Hechos 25 - Táurinakene máechejiriruwa’i ema Viya tikaijare

Nakatupiakapa ema Pablo te mamira'u ema Festo

¹ Ema Festo titekapa, tive'awapa eta mawakure, akenukayare'i taye'e eta awasare Cesarea. Te mapanakenepa sache, tiyanapa te Jerusalén.

² Ánaki ena tachutiri'ana ena tiyujarakara'iana, tási'a énapa ena juriyuana, tikurujikakanapa maye'e ema akenuka Festo. Nametauchapa ema Pablo.

³ Nayaseakapa, eta makátajikawaka'ini eta máewataka'ini te Jerusalén ema Pablo. Taicha nawara'a'i titsekawanayare'i te achene eta nakapasiraya,

⁴ émasera ema Festo majikapapa, ema Pablo manasiyare'i tikaerata te Cesarea. Taicha ema tiyanayare'i tichawa taye'e.

⁵ Ema máichawakapa: –Eta taka'e, te tatiari'ipuka eta échakeneana'i eti tuparairukana, tiúripana é'ikanu te Cesarea, apaesa vecha te tikaviurewa'ipuka ema maena achane.

⁶ Te tiáne'ipa eta diéskene sache eta mávi'aira'i ema Festo te Jerusalén, tichawapa te Cesarea. Te apanapa sache téjakapa taye'e eta máwakure'i. Máimichu'apa ema Pablo.

⁷ Te tisiapapa ema Pablo, témeña'awanapa ena mánarana, tiási'ana'i te Jerusalén. Nametauchapa ema Pablo. Ichape'iji eta maviurewa'i naye'e ena. Tájinasera naviya'ini eta naimerakina'ini, te je'esare'ipuka eta juka naichakeneana'i.

⁸ Émasera ema Pablo máichawakapa eta makatiuchirawa'i: –Nuti tájina nutapirawaina taye'e eta naye'erepiana, étainapukaini eta templo, émaina'iwarepukaini nukaeka'i'ini ema akenuka emperador romano.

⁹ Émasera ema Festo, mawara'a'i tiúriyare'i naye'e ena israelítana, mayaserekapa ema Pablo: –¿Piwara'a piyana te Jerusalén, étaina ánaki takaechakasi eta píchawakenewa'i?

¹⁰ Ema Pablo majikapapa: –Étaipa návi'a'i puiti te pimira'u píti viye'e juez, manakakenevi'i ema emperador romano. Pítipa tituparakavi'i, taicha péchaichu'i píti tájina nuviurewaina'ini naye'e ena nujaneanana.

¹¹ Té'eserapukaini nukaviurewa'ini, táimikapakanu'ini eta nuviurewa. Tájinasera nuviurewaina eta nametauchiranu'i. Wá'iware tituparakavi píjararekanu'ini eta naye'e ena nani. Té'eserapuka te wa'i pikukaitikanu, nuyasesereka puiti nuyana te mamira'u ema emperador nuye'ena juez ema.

¹² Taka'e, ema Festo makayasesererupa naye'e ena maye'eana abogado, tási'a, máichapa: –Piti piyasesereka'i piyana te mamira'u ema emperador, nísapaviya piyana.

Ema Pablo makamira'upa ema rey Agripa

¹³ Te jena sácheana'i, títekapapa te Cesarea ema rey Agripa, tási'a ésupa esu Berenice. Naechejipana'i ema Festo.

¹⁴ Eta nanasikenera'i jena sácheana, ema Festo mametakapa ema rey eta máichawakenewa'i ema Pablo. Máichapa: –Marari'i ani ema achane tikaerata'i tikaijare Pablo, manakiru'i ema Félix.

¹⁵ Te nuyanapa te Jerusalén, ena nakenumuriana ena tiyujarakara'iana, tási'a énapa ena naiyara'ana ena juriyuana, timetakanuanapa eta máichawakenewa'i, tiyaseakanuanapa eta nímikapasiraina.

¹⁶ Tási'a, nuti nujikapawakapa viti akenukara'ana taye'e eta roma, wa'i tituparaka'avi vímikapaka'ini mákani tikametauchakasi'i, te wicha'a tikamira'ukakana'i ema mánara'i níchawakapa.

¹⁷ Eta taka'e, te títekapanapa ani, wa'i náyerereji'ini nuti, te apanakenepa sache néjakawanepa te náwakure'i, nímichu'apa ema achane.

¹⁸ Nuti nímijachapa ichape'i eta maviurewa'i, étasera eta nametauchira'i, tájina wa'i táiñepi'ini.

¹⁹ Étachucha tímikaviucha'i eta naye'e religión, tási'a émapa ema náe'iru'i tikaijare'i Jesús, ema mákani tépena'i, puítisera ema Pablo máechejisi'a'i eta mápechirawa'i títareka.

²⁰ Nuti wa'i nímatiekene'a eta táicharakawaya eta juka, taka'e, nuyaserekapa ema Pablo, te mawara'apuka mayana'ini te Jerusalén, étaina takaechakasi eta juka maíchawakenewa'i.

²¹ Émasera tiyaseuchawapa eta mayaniraya te mamira'u ema emperador. Eta taka'e, nímiwanerekapa makajane'a, tiámainukawa te nítujikawa nímiwanerekapa nanapana.

²² Taka'e, ema Agripa máichapa ema Festo: –Nuti apanaware nuwara'a nusamaini ema mákara achane. Tási'a ema Festo májikapapa: –Tiuri, achichu pisamaya.

²³ Te apanapa sache tisiapanapa, ema Agripa, tási'a ésupa esu Berenice, taye'e eta náejasirare ena akenukana. Nakachanepa'i ena nakenumuri ena suntaruana, tási'a énapa ena tuparairukana taye'e eta awasare, taka'e ema Festo máimichu'apa ema Pablo,

²⁴ tási'a máichapa: –Rey Agripa, tátanaveana, emutu eti etiari'ikeneana'i te juka viúrujisirawa'i: máka'i ema achane nametaure'i ena majaneanana, ánaki te Jerusalén, étapa ani te juka Cesarea, nawara'a náimikapaka ema maka,

²⁵ nútisera tájina níma'a matapirawaina, émasera tiyaseuchawapa tiyanayare te mamira'u ema emperador, nísapa'isera mayana eta maye'e.

²⁶ Wícha'asera nukajure'ini ema nákenu emperador, taicha tájina nuviya'ini eta matapirawaina'ini, puítisera nukatupi'a ema te pimira'u piti rey Agripa, étipa eti tátanaveana, nuwara'a ímikatakanu eta táicharakawaya, apaesa nukajurepaini.

²⁷ Taicha wa'i tiuri véwataka ema tikaerata'i, te tájina matapirawaina.