákenumuri'i eta juka apake'e, ichapekene'i eta maviurewana.

¹² “Maveracha'aneni eta juka nuwara'akeneana'i numetaka'e, té'esera te numetaka'e puiti'ichu wáipaine'i árata'aima'i ekaikutiara eti.

¹³ Te máitekapapa ema Machanewa Viya, émainapa timimaticha'eyare eta yátupikeneana, wa'i tasi'akenema'i te machuti eta maechejiriruwaya, ema timetaka'eyare tamutu eta masamakenaeana'i, émainapa timinekapa'eyare tamutu eta taiparakana étapa eta íchawakenewanayare.

¹⁴ Ema timerekayare eta nukunachakarewa, taicha majachapayare tamutu eta nuye'eana, tási'a maimereuchainapa eta eye'e eti.

¹⁵ Taicha ema Tata tituparakanu'i eta nútirayare'i nécha tamutu eta maye'eana. Eta taka'e eta juka nichakene'i, eta Machanewa Viya majachapainapa eta tasi'akeneyare nuye'e, émainapa timereuchanuya eye'e eti.

¹⁶ “Ánipiyareichusera eta emaimairanuyare. Té'esera te táekenenapa, iápechawainawarepa íma'anuyare.”

Eta ekatisamurewaira'i titsiwachawainapa eta iúrisamurewairaya

¹⁷ Taka'e ena maimitureana tiyaserejirikakanapa: –¿Tája'apuka takayema eta juka mametarapi'i eta maka'e'i? Ánipine eta vimaimairayare, tási'a, te táekenenapa viápechawainawarepa víma'a, tichawawanepuka eta mayanirayare eta me Maiya.

¹⁸ ¿Taja'apuka takayema eta juka maka'ekene'i ‘ánipine'i’? Wa'i vikaikutiara'ini taja'apuka maechejisi'akene'i.

¹⁹ Ema Jesús makaikutiarawaka'i eta nawaraira'i nayasereka. Máichawakapa: –Nuti numetaka'e'i eta ánipine eta emaimairanuyare. Tási'a, te eta emaimairanuyare, iápechawainawarepa íma'anuya. Eta juka emakaikutiarakene'i.

²⁰ Tási'a puiti, nutupiruwa numetaka'e eta íya'airainasamipa eti, ejapanuwairayarewa. Énasera ena apamuriana achaneana, tiúrisamureanainapa ena. Tási'asera te táekenenapa, waipa íya'aima'i. Tétavikawasera eta iúrisamurewainapa eta táitsiwaya.

²¹ Eta juka tímikutijirikawa'i te tínakayare esu esena. Ánipichu'i eta sukatiru'awa'i, taicha eta suínasirayare'i. Té'esera te tamutupa eta suínasira'i, suémitisikainapa eta sukatiru'awaini'i. Tiúrisamureinapa eta suímaira'i eta suchicha, tajurusirayare'i te juka apake'e.

²² Ene eka'eya eti, ekatisamure'i puiti, ánipichusera. Té'esera te viápechawa víma'akakaya, tétavikawa eta iúrisamurewaya. Nájinainawarepa ti'apapika'ema'i eta iúrisamurewa.

²³ “Te jena sácheyare, wa'i nútima'i eyaserekanu. Émasera ema Tata eyaserekayare'i ema, tíjaraka'eyare'i tamutu jákani eyasearuanayare te níjare.

²⁴ Puíticha tájinaicha'a eyasearapina'ini me Tata te níjare; tikamunukare'i eyaseakayare ema tíjaraka'enapa, étainapa tikurisamurereka'eyare ichape.

Ema Jesús makapakechawakayare ena nánaranayare

²⁵ “Nuti nímikutichina'e'i eta juka numetasira'e'i; té'esera te táekenenapa, jarajapainapa jakani sacheyare eta waipa nimikutichina'ema'i, nutupiruwainapa numetaka'eyare eta yátupikeneana mapanereruana'i ema Tata.

²⁶ Te jena sache, eyaseakainapa ema Tata te níjare. Wáipayare takamunuima'i nuyaseucha'e eta maye'e,

²⁷ taicha émaipa ema Tata témunaka'e'i eti. Táichavene'i eta émunasiranu'iware nuti, eti esuapaipa eta yátupira'i eta mawanesiranu'i ema Tata.

²⁸ Nuti, eta nási'a'i maye'e ema Tata eta nítesira'i te juka apake'e, puítisera nujunijikainawarepa eta apake'e, nuchawainawarepa maye'e ema Tata.”

²⁹ Taka'e, ena máimitureana naichapa: –Jé'eware puiti pitupiruwapa eta péchejisi'a'i, waipa pímikutiarachina'avi'ini.

³⁰ Vímatiwarepa eta yátupira'i pímatiekene'a tamutu eta vipanereruana, étaipa eta juka viwaraira'i viyaserekaviyare. Je'ewarepa visuapapa puiti eta yátupikeneravi'i Machichavi ema Viya.

³¹ Taka'e, ema Jesús májikapawarepa: –¿Taka'e puiti esuapapa?.

³² Puíti títekapainapa eta ura, eta éjanerepaisirayare eti, ejunijikanuinapa, nukarichuinapa. Wá'isera nakarichuima'i matiari'iyaresera ema Tata, ema tikachanenu'i.

³³ Numetaka'eware tamutu eta juka apaesa etupiaka eta iuriwaina nuye'e apaesa takuija ekuichirawaina. Tayanapane ekatajiwayare muraka te juka apake'e, étumechawasera eta nuye'e, taicha nuti máijararunu'i ema Tata eta nukapakemuri'airayare namutu ena nánarana'i.