Hechos 16 - Táurinakene máechejiriruwa’i ema Viya tikaijare

Ema Timoteo máe'ikawakapa ema Pablo, emapa Silas

¹ Taka'e, ema Pablo émapa ema Silas náejirawakapaipa ena nachamuriana tikawasana'i te Derbe, tási'a, tiánuku'anawarepa te Listra, anaki matiari'i'i ema Timoteo, suchicha esu ésuna esena israelita, té'ika'iware ema Jesús. Émasera ema maiya, apawasana'i griego'i, ema maka Timoteo émaichuware té'ika'i ema Jesús.

² Énerichuware, nakunacha'i eta máuriwa'i ena machamuriana tikawasana'i te Listra énapa ena tikawasana'i te Iconio.

³ Taka'e, ema Pablo mawara'apa mámayare ema Timoteo eta napaisiraya, taka'e, mawanekapa naikutiarachanuma apaesa takuija nakukayema ena israelítana tikawasana'i taye'e eta napaisi'ayare, taicha náimati'i ema eta machichaira'i ema apawasana'i.

⁴ Taka'e, tiyananapa, náejirawakapaipa ena nachamuriana te tamutu awasareana. Nametakapa'i ena eta táechejiriruwapa'i eta ajureka náimiamareru'iware ena apústuleana énapa ena náiyara'ana tiávi'ana'i te Jerusalén.

⁵ Ena nachamuriana, eta nasamirapa'i eta mametarairu ema Pablo, tétumechakakanapaipa eta nakasiñawaira'i, tamutu sácheana tikajanemurianapáichucha ena té'ikanapa'i.

Ema Viya máechejika'i ema Pablo mayana eta te Macedonia

⁶ Tiuri, ema Machanewa ema Viya mametaka'i wa'i nakuyana eta te tinapaika'i eta awasareana te Asia. Tási'a, náetavikapa eta awasarechichana táunawana'i eta Frigia etapa eta Galacia,

⁷ nakaiju'eyare'i te tinapaika te Bitinia, té'esera te nakanarapa eta Misia. Ema Machanewa ema Viya mametakawarepa wa'i nakuyana taye'e, taka'e náetaviekene'apa.

⁸ Taka'e tianuku'anapa taye'e eta Misia, tiukupaikanapa te tachausi eta tanuereku eta Tróade:

⁹ Te jena yati, máima'apa ema Pablo te mawapure ema achane tikawasa'i te tinapaika te Macedonia. Titupi'apaji eta máechejisira'i: “Piánueka te juka Macedonia Pímikatapana'avi.”

¹⁰ Eta máimaira'i ema Pablo te mawapure, enewanepa vétupirikawapa eta viyaniraya taye'e eta Macedonia, taicha vémeteaka'i eta mawaraira'i ema Viya eta viyaniraya eta ánaki, vikametarairuirayare.

Títekapanapa te awasare Filipos

¹¹ Viáwaku'apa eta te vianuereku Tróade, viyanapa taye'e eta tiúrupu'i tikaijare Samotracia. Te apanapa sache, vítekapapa te Neápolis.

¹² Viyanapa te awasare Filipos. Eta juka awasare nawapairu'i ena rumanuana. Eta ichapepana'iware taye'e eta awasarechichana, tinapaika'i te Macedonia. Te Filipos vinasipanapa jena sácheana.

¹³ Jena sache sáwaru'i, viyanapa te tachachaku eta awasare te tachausi eta kajakure. Véjakapa taye'e. Vikametarairupa naye'e ena esenana náurujiruwana'i taye'e.

¹⁴ Sutiari'i esu esena tikaijaru'i Lidia; esu, suchusine'i te awasare Tiatira. Esu suka tíjararekara'i eta yerérukawa sedana mularumeana. Ésuichu, tipikaura'i me Viya. Susamarakaipa eta mametarairu'i ema Pablo. Ema Viya mavejiasinaipa eta susamure sujakapirayarepa'i eta mametarairu ema Pablo.

¹⁵ Enewane'i tikaikachasi'i esu, énapa ena tiávi'ana'i te supena. Taka'e, suwara'apa tiáma'avi eta te supena. Suka'epa: –Te yátupira'i eta né'isira'i nuti eñi Viákenu Jesús, ítekapauchanupaini te nupena. Tási'a, tikamesa'avipa tiáma'avi te supena.

¹⁶ Te apana sache, te viápechawawarepa viyana taye'e eta nayujarasirare, vikainunapa esu ésuna amaperu máwa'aru'i ema éreana. Tijarauki'i esu máicha. Esu suka amaperu wanaraka'i. Ichapemuri'i eta plata suwachana'i, suíjarakapa'isera ena suákenuana.

¹⁷ Esu suka amaperu tépanawapa te'ika'avipa'i, tipiarakapa'i te vékene: –¡Ena nani ajairana ñiwanarana eñi Viya Viákenu ichapekene, tási'a náechejisi'aware eta achene tikaiju'e ñe Viya ena nauchukureanayare!

¹⁸ Ichapemuri eta sácheana eta sué'ikarairisira'i, mapuñakapa ema Pablo. Tékerukawapa, tási'a máichapa ema éreana ema tiáwa'aka'i esu: –Te máijare ema Jesucristo, nuwanekavi piúchuka te suáke'e esu suka amaperu. Enewanepa tiúchuka ema éreana, majunijiakapa esu.

¹⁹ Te náechapa ena suákenuana'i tisemanapa, taicha tájinapa suviya'ini eta suplatanechi'awaka'ini, taka'e nakaratakapa ema Pablo, tási'a émapa ema Silas, námapa te plaza te namira'u ena tuparairukana'i.

²⁰ Taka'e, nametauchawakapa naye'e ena tuparairukana'i, ánipa naka'e'i: –Ena nani ajairana juriyuana, nakaechepuka'i eta tamaurikeneana, nayurukapa ena achaneana te juka viawasa,

²¹ tási'a timiturerekanapa eta naye'erepiana vimaimatikeneana, nawara'apa timinajika'aviana eta viye'erepiana viti rumanuana.

²² Taka'e, ena achaneana tisemanapa naye'e ena, taka'e, ena tuparairukana juéseana'i nakawanairipipa navejamu'iakawaka, náestakawakapa te yukukipi.

²³ Te tamutupa eta náestasirawaka'i, námapa te nakaeratairare, nawanekapa ema techapajirikara'i eta te nakaeratairare máechapajirika muraka.

²⁴ Te masamapa ema eta nawanairipi'i, máimisiapawakapa taye'e eta tékene'a kalavuso. Máeratapikichawakapa te yukuki tajitakarekene eta taijare cepo.

²⁵ Té'esera te enumu'ukenepa eta yati, eta nakaerataira'i ema Pablo, tási'a émapa ema Silas, tijiranaichucha, tási'a tiyujarakana'iware me Viya, ena apamuriana nakaeratakeneana'i nasamararakaipa eta jirasare,

²⁶ tíja'uchawapa tiyamurika'i, muraka eta apake'e, tiyamurikapa eta yúchamana, tíja'uchawapa téjiakawaka eta tapajakurana eta nakaeratairare. Téjapukapa eta cadena náiti'ana'i ena nakaeratakeneana.

²⁷ Te téjamiuchawapa ema tijanearekara'i eta nakaeratairare, máima'aine'i eta tapajana téjiakawakaipa'i, máimijachapa nájinaipa'i ena nakaeratakeneana'i, tási'a mave'apa eta maye'e espada, mawara'apa tikapakawayare'ini.

²⁸ Émasera ema Pablo mapiarakapa: –¡Wa'i pikukapakawa, vitiari'ichu'i vimutu viti ani!

²⁹ Taka'e, ema tijanearekara'i eta nakaeratairare, tiyaseserekapa eta mamika'uyare, tisiapapa, tiyayakarepainecha eta mapisirapa'i, tépuyukapa te namira'u ema Pablo émapa ema Silas.

³⁰ Taka'e máichu'awakapa ena, tási'a mayaserekawakapa: –Tátanaveana, ¿tája'apukaini nícharakawaini eta núchukuirayare?

³¹ Ena najikapapa: –Pákasiña ema Viákenu Jesucristo, tási'a ema tikuchuku'aviyare píti, tási'a énapa ena pichichanaveana.

³² Taka'e, náimitukapa ema eta máechejiriruwa ema Viya, tási'a énapa namutu ena tiávi'ana'i te mapena.

³³ Étaichu jena yati, ema tijanearekara'i eta nakaeratairare masipasinawakapa eta najarana ema Pablo émapa ema Silas, taka'e tikaikachasipa ema, esu mayena, énapa ena machichanaveana.

³⁴ Te táekenepa eta juka, mámamuri'apa te mapena, máenikawakapa, tiúrisamureipa'i ema, énapa namutu ena tiávi'ana'i te mapena, eta makuchukuirawakayare ema Viya eta nasuapiraipa.

³⁵ Te yátikara'ipa, ena juéseana'i nawanekapa ena nasuntarurana naichapana ema tijanearekara'i eta nakaeratairare, eta nakuchupanawakayare'i ema Pablo émapa ema Silas.

³⁶ Taka'e, ema tijanearekara'i eta nakearatairare máichapa ema Pablo: –Jukari'i eta wanairuka naye'e ena juéseana, eta nakaitisira'eya, tiúripa eyana iuchuka, waipa táeñamawakare.

³⁷ Émasera ema Pablo máichawakapa ena suntaruana: –Víti vikawasa te roma. Wa'i táurika'ini eta náichira'avi ena juéseana téstaka'avianapa te namira'u ena achaneana. Wa'i nayasereka'avinuma'ini te tatiari'i'ipuka eta viviurewa'i. Tási'a puiti, nawara'apa nayumurukayare eta nakuchusira'aviyare. ¡Wa'i ene táka'e! Emétaka énaina náiteka nakuchupana'avi.

³⁸ Ena wanairukana tichawanapa. Nametakapa ena juéseana eta máechejiriruwa'i ema Pablo. Íchapeine tipikana'i ena juéseana eta nasamira'i tawanaranaira'i eta roma.

³⁹ Taka'e tiyananapa ena juéseana nakuchupana'i. Nayaseakapa eta naemetavika'ini eta naichakeneana'i naye'e ena. Nayaseakawarepa naúchukaini eta te juka awasare.

⁴⁰ Te tiúchukanapa eta te nakaeratairare, ema Pablo émapa ema Silas, tiyananapa te supena esu Lidia. Nakurujikapa ena nachamuriana naetumechawakapa, tási'a tiyananapa.