Hechos 8 - Táurinakene máechejiriruwa’i ema Viya tikaijare

¹ Ema maka Saulo, eta mapanereru'i takuti'i eta napanereruana ena tikapakana'i ema Esteban tiúrisamurepa ema.

Ema Saulo mapanajirikawaka ena té'ikana'i ema Jesús

² Natiari'iwaresera ena apamuriana ajairana tiúripanereruana'i, nave'apa eta máke'e ema Esteban, náekarapanapa, tíya'anapa ichape eta nakatiekenera'i ema.

³ Taka'e, ema Saulo, ema náinapuarakipa'i ena tipanajirikana'i ena té'ikana'i ema Jesús. Tisiapanapaipa te napenana, nakaratakawakapaipa ena nachimapakeneanapa'i ajairana, esenana, nachururupaikawakapaipa eta námirapa'i te nakaeratairare.

Ema Felipe tikametarairu te awasare Samaria

⁴ Tasi'asera ena tiuchukana'i te Jerusalén tejena awasareana náitekapi'apa'i ena najunakeneana'i, tímiyanawanaichucha tikametarairuana eta máimiturapiana ema Viákenu.

⁵ Ema Felipe títekapapa eta te awasare tikaijare Samaria. Taka'e, tikametarairupa naye'e ena achaneana eta náe'isiraya ema Jesús, émaira'i Cristo ema nakuchapakene'i.

⁶ Namutu ena achaneana nasamaraka'i eta makametarairuira'i ema Felipe. Naima'aware eta ekutiarareana tiaramikareana maichakeneana'i ema.

⁷ Náima'apa eta makanarasirawaka'i ena nakajumakeneana kamurikeneana, ena murakaki'ana, ena tiyayakareana, énapa ena masariana. Kamuriana ena éreanana máimijunakeneana'i te náke'e ena achaneana náwa'aruana'i; tipiárarekanapaipa eta náuchusirapa'i.

⁸ Eta taka'e, ichapeine'i eta náurisamurewa'i ena achaneana taye'e eta jena awasare.

⁹ Matiari'i ema achane tikaijare Simón, iápemareni'i ema. Tási'a ichapemuri eta mawayuasirawa'i, makaetemajirisirawaka'i ena achaneana tikawasana'i te Samaria, títupajijiakawa'i tépiyakawa ema.

¹⁰ Namutu'i ena nasimutuwakeneana achaneana énapa ena tikaima'akeneana nasamararaka'i nasuapa'i eta makayemakeneana'i. Ánipa naka'e: “Ema maka achane títupajijiakawa'i ichape maicha ema Viya’.”

¹¹ Ánakiapaipa eta mawayuarasirawaka'i ena, taye'e eta ma'iápemarewa'i. Eta taka'e, napikaucha'i ema.

¹² Té'esera te nasamapa ema Felipe, nasuapapa eta Arairu máechejiriruwa maimiturapi ema Viya. Makametarairupa eta Mawasa ema Viya akenuka te anuma. Eta émaira'i ema Jesucristo. Taka'e, kamuriana ena ajairana énapa ena esenana ena tikaikachasiana'i.

¹³ Émaipa ema iápemaréni Simón, masuapaware ema. Tikaikachasiwarepa, máe'ikapa makachanepaipa ema Felipe. Ichape máramipa'i eta tiáramikareana máichakeneanapa'i ema Felipe.

¹⁴ Tiuri te Jerusalén, nasamairikapa ena apústuleana eta náe'isiraipa'i ema Jesús ena achaneana tikawasana'i te awasare Samaria. Tási'a, tikaewatawaneanapa ema Pedro ema Juan.

¹⁵ Te titekapanapa, nayujarauchapa eta té'ikanaipa ema Jesús, kawasana'i te Samaria, wícha'asera táukupaucha'ini eta Machanewa ema Viya.

¹⁶ Taicha takarichuicha'a eta nakaikachasira'i eta nawaraira'i náe'ika ema Viákenu Jesús. Tiyujarakanapa nayaseakapa eta máijarasiraina eta Machanewa ema Viya.

¹⁷ Taka'e, ema Pedro émapa ema Juan nanakapa eta nawa'uana te nápusiana ena. Tasi'a, eta Machanewa ema Viya máwa'akawakaipa ena.

¹⁸ Ema Simón eta manekapira'i eta máwa'asirawaka'i eta Machanewa ema Viya te náemamachutichirawaka'i ena, mawara'apa ema mawachachawaka ena apústuleana.

¹⁹ Tasi'a máichawakapa: –Íjarakanu nuti apanaware eta nítusiraina, eta ítukakene'i, apaesa te nunaka eta nuwa'uana te nápusiana ena nákani achaneana, táukupaikapaini, eta Machanewa ema Viya naye'e ena.

²⁰ Taka'e, ema Pedro májikapapa: –Pémitiekene'aya píti étapa eta piplatane, taicha píti wa'i tiuri eta pipanereru. Pímijacha'ipuka vikawacharapiyare eta máijararu'aviana ema Viya.

