Hechos 28 - Táurinakene máechejiriruwa’i ema Viya tikaijare

Ema Pablo mávi'aipa te tiúrupu'i Malta

¹ Te vimutupa viúchuku'a'i taye'e eta viukupaisine'i, tiúchujiucha'avianapa ena tikawasana'i taye'e eta tiurupu'i táijare'i Malta.

² Nakamuruekechapa eta yuku, tíchu'a'avianapa viásakawayare'i, taicha vikasarechawakapa'i, taicha tikiwaucha'avi'i, énapa títati'aviana'i.

³ Ema Pablo máijukechapa eta manereru'i yukuki. Tatiari'i'ipuka eta kichare te manereru, tási'a tiúchujikapa eta kichare, táimijunapa eta yuku. Táechukapa te mawa'u ema Pablo.

⁴ Te náima'apa ena tikawasana'i taye'e eta tiúrupu'i eta táechusira'i eta kichare ema Pablo te mawa'u, naka'epa: “Ema maka achane tikaviurewapuka jákani, tikapareka'ichupuka. Tiúchuku'a'i te ichapeama une, ánipasera taviyi'a'i eta matupara'a'i. Waipa máuchuku'a'ini.”

⁵ Émasera ema Pablo mákijipikapa te yuku eta kichare, tájina'isera máichawa'ini.

⁶ Ena tímarakana'i nakuchapaipa'i eta máepena'ini, táma'ipuka'ini eta mawa'u. Eta náimaira'i tájina'i máichawa'ini, napanerekene'apa, víyachupuka ema maka.

⁷ Te tachakaya eta vécharisinewa'i, tatiari'i eta petiana, maye'eana'i ema tikaijare'i Publio. Émapa tíchua'avi'i téchapajirika'avi'i eta jena mapanakene'i sache.

⁸ Tási'a matiari'i'i ema maiya ema Publio tikajuma'i ema eta muraka fiebre. Tisaka'iware iti. Tiyanapa ema Pablo máejirapana'i, tiyujarakapa, tási'a manakapa eta mawa'u te máina'u. Jé'esare, tinarakapa ema achane.

⁹ Eta náimaira'i ena apamuriana achaneana eta makanarasira'i ema makajumakene, náepanawakapa ena apamuriana nakajumakeneana'i. Makanarakawakapaipa ema Pablo.

¹⁰ Ichape'i eta náitatira'avi'i. Tási'a te viáwaku'ayarepa tíjarakasicha'avianapa eta vikamunukeneanayare'i eta vipaisiraya.

Ema Pablo títekapapa te Roma

¹¹ Taka'e viáwaku'awarepa taye'e eta apanaware pakure tachimararu'iware eta muraka tékatikawa taye'e eta anuereku te viávi'a'i. Eta juka pakure tikaijare'i Cástor-Pólux. Tiási'a'iware te Alejandría.

¹² Vítekapapa te apanaware anuereku tikaijare'i Siracusa. Víchekapa taye'e mapana sache vika'e,

¹³ te viyanawarepa, vijuchekapaipa eta vítekapirapa taye'e eta anuereku Regio. Te apanapa sache tépanawawarepa eta tékatikawa te wana. Te apanapa sache, vítekapapa taye'e eta anuereku Pozzuoli,

¹⁴ te jena awasare, vikainunapa ena vichamuriana, tíminasicha'avianapa étana'i semana vika'e eta naye'e. Tási'a, vitekapapa te Roma.

¹⁵ Ena vichamuriana tikawasana'i te Roma, tisamairirika'avianaipa eta vítekapirayare'i. Nárajapapa tiakapa'aviana'i te awasare tikaijare'i Foro de Apio. Éneichuware ena apamuriana tiakapa'aviana'iware, tikúchapa'avianaipa taye'e eta awasarechicha tikaijare Tres Tabernas. Te máima'awakapa ema Pablo, tiúrisamureine'i naicha, tétumechawapa ema. Ma'asulupayachapa ema Viya.

¹⁶ Te vítekapapa te Roma, náisapapa ema Pablo máiputsikawa te apanana peti eta mavi'ayare'i, matiari'i'isera ema émana suntaru tijaneaka'i.

Ema Pablo kametarairu taye'e eta Roma

¹⁷ Te mapanapa sache eta maítekapira'i, ema Pablo máimichu'awakapa ena náiyara'ana ena israelítana tikawasana'i te Roma. Te tiúrujikawanapa, maichapa: –Nuparapenaveana, tájinaneni nutapirawaina'ini, tájinaware nícharaka'ini ena vijaneanana, wá'iware nukaeka'i eta naye'erepianaini ena viáchukanaveanaini. Nukaerata'isera te Jerusalén, timetauchanuana'i te namira'u ena tuparairukana rumanuana,

¹⁸ eta nayaseresiranu'i, nawara'a'ineni tikaitikanuana, taicha náima'a'i ena tájina taviuchanu'ini táimikapakanu'ini.

¹⁹ Énasera ena vijaneanana wá'ikene náwara'a'ini nakaitikanu'ini, eta taka'e'i nuyaseserekapa nuti étaina nukametauchakasiya te mamira'u ema Emperador. Tájinasera wa'i numetauchaima'i ena nujaneanana tikaetemajirikanuana'i.

²⁰ Eta taka'e, nímichu'a'e'i nuwara'a'i, numetaka'e eta juka níchawakenewa'i. Tikaviurenu'i eta né'isira'i ema Cristo, ema vikuchapakene'i viti israelítana, eta tímitiakanu'i puíticha te juka cadena.

²¹ Ena náichapa: –Wá'iya visamairikavi, wá'iware vijakapa'ini eta piajure tási'akenena'ini te Judea táechejisi'avi'ini píti, énapa ena vichamuriana tiási'anapa'i eta ánaki, wá'iware náechejisi'a'ini eta piviurewa'ipuka píti.

²² Viwara'asera visamavi puiti péchejisi'a eta pipanereruana'i, taicha visamairika'i eta nakatichira'i ena vijaneanana eta juka arairu'i é'iru'i.

²³ Taka'e, náijarechapa eta sache máechejisiraya, te jena sache, títekapanapa ena kamurikeneana israelítana taye'e eta máitekapi'a'i ema Pablo. Tépanawapa te jena yátikara'i téchejika'i, tiámainukawa te kapere'ichichapa títapirikapa eta makametarairuira'i eta mawasa ema Viya akenuka te anuma, máimive'apikapa'i eta máechejikuirapa'i eta Takapika'ukene Ajureka. Máimitukawaka'i ena eta náimatiraya ema Jesús eta émaira'i ema nakuchapakene'i.

²⁴ Natiari'i ena apamuriana nasuapa eta makayemakeneana'i ema Pablo, natiari'isera ena apamuriana wa'i nasuapa'ini.

²⁵ Ena, wa'i náwara'apa'ini nasama, timutsera'awanapaipa tiyanana. Taka'e, ema Pablo máichawakapa: –Tiuri'i eta maechejisira'i ema Machanewa Viya, maichakene'i ema profeta Isaías naye'e ena viáchukanaveanaini te maichawakapa:

²⁶ ‘Piyanapa pimetaka ena naena achaneana: Tayanapane esama, wá'isera ekaikutiaraima'i, Tayanapane imairika, wá'isera íma'aima'i.

²⁷ Eta napanereruana ena achaneana timapachichijikawapa, tichujichawapa eta ekiña waipa esamara'i tási'a erata'aukichawapa, apaesa wa'i ekuima, wa'iware ekusama, apaesa wa'i ekukaikutiara, apaesa wa'i ekusuapanu nuti, apaesa nuti waipasare nukanaraka'ema'i.’

²⁸ Ákaikutiarakenéna eti, eta mawaraira'i makuchuku'aya ena apawasanana ema Viya, tási'a ena nasapi'ayare nasamararakayare.

²⁹ Te tamutupa eta máechejisira'i ema Pablo, tiyananapa ena majaneanana, tiúme'awanapaipa'i.

³⁰ Apina añu maka'e'i ema Pablo taye'e eta máitekapi'a'i, tamutu sacheana majakapawaka'i ena tipaipiuchanapa'i.

³¹ Máechejisi'a'i eta mawasa ema Viya akenuka te anuma, máimituka'iware eta náe'isiraina ema Viákenu Jesucristo, émaira'i yátupikene'i, nájina nakamatinaka'ini, náisapa'i tikametarairu.