Hechos 6 - Táurinakene máechejiriruwa’i ema Viya tikaijare

Tikatupanapa ena siéteana ajairana timikatarekanaya

¹ Te jena sácheana'i, eta nasimutuwaipa ena té'ikana'i ema Jesús, tisiapanapaipa tikajanemurianapaichucha ena apaechejiriruwana griegoana. Énapa ena máimaruana, ena nani jakapa'i eta naye'e ración tamutu sácheana, etana sache, ena nani apaechejiriruwana ena hebreoana, waipa náurisamure'ini, taicha waipa nákutikaka'ini náechapajirika'ini ena máimaruana griegoana.

² Taka'e, ena dósekeneana apústuleana nakurujikapa namutu ena té'ikana'i ema Jesús, tási'a náichapa: –Wa'i táurika'ini víchepaika'ini eta vikametarairuira eta máechejiriruwa ema Viya. Tikaichepairika'avipa eta víjarasira'i eta tinikakare ena vichamuriana.

³ Tiuri puiti nuparapenaveana, takamunu'i vinakayare siéteanaina ena ajairana te emuri eti, nákani ímatikeneana tiúriana, téchemara'iana náimatiekene'a tamutu, máwa'aruana'iware ema Machanewa Viya. Énaina vituparaka naicha eta juka emátaneka.

⁴ Víti vímiyanawayare viyujaraka, tási'a vímiturekayarewa eta máechejiriruwa ema Viya.

⁵ Taka'e tikanerejianapa ena tikatupara'anayare. Nave'apa ema Esteban, achane tiuri, tisuapajira'ikene maye'e ema Viya, máwa'aru'iware eta Machanewa Viya. Nave'awarepa ema Felipe, ema Prócoro, ema Nicanor, ema Timón, ema Parmenas, tási'a émapa ema Nicolás.

⁶ Taka'e, námapa te navi'a'i naye'e ena apústuleana, tási'a nanakapa eta nawa'uana te nachutiana, nayujarauchapa.

⁷ Eta nasamira'i eta máechejiriruwa ema Viya, kamurianapa ena té'ikana'i taye'e eta awasare Jerusalén. Tisimutuanaware ena tiyujarakara'iana israelítana, náunakaipa te nasamureana eta náe'isiraipa ema Viákenu.

Eta nakaratasira'i ema Esteban

⁸ Ema Viya máimikataka'i ema Esteban. Máijaraka'iware'i eta ichape eta máichira'i eta tiáramikareana te namira'u ena achaneana.

⁹ Tatiari'iware te Jerusalén eta apana peti náurujisirarewa ena juriyuana. Tiúrujikawana'i ena israelítana esclawuanaini náuchukureanapa. Ena tiási'ana'i te Cirene, te Alejandría, te Cilicia, étapa te Asia. Nákapaemajirikapa ema Esteban,

¹⁰ eta Machanewa Viya, máijaraka'i ichape ema Esteban eta máitusiraya téchejika. Eta taka'e, wa'i nárata'a'ini nakachuriaka'ini ema.

¹¹ Taka'e, nawachachapa nákani tépiyeikene'anayare'i ema Esteban, naka'eyare'i ena: Visama'i ema maka makaeka'i'i ema Moisés, tási'a émapa ema Viya.

¹² Taka'e'i, eta nakaechepusira'i eta semanere naye'e ena achaneana, énapa ena viyakarana, tási'a énapa ena escriwánuana. Taka'e, nakaratakapa ema Esteban. Námapa tikayasere'iya te namira'u ena Tuparairukana.

¹³ Taka'e, natanukapa ena tépiyaekene'anayare'i. Ánipa naka'e'i: –Ema maka achane wa'i máituka timátina, makaeka'i eta santu templo, tási'a máepuruware eta wanairipiana.

¹⁴ Éneichuware maka'e'i, ema Jesús Nazareno mákipaikayareji eta templo, máitsiwachayare'iji eta viye'erepiana, manakipairu'i ema Moisés.

¹⁵ Taka'e, namutu ena natiari'ikeneana'i náejaruana'i náimararakaipa ema Esteban. Eta mamira makawasira'i ema ángele.