²¹ Wa'i pítiparakaina, taicha eta pipanereruana wa'i tátupiruwa'ini maye'e ema Viya.

²² Pínajika eta piwínarajiwana, piyaseaka ema Viya, tijurikati majapanuvi eta tamauriwa'i eta pipanereru'i.

²³ Taicha nímatiakavi'i eta pétaviuchira'i eta pikapinaruraiwa'i, taicha wa'i tínajiakavima'i eta piwínarajiwa.

²⁴ Ema Simón májikapapa: –Ímikatakanu eti, eyujarauchanu me Viya, apaesa wa'i takuitauchawa eta juka ekayemakeneana'i.

²⁵ Te taekenepa, ema Pedro ema Juan nametaka tamutu eta naima'akeneana'i te nakachanecha'a'i ema Jesús, te tímiturekanapa eta máimiturapiana'i ema Viákenu, te tamutupa, tiyananapa tichawana'i te Jerusalén, tikametarairuanapaipa naye'e ena achaneana taye'e eta Samaria.

Ema Felipe máimituka ema achane tikawasa te etiope

²⁶ Te taekenepa eta juka, tiúkupaikapa ema ángele mawaneru'i ema Viya. Máichapa ema Felipe: “Pechepuka, tási'a pétupirikawa, piyana te tinapaika te wana, pivenaku'ayare eta achene tiási'a te Jerusalén, tiyana te Gaza.” Pétavikayare eta máwapa'iana wáma'i.

²⁷ Ema Felipe téchepukapa, tási'a tiyanapa, te achene makainunapa ema achane tikawasa te Etiopía. Ema maka achane, sujupa'a'i esu reina taye'e eta Etiopía. Ema maka, ema'i tijaneaka'i eta suíma'akeneana esu reina, ema másine'i te Jerusalén, máejirapana'i ema Viya.

²⁸ Ema maka achane machawakenepaipa'i te máwasa, eta mapaisira'i, téjakapa'i te makarreta. Téchejikurekapa'i eta májure'i ema profetaini Isaías.

²⁹ Eta Machanewa Viya mametakapa ema Felipe, ánipa maicha'i: “Piyana pémeña'awa taye'e eta jena makarreta.”

³⁰ Te témeña'awapa ema Felipe, te makarreta ema etiope, masamapa eta maéchejiku'apa'i eta májure'i ema Isaías, taka'e mayaserekapa: –¿Pikaikutiara eta jara péchejikurepa'i?

³¹ Ema etiope májikapapa: –¿Wáipaine'i nukaikutiaraima'i, taicha nájina nametakanupa'ini eta takayemapa'i? Tási'a mayaseakapa ema Felipe mawaku'a'ini, tási'a maejakapaini te machakaya ema.

³² Eta máechejikurepa'i ema achane, ani taka'e'i: “Takutipa eta uvesa eta námira'i te matadero, takuti'i eta chikeru wa'i taituka katiuchawa te namira'u ena tiamanapa'i, ema wa'i maéchejiuchawa'ini, timatinaichucha

³³ Tétavikawa'i eta nakatsiriasira'i ema, tási'a tájina'ineni maviurewaina'ini, nájinaware nakatiucha'ini ena mámariekeneanaini. Taicha eta máitaresira naverejika'i ani te juka apake'e.”

³⁴ Ema maka achane etiope mayaserekapa ema Felipe: –Pakataikanu pimetakanu, ¿nája'a ema profeta táechejisi'a'i eta juka? ¿Ema táechejisi'a'i ema maka profeta, wa'i apanapuka?

³⁵ Taka'e, ema Felipe tépanawapa mametaka'i ema táechejisi'a ema Jesús, ema nakuchapakene'i.

³⁶ Te máechapa ema achane, mapanerekene'aine'i. Taka'e, te nakapayakapa eta únekure, maka'epa: –Júka'ri'i eta une. Nuwara'a píkachasikanu, eta puiti'ichu.

³⁷ Ema Felipe máichapa: –Te yátupi'ipuka eta pisuapira'i te pisamure eta pikasiñairaya ema Jesús, níkachasikaviya. Tasi'a ema achane májikapapa: –Yátupi nusuapa ema Jesucristo eta émaira'i machicha ema Viya.

³⁸ Taka'e, makawanairipipa nakaicheka eta makarreta, tási'a tiúkupaikanapa ena apinana, tási'a tiyananapa te únekure, taka'e ema Felipe máikachasikapa.

³⁹ Te tichawanapa taye'e eta únekure, tíja'uchawapa témitiakapa ema Felipe, taicha eta Machanewa Viya manaraku'apa mámapa. Wáipaware máima'a'ini ema achane. Tímiyanapasera ema achane tiúrisamurepaipa'i.

⁴⁰ Eta máukupaisine'i ema Felipe te awasare tikaijare Azoto. Taka'e, tikametarairupaipa'i eta Arairu maéchejiriruwa ema Jesús, eta máitekapirapa te apana awasare tikaijare Cesarea.