Hechos 17 - Táurinakene máechejiriruwa’i ema Viya tikaijare

Nakaechepuka eta semanere te awasare Tesalónica

¹ Eta nayanira'i ema Pablo émapa ema Silas, tiánuku'anapa taye'e eta awasareana Anfípolis étapa te Apolonia, tási'a títekapanapa taye'e eta apanaware awasare Tesalónica, tatiari'i ánaki eta peti náurujisirarewa ena juriyuana.

² Eta maye'erepi'i ema Pablo, matupiru te peti náurujisirarewa ena juriyuana, mapana sáwaru eta makametarairuira'i naye'e ena achaneana.

³ Manetakawaka'i ema Cristo, eta maepenirayare'i, tási'a te taekenepa eta maepeniraya, techepukayarepa te maekari. Ánipa máichawaka'i: –Émaichu ema maka Jesús numetaru'e'i eti, émara ema Cristo.

⁴ Enananajiwaka ena tinerejikawana'i ena achaneana tisuapana'i, náurujiaka'i ema Pablo émapa ema Silas. Kamurianaware ena griegoana té'ikana'i ema Viya. Éneichuware ena esenana nayenana ena tikapika'ukeneana'i te awasare.

⁵ Énasera ena apamuriana juriyuana, timasuapana'i nakapinarupa ena apústuleana, tisemasamureanaine'i. Nakurujikapa ena wínarajipanereruana, máematanereana'i te calleana. Natanukapa ema Pablo émapa ema Silas, nawaraira'i nakaetemairika te namira'u ena achaneana. Tiyananapa te mapena ema Jasón.

⁶ Eta namaichimavira'i ema Pablo émapa ema Silas, nakaratakapa ema Jasón énapa ena apamuriana machamuriana. Nachururupaikawakapaipa'i eta námirapa'i te namira'u ena tuparairukana'i. Tipiarakanapa: –¡Títekapaucha'aviana'i ena nani achanetatajiana. Najararekapa'i eta viye'erepiana, na'apapika'iware eta napanereruana ena vijaneanana,

⁷ ena majakapakeneana'i ema Jasón te mapena! ¡Namutu ena nani nakaeka'i'i ema viye'e emperador, náepuruware eta mawanairipiana. Náimijacha'i marari'i ema apana rey tikaijare'i Jesús!

⁸ Te nasamapa eta juka, ena tuparairukana énapa ena apamuriana achaneana, napanerekene'aine'i.

⁹ Tájinasera apanaina'ini náicharaka'ini, nayaseakapa nanakika eta prenda eta náuchusirayare ema Jasón énapa ena machamuriana.

Tikametarairuana te awasare Berea

¹⁰ Te jena yátikene'i, ena nachamuriana nakuchukapa ema Pablo émapa ema Silas taye'e eta awasare. Tiyananapa nakaiju'e eta awasare Berea. Te títekapanapa ánaki, tiyananaware taye'e eta peti náurujisirarewa ena juriyuana.

¹¹ Ena israelítana tikawasana'i te Berea, tiúripanereruanapana naye'e ena tikawasana'i te Tesalónica. Nawapina ena, nasamararaka eta mametarairu'i ema Pablo. Tamutu sácheana nakarawa'u'i eta Takapika'ukene Ajureka. Nawara'a'i náechayare te yátupi'ipuka eta tametarapi'i eta Ajureka.

¹² Jé'esareine'i, kamuriana ena tisuapana'i. Kamurianaware ena apawasana tisuapana'i. Te namuri, natiari'iware ena esenana tikapika'ukeneana'i, énapa ena ajairana.

¹³ Nasamairikawarepasera ena israelítana tikawasana'i te Tesalónica eta makametarairuipa'iwa ema Pablo eta te Berea. Enewanepa tiyanana nakapayaka. Te títekapanapa, náimiyusemakawarepa ena achaneana.

¹⁴ Énasera ena machamuriana ema Pablo enewanepa náewataka ema te tachausi eta ichapeama une. Nanasipasera te Berea ema Silas, ema Timoteo.

¹⁵ Ena tinapanana'i ema Pablo, te títekapanapa te nanuereku, tiáwaku'anapa tiyananapa taye'e eta awasare Atenas. Tasi'a tichawanapa, ena tinapanana'i ema Pablo. Taka'e, ema Pablo matuparakawakapa nametaka ema Silas, ema Timoteo nayanawane nakapayaka ema eta te mávi'a'i.

Ema Pablo te awasare Atenas

¹⁶ Eta makuchapirawaka'i eta náitekapiraya ema Silas, ema Timoteo, waipa máitukakare'ini ema Pablo eta máimairawaka'i ena achaneana naye'e'earaka'i eta nasiñarajiana.

¹⁷ Taka'e, tamutu sáwaruana, tiyana eta te peti náurujisirarewa ena juriyuana. Máechejisi'a'i eta tiúrina echéjirirukawa naye'e ena, énapa ena apawasana griego tipikauchana'i ema Viya. Tamutuware sache máechejisi'a'i ema te plaza naye'e ena achaneana natiari'ikeneana'i.

¹⁸ Natiari'i ena té'ikana'i eta máimiturapi ema tikaijare epicúreos, énapa ena apamuriana tikarawa'uana'iware eta náimiturapiana ena estoicos. Téchejirikawanapa maye'e ema Pablo. Wá'isera nákaikutiarapa'ini eta makayemapa'i. Naka'epa: –¿Tája'asamipuka takayema'i eta mapanereru'i ema maka? Ena apamuriana: –Ema maka tikametarairura'i taye'e jákani apanaware masiñarajianaichu. Naka'e'i ena eta juka, taicha ema Pablo mametakawaka'i eta máepenira'i ema Jesús étapa eta máechepusira'i, mápechirawa'i títareka.

¹⁹ Taka'e, namapa ánaki taye'e eta peti náurujisirarewa ena juriyuana tikaijare'i Areópago, ánaki nayaserekapa ema Pablo: –¿Viwara'a vímati víti eta juka arairu'i pímiturapi'i eta viye'e?

²⁰ Taicha tiáramikare'i eta juka vimaimatikene'i, viwara'a véchayare tája'apuka takayema'i eta juka.

²¹ Taicha ene naka'e'i namutu ena tikawasana'i te Atenas, énapa ena apawasanana ena tikawasana'i ánaki, etachucha naematane'i tikasamara'iana tamutu sácheana eta nakayemakeneana, náima'akeneana, nasamakeneanapa'i, arairukeneana.

²² Taka'e, ema Pablo titupi'apa te namira'u, taye'e eta naurujisirarewa, máichawakapa: “Tátanaveana, eti ekawasana te juka Atenas, nímararaka'e'i eta yátupira'i religióso'e.

²³ Taicha te nítekapapa nuti eta ani eye'e, nupaika'i tamutu eta eyujarasirareana. Níma'apa eta eye'e tavirare eta iamawa'uasana tatiari'i'i eta ajureka ani taka'e'i: ‘Ema Viya vimaimatikene’. Tiuri, ema maka Viya eyujaraureasa emáimatikene'i eti, émara ema Viya néchejisi'akene'i nuti.

²⁴ “Ema Viya, émara ema tépiyaka'i eta jukana taiparakana tatiari'ikeneana'i te juka, ema Tata, ema técha'i eta anuma etapa eta apake'e. Ema Viya wa'i tákarichuima'i máukupaisi'aya eta te templo naépiyaruana'i ena achaneana,

²⁵ wá'iware makamunuwa'ini. Vítira vikamunuwa'i maye'e, ema téchapajirika'avi'i. Tíjaraka'avi'i eta tekatikawa, tamutu eta nakamunukeneana'i ena achaneana.

²⁶ “Akane te, máepiyakapa ema achane. Apánapaneneji'avi'isera máicha ema. Tamutu eta apake'e viáwapaika'i máicha. Máimikutiarachapa'isera eta táenasi'ayarepa'i eta viáwasanayare'i. Éneichuware, máimikutiaracha'iware eta táichekuirayare eta vítaresirana.

²⁷ Émasera mawara'a'i vitanukayare. Wá'ineni máyere'i'avi'ini. Titsekawa'i ema te vichakaya.

²⁸ Taicha vítareka'i máicha, tímipaika'avi'i, achane'avi'i máicha, émaipa ema ichapekene escriwáno te emuri eti maka'e'i eta máechejiriruwa'i: ‘Viti achaneana káitareka'avi'i ema Viya.’

²⁹ Víti vecha'i eta makaitaresira'avi'i ema Viya. Taka'e, véjekapirawa'i víti te vímijachapuka virata'a viáchanecha eta visiñaraji. Tayanapanepuka táurina eta vépiyasiraina, eta úrupuka, plátapuka, chínapuka. Wá'iware wárata'aima'i nakasiñakare'ini vícha.

³⁰ Te vikasiñaraji'ipuka eta vépiyaruana, vimáimatiraicha'a. Ánakiapaipa eta makamichira'i ema Viya, ena achaneana eta nakasiñaira'i eta nasiñarajiana. Puítisera waipa makamicha eta juka. Tiwaneka'avipa vimutu viti eta véñauchirawaina eta maye'e.

³¹ Taicha tatiari'iyare'i eta jena sacheyare máikuñakayare namutu ena tíchana'i eta juka. Marari'i ema achane manerejiru'i, ema Viya máimereka'i eta manerejisira'i ema Jesús juéseyare'i, taicha makaechepuka'i te máekari.”

³² Te nasamapa eta máechejisi'aira'i eta máechepusira'i te máekari ema Jesús, natiari'i ena nakaeka'ichucha. Ena apana naka'epa: –Té'enaineware apa'ena péchejisi'aware eta juka, apaesa visamavi.

³³ Taka'e, tiúchukapa ema Pablo eta te peti náurujisirarewa ena juriyuana.

³⁴ Natiari'isera ena apamuriana nasuapa'i, náe'ikapa eta mametarapi ema Pablo. Matiari'i ema Dionisio táiyara'a eta naye'e cabildo, ésupa esu esena tikaijaru Dámaris, tási'a énapa ena apamuriana'i.