San Juan 10 - Táurinakene máechejiriruwa’i ema Viya tikaijare

Ema Jesús tímikutijirikawa'i pastureruina'ini taye'e eta uvesa

¹ Taka'e, ema Jesús maichawakapa: “Nutupiruwa numetaka'e, narari'i ena tiamera'iana, nawara'a'i tikayumurukianayare'i eta nasiapirayare'i te tapena eta uvesana, námechayare'i.

² Émasera ema pastuleru taye'e eta uvesana, eta masiapirayare'i te nare, matanuka'i eta tapaja.

³ Émasera ema pástuleru, te yátikara'iana mavejiékene'a'i eta tapaja, máichu'a'i eta táijareana eta uvesana. Eta máichuira'i, tiúchuchujikanapaipa táe'ikapaipa, taicha táimatia'ucha'i.

⁴ Ema, máinapumirauchapaipa eta maye'eana uvesa. Táe'imuri'apaipa tamutu eta, taicha táimati'i eta ma'u.

⁵ Wáipaine'isera táe'ikaima'i mákani apanakene achane. Tawara'ayare'i tijunarakana, taicha wa'i táimatia'ucha'ini.”

⁶ Ema Jesús máimikutichina'i eta juka. Wá'isera nákaikutiara'ini ena eta máimitusirawaka'i.

Ema Jesús ema yátupikene'i tijaneaka'avi'i

⁷ Ema Jesús mápechawaka máimitukawaka'i: “Nutupiruwa numetaka'e: Nuti nímikutijirikawa'i tapajakura'i eta tapena eta uvesa te tanarasirare'i eta.

⁸ Namutu ena tínapumirauchanuana'i, ena tiamera'ianachucha ena, tikaetemara'iana; wá'isera táe'ikaima'i eta uvesana, wa'iware tasuapaima'i.

⁹ Nuti, nukuti'i eta tapaja: nákani tikasiñawana eta nuye'e, tiuchuku'anayare'i. Tájina náichawaima'i, wa'iware téchuriakainaima'i eta tinikakare.

¹⁰ “Ema tiámera'i, tímiteka'i ema tiámerekayare, tikaparekayare. Makaejanerepaikayarewa. Nútisera tímitekanu'i níjarakayare eta náitaresiraya, máitawakakayare eta náurikakarewayare nícha.

¹¹ Nuti yátupikene'i eta nujaneasirawaka'i ena nuchanerana, takuti'i eta majaneasirawaka'i mákani achane eta maye'eana uvesa. Nuti níjarareka eta nítaresira eta nukatiuchirawaka'i.

¹² Mákanisera tuparairukachucha, wa'i makatiuchaima'i eta uvesa. Te máima'apa eta ichini, tijunayare'i. Wa'i tipatsikawaima'i makatiucha eta uvesa, taicha wa'i maye'ena'ini. Taka'e, eta ichini tikamapurawainapa takasaika eta uvesa. Eta takaitiruana, téjanerepaikanapa.

¹³ Ema maka achane wa'i téñamawaima'i taye'e eta uvesa. Étachuchasera makune'i eta mawacha.

¹⁴ “Nuti yátupikenenu pastulerunu, taicha tiúri'i eta nujaneasirawaka ena nuchanerana. Tímatinu'iware ema Tata, takuti'i eta nímatira'i nuti ema.

¹⁵ Éneichuware taka'e'i eta nímatirawaka'i ena nuchanerana. Ena tímatinuana'iware. Eta néñamairawaka'i, nuti nímijararekawa'i eta nítaresira náichavene'i ena.

¹⁶ Narari'iware ena apamuriana nuchanerana. Wá'isera ánina nakawasa. Nukurujikawakayaresera, népanayarewa. Tisuapanuanayarewa, etanayaréichuwa eta náumuriwa. Nukarinenapa nuti néchawaka.

¹⁷ Ema Tata, yátupi'i eta máemunasiranu, taicha nímijarareka'i eta nítaresira náichavene'i ena nuchanerana. Nuchawayaresera nítareka.

¹⁸ Nájinaneni napamikanu'ini eta nísapirawaya tikapakanuana. Níjararuwa'i nuti eta nakapasiranuya. Taicha nutupara'aichu'i me Tata nuti néchinawayare'i.”

¹⁹ Eta nasamira'i ena achaneana eta juka máechejiriruwana'i ema Jesús, típutsimuriawawakawarepa.

²⁰ Maverana'i ena achaneana, naka'epa: –¿Tája'a takayema esuapa ema mara? Máurishi ema, máwa'arupuka ema Wínaraji.

²¹ Énasera ena apamuriana, naka'eware: –Te yátupina'ini máwa'áruina'ini ema Wínaraji, wa'i makurata'a'ini makaimairika'ini ema púchuki.

Ena tuparairukana wa'i náwara'a'ini najakapa ema Jesús

²² Te jena sacheana'i diciembrekene'i tikasara'imu'uana eta te Jerusalén, ena achaneana napiestacha'i eta añu táepanirawa'i náetupirika eta templo.

²³ Ema Jesús matiari'i te taju'e eta te templo, taye'e eta alar máepiyaru'i ema Salomón.

²⁴ Taka'e nachayakapa, ema Jesús ena tikatianakana'i. Tási'a, nayaserekapa: –¿Tája'a takayema pímipanererecha'avi'i? Pátupiruwapa pimetaka'avi te yátupivi'ipuka pítikene'i Cristo.

²⁵ Ema Jesús majikapawakapa: –Kápachi numetaka'eipa'i, wícha'akaru esuapanu. Eta juka níchakeneana'i íma'akeneana'i tási'akeneana'i me Tata, etaipara tímereuchanu'i;

²⁶ Étisera wá'ikene esuapanu'ini. Taicha wa'i étina'ini nuye'e'ena'ini uvesa.

²⁷ Eta nuye'eana uvesa tímatia'uchanuana'i eta. Nuti apanaware nímatiwaka'iware. Eta taka'e, té'ikanuana'i.

²⁸ Níjarakawakayaresera nuti eta máichekuarakireyare eta naitaresira. Wá'ikene náima'a'ini eta náikuñayareni. Nájinaware tiverejikanuanaima'i ena nujanearuana'i.

²⁹ Taicha máijararunuana'i ema Tata. Ema, najina tikachuriakaina'ini, nájinaware tirata'aima'i tiverejikaima'i ena majanearuana'i.

³⁰ Taicha nuti emapa ema Tata vikutikaka'i eta vítupaijiasirawawaka'i.

³¹ Taka'e, ena tikatianakana'i natanukawarepa eta márija'iana. Nawara'apa natupisikayare'ini ema Jesús,

³² Emasera ema Jesús máichawakapasera: –Ichapemuri'i eta níchira'i eta táurikeneana íma'akeneana'i, máijararuana'i ema Tata. ¿Étaserapuka tiviuchanu'i eta ewaraira'i etúpisikanu te márija'i?

³³ Taka'e ena, najikapawarepa: –Wa'i étaparakaina eta píchirapuka jákani táurikeneana'i. Eta tiviuchavi'i pímijachirawa'i machichavi ema Viya. Píti'ichu'i vikutikene'i achane. ¡Pítisera pímijachawaipa'i Víyavi!

³⁴ Ema Jesús maichawarepa: –Eta te Ajureka, wa'i ímatiekene'a'ini eta táechejisi'aira'i, eta makayemakene'i ema Viya: ‘Víya'e'i nícha eti nunerejiru'eana'i.’

³⁵ Vécha'i eta takayemakene'i eta Ajureka. Tamutu eta táechejiriruwana eta Takapika'ukene Ajureka, táechejisi'aira'i. Nákani nakatupara'a'i me Viya, ema tímijarechawaka'i Víyana'i.

³⁶ Nútipa puiti, nuvetijipa nímijarechakare Viya taicha émarichu ema Viya tinerejikanu'i, tiwanekanu'i eta núkupaisiraya te juka apake'e, ¿Taja'a takayema eka'e eta nepuru'i ema Tata, eta nuka'era'i nuti machichanu ema Viya?

³⁷ Etasera te wa'i nítaucha nuti eta mawanairipiana ema Tata, tiwanekanu'i, taurikapa waipa ekusuapanu.

³⁸ Etasera te nitaucha'i eta mawanairipiana, tayanapane wa'i ekusuapanu nuti, étapaseraini esuapa'ini eta tiáramikareana níchakeneana'i, apaesa enewanepa echa tamutu, taicha ema Tata tiawa'akanu'i éneichuware nuti nawa'asira'i ema Tata.

³⁹ Taka'e, tiápechawanawarepa nawara'a nakaratakayare'ini ema Jesús, náeratakayare'ini, emasera tiúchukawanepa.

⁴⁰ Tási'a, tiyanawarepa ema Jesús te tinapaika te apachara eta kajakure Jordán, manasipanapa eta te awasarechicha te máikachasirisine'ini ema Juan.

⁴¹ Kamuriana ena achaneana tiyanarakana'i eta maye'e, tási'a, naka'epa ena: –Ema víyara'aini Juan, tayanapane'i tájina máimereka'ini eta tiáramikareana, yátupi'isera eta profetaira'i ema, taicha tamutupa eta mametarapiana maye'e ema maka Jesús, víma'aipa puiti eta yátupikeneana'i.

⁴² Taka'e, ánaki kamuriana'i ena achaneana tisuapana'i ema Jesús, té'ikana'iware.