Hechos 15 - Táurinakene máechejiriruwa’i ema Viya tikaijare

Tiakapaemachakakanapa ena apústukeana enapa ena naiyakarana

¹ Te jena sácheana, títekapana te Antioquía ena apamuriana israelítana, tiási'ana'i te Judea nawara'apa na'apapirikawaka ena apawasana té'ikanaripa ema Jesús, ánipa naicha eta náimituresira'i: Te ewara'a iuchuku'a eta íkuñayareni, takamunu ítauchayare eta mawanairipi'i ema Moisés eta maimikutiarachaya.

² Ema Pablo, émapa ema Bernabé tiakapaemachakakanapa muraka naye'e ena tipamikana'i ena apawasana, taka'e nawanekapa ema Pablo emapa ema Bernabé, natiari'iware ena apamuriana nanerejiruana'i tiyananayare'i eta te Jerusalén naechapanayare'i eta juka naye'e ena apústuleana, enapa ena tachutiri'ana techana'i eta templo te awasare.

³ Eta napaisirapa'i te achene, tétawajikanapaipa'i taye'e eta awasarechichana táunawana'i eta Siria, étapa te Samaria, návi'a'i ena apamuriana nachamuriana'i. Nametakapaipa eta náinajisira'i ena apawasana eta naye'erepianaini tamaurikeneana, taicha náe'ikaipa'i ema Viya. Taka'e, ena nachamuriana, eta nasamairisira'i eta juka, tiúrisamureanaine'i ena.

⁴ Te titekapanapa te Jerusalén ema Pablo émapa ema Bernabé, ena apústuleana énapa ena náiyara'ana'i, nakurujikapa ena nachamuriana eta najakapiraya ena araitekapiana'i. Taka'e, ena nametakapa eta máimikatasirawakapa'i ema Viya eta napaisirapa'i ena.

⁵ Natiari'iware ena fariseona té'ikanaipa'i ema Jesús, titupi'anapa ena, ánipa naka'e'i: –Táitaurewakene takamunuichu vimikutiaracha ena apawasana té'ikanaipa ema Viákenu Jesús. Takamunu'iware náe'ika eta juka mawanairipiana'i ema Moisés.

⁶ Taka'e, tiúrujikawanapa ena apústuleana énapa ena náiyara'ana. Nawara'apa náetupirika eta juka.

⁷ Nakaemataneakaipa eta juka náechejisi'a'i. Taka'e ema Pedro, máichawakapa: –Nuparapenaveana, échaichu'i eti ánakiapaipa eta manerejisiranu'i ema Viya eta nukametarairuya eta naye'e ena apawasana eta náuchukuirayare'i táichavenena'i eta nasuapirayare ena apana.

⁸ Ema Viya máimati'i eta nasamureana ena apawasana eta nasuapira'i, tási'a, máimereka'i eta majakapirawaka'i eta máwa'asirawaka'i ema Machanewa ema Viya takuti'i eta máwa'asira'avi'i víti.

⁹ Ema Viya, nájina manerejiruina eta máemunasira'avi, témunaka'avi'i vimutu viti, eta taka'e'i, masípasinawakaipa eta nasamureana ena táichavene'i eta nasuapira'i.

¹⁰ Puitisera, ¿tája'a takayema ewára'apa épuruyare eta máichakeneana'i ema Viya, víti'ipa wá'iware wárata'a'ini vítaucha'ini, taka'e, wáipa táurika'ini vékati'awaka'ini ena vichamuriana apawasana náicha'ini eta juka?

¹¹ Véchaipa'isera yátupi eta viúchukuiraya táichavene'i eta makatajisira'avi'i ema Viákenu Jesucristo. Ena apawasana, wá'iware étaparakaina eta naikutiaraina ena.

¹² Timatinanapa namutu, nasamararakaipa ema Bernabé, émapa ema Pablo. Nametamuri'apa eta máimechira'i ema Viya eta mawanesirawaka'i ena, taicha máijarakawaka'i eta náichira'i eta tiáramikareana te namira'u ena apawasana.

¹³ Te títapirikanapa eta nametarapiana'i, émapawapa ema Santiago téchejika. Maka'epa: –Nuparapenaveana, esamanucha'a:

¹⁴ Ema Simón Pedro timetaka'avipa te tépanawainapa majakapawakainapa ema Viya ena apawasana machaneranayare'i ema.

¹⁵ Eta juka tatupiruwa'i eta taechejiriruwaí, najuchajene'i ena profetana, eta takayamakene'i eta Takapika'ukene Ajureka:

¹⁶ ‘Te táekenenapa eta juka, nápechawaya nuchawa tási'a nétupiripanaya eta nupena tákipairuwa'i, maye'eni ema David; nétupiripanaya eta takipairuwana'i tási'a napechayare nukatupi'a,

¹⁷ apaesa ena apamuriana natanuka ema Viakenu namutu ena tikawasana te apana awasareana nuchaneranayarewa ena taicha námayare eta níjare.

¹⁸ Etara eta jukana maimeru'avi'i ema Viákenu, eta juka akanewakaipa'i, eta maijarasira'avi'i eta maechejiriruwa.’

¹⁹ “Tiuri, eta juka eta nupanereru'i núti tiúripana vésamirikawakachuka ena vichamuriana apawasana náekeruwanaipa