Hechos 9 - Táurinakene máechejiriruwa’i ema Viya tikaijare

Ema Saulo masuapa eta máichuira'i ema Jesucristo

¹ Tímiyanawaichucha ema Saulo eta mapánajirisirawaka'i ena té'ikana'i ema Jesús, mawaraira'i máimikapakawakaya. Tiyanapa tiyasesereka eta wanairipi maye'e ema akenuka taye'e eta Jerusalén,

² tási'a ema Saulo mayaseakapa eta ajure naye'e ena akenukara'ana: Eta makaratasirawakayare'i ena te'ikanaicha'a ema Jesús ánaki te peti naurujisirarewa ena juriyuana, te jena awasare Damasco, namutu nákani ajairana, esenanapuka. Mawara'a'i maemeratakawaka eta te juka Jerusalén.

³ Taka'e, te tiáne'ipa títekapa te awasare Damasco, tiáramikarepa eta majaraiwa ema Viya tiási'a te anuma, tamikauchapa ema.

⁴ Ema Saulo tiákipaikawapa te apake'e. Masamapa eta ma'u ema Jesús. Máichapa: “Saulo, Saulo, ¿tája'a takayema pipánajirikanu?”

⁵ Ema Saulo, mayaserekapa: “¿Nája'avi piti Tata?” Majikapapa: “Nuti Jesús, nuti pikatianaru'i, eta pipanajirisirawaka ena té'ikanuana'i.

⁶ Péchepuka, piyana pítekapa te jena awasare; ánaki marari'i ema timetakaviyare eta pítauchakeneyare nuye'e.”

⁷ Ena makachanekeneanapa'i ema Saulo, ichape eta tiáramekana. Taicha nasama'i ema téchejika'i, wá'isera náima'a'ini.

⁸ Taka'e, ema Saulo téchepukapa, tási'a mawara'ainipa tejia'aukicha wáipasera máimairika'ini. Taka'e nachurukapaipa'i eta nakaitekapiraya taye'e eta awasare Damasco.

⁹ Ánaki, mapana sache eta mapuchukiwa'i, wá'iware tinika, tájinaware máera'ini.

¹⁰ Ánaki te jena awasare Damasco, matiari'i'i ema apana té'ika'iware ema Jesús, ema tikaijare Ananías, émaichuware máechejiru'i ema Viákenu Jesús. Ánipa taka'e eta máechejisira'i: “¡Ananías!” Ema majikapapa: “Nutiari'i, Tata.”

¹¹ Taka'e, ema Viákenu Jesús máichapa: “Piyana pitupiruya te jena calle tikaijare Titupina, te jena mapena ema Judas, pikayasesereruyare ema achane tikaijare Saulo, ema tikawasa te awasare Tarso, puiti máena'i tiyujaraka'i,

¹² nuti néchejika'i ema, numetaka'i ema eta pítekapiraya maye'e. Nuwanekavi pinakaya eta piwa'u te mápusi apaesa tachawa eta máimairisira.”

¹³ Te masamapa ema Ananías, maka'epa: “Tata, namutu timetakanuana eta máichararakawa'i ema achane eta mawínarajiwa'i naye'e ena té'ikaviana tikawasana te Jerusalén.

¹⁴ Ema, tímiteka'i puiti eta ani, mámapa'i eta wanairipi náijararu'i ena tuparairukana eta te Jerusalén eta máepanira'aviya naeratasira'aviya vimutu viti vé'ikaviana'i eta pijare.”

¹⁵ Émasera ema Jesús máichapa: “Piyanachucha, taicha ema maka achane, nunerejiruichu'i, nuwanarayare'i ema, nuwanekayare makametarairu eta níjare naye'e ena achaneana apawasana te apanana awasareana étapa eta naye'e ena vijaneanana israelítana. Étapa naye'e ena ichapekeneana akenukana reyeana.

¹⁶ Nuti nímechayare eta makatajiwairayare ichape táichavenena'i eta máe'isiranuyare.”

¹⁷ Taka'e, masuapa'i ema Ananías, tiyanapa taye'e eta peti mávi'a'i ema Saulo. Tisiapapa, máechejikapa, manakapa eta mawa'u te mápusi, tási'a máichapa: –Nuparape Saulo, ema Viákenu Jesús tímerekawa'i eta piye'e te achene te pítekainapa, ema tiwanekanu'i níteka eta piye'e, mawara'a'i tichawayare eta pímairisira, mawara'aware tiáwa'akaviya ema Machanewa Viya.

¹⁸ Taka'e, enewanepa témitiaka eta tépakuchaini'i eta máuki'a, téjami'aukichapa, tichawapa eta máimairirisira. Tási'a, ema Saulo téchepukapa, matupirupa tikaikachasi.

¹⁹ Te tamutupa, tinikapa, tichawapa eta matumewa, manasipanapa jena sácheana naye'e ena machamurianaipa'i té'ikana'i ema Jesús taye'e eta awasare Damasco.

Tépanawapa tikametarairu ema Saulo

²⁰ Taka'e, tépanawapa tikametarairu ema Saulo te peti náurujisirarewa ena juriyuana, máechejisi'apa ema Jesús émaira'i Machicha ema Viya.

²¹ Namutu ena tisamararakana'i, ichapeine'i nárami, tási'a, naka'epa: –¿Tája'a takayema Émara ema maka ema tipánajirikawaka'i ena té'ikana'i ema Jesús, ena tikawasana te Jerusalén? ¿Tímiteka'i te juka eta makaratakawakayare'i mámamuri'ayare'i, naye'e ena tuparairukana eta te Jerusalén?

²² Émasera ema Saulo tiápajukawapanapa eta máitusira tikametarairu, máimereka'i naye'e ena tikawasana'i taye'e eta awasare Damasco eta yátupikenera'i ema Jesús émaira'i ema Cristo, ema nakuchapakene'i.

Ema Saulo kaitikawapa naye'e ena juriyuana.

²³ Tayerewa'i eta sacheana, ena israelítana napanerechapa nakapakaya ema Saulo.

²⁴ Émasera masamairikapa eta náemauchira'i. Tamutu sácheana, yátiana nakune'i eta te nauchuruku máuchujisi'ayare'i, taicha nawaraira'i nakapaka ena.

²⁵ Énasera ena machamuriana náituka'i eta nayumurusira'i náiyaraku'apa te ichape saye, náitiakapa te tiupi enure nakukupaikapa eta te apachakaya eta yúchama.

Ema Saulo titekapapa te Jerusalén

²⁶ Te títekapapa ema Saulo te Jerusalén, mawara'apa masiapamuri'a ena náinapureana'i té'ikana'i ema Jesús. Énasera napikaichucha ema, taicha wícha'a nasuapa'ini eta máe'isiraipa ema Jesús.

²⁷ Taka'e ema Bernabé, émapa tiáma'i ema Saulo tímimaticha'i naye'e ena apústuleana. Mametamuri'apa eta máimaira'i ema Viákenu Jesús eta te achene ema Saulo, étapa eta máechejisira'i. Mametakaware eta yátupira'i máituka tikametarairu ema Saulo maye'e ema Jesús eta te awasare Damasco.

²⁸ Taka'e, ema Saulo manasipa te Jerusalén, makachanejirikawaka'i. Wa'i mapikakarakawa'ini eta makametarairuira'i maye'e ema Viákenu Jesús.

²⁹ Máechejirikawakapa'i ena israelítana. Makanaraemachawaka'i, wa'isera náurika'ini eta máimiturapiana'i. Tisemanapa maye'e, nawara'apa nakapakaya ema.

³⁰ Te nasamairikapa ena machamuriana, námapa ema Saulo eta te awasare Cesarea. Ánaki tiánuku'apa te máwasa Tarso.

³¹ Taka'e, tiúrikawanapa ena náumuriwana ena té'ikana'i ema Jesús tiávi'ana te apanana awasareana taye'e te Judea, te Galilea, étapa te Samaria. Tási'a, tétumechakakana'i eta náimiyanirawaya napikauchiraya ema Viákenu. Máimikatamuri'a'iware ema Machanewa ema Viya. Eta taka'e, kamurianapaipaware ena té'ikana'i.

Ema Pedro makanaraka'i ema achane tikaijare Eneas

³² Ema Pedro tiyanapa máejirawaka'i ena machamuriana eta te awasareana. Títekapapa taye'e eta awasare tikaijare Lida.

³³ Ánaki maetupiakapa ema achane tikaijare'i Eneas. Uchu añuipa'i eta makajumaira'i. Wa'i táuri'ini mayamuriaka'ini, wá'iware máechepuka'ini te makamane.

³⁴ Ema Pedro máichapa: –Eneas, ema Jesucristo tikanarakaviya. Péchepukapa pive'apa eta piyereruwa. Ema Eneas enewanepa téchepuka.

³⁵ Taka'e, namutu ena tikawasana'i te Lida énapa ena tikawasana'iware te Sarón, náima'apa eta manarasira'i ema achane. Náe'ikapa ema Viákenu Jesús.

Eta suápechirawa títareka esu Dorcas

³⁶ Te jena sácheana'i, sutiari'i esu esena tikaijaru Tabitá, te naéchejiriruwa griego eta takayemakene'i Dorcas. Esu, tikawasa'i eta te awasare Jope. Ésuichu'iware té'ika'i ema Jesús. Eta suítaresira'i esu suka esena, sukajiwaka ena páureana eta suíma'akeneana.

³⁷ Te jena sácheana'i, esu Dorcas tikajumapa, tási'a tépenapa. Taka'e, nave'apa, náikachapa eta suáke'e. Nakasiapapa te taju'e te anuke'e tékene'a piso.

³⁸ Eta Jope tachakayaichu'i eta apana awasare Lida, eta mávi'a'i ema Pedro. Náechaipa'i eta matiari'ira'i ema Pedro te Lida. Taka'e, nawanekapa ena apinana ajairana, náichu'apanayare ema. Te náitekapauchapa, náichapa: “Viwara'a viámavi puíti'ichu ánaki te Jope.”

³⁹ Taka'e, tiyanapa ema Pedro, máe'ikawakapa ena. Te títekapanapa, náimisiapapa eta te taju'e suávi'a'i esu Dorcas. Namutu ena esenana tepenaimana, te náima'apa ema Pedro, náurujiakapa. Náimechapa eta namuiri'ana supariruana'i esu te achaneicha'a.

⁴⁰ Ema Pedro makawanairipipa náuchuka namutu. Taka'e, tépuyukapa ema, tiyujarakapa. Tasi'a, máimarakaipa esu esena suépenakene, máichapa: –¡Tabitá, péchepuka! Esu téjami'aukichapa. Suíma'apa ema Pedro. Téja'apaikapa.

⁴¹ Ema, makaratakapa eta suwa'u, makaechepukapa. Énewanepa máichu'awaka ena tepenaimana énapa ena apamuriana machamuriana. Máimechapa eta suchaviraipa títareka.

⁴² Eta juka, náechapa namutu ena tikawasana'i eta te awasare Jope. Kamurianaine'iware ena tisuapana'i ema Viákenu.

⁴³ Ema Pedro manasipanapa jena sácheana taye'e eta awasare te mapena ema tikaijare Simón, náimijarechaware Suélareru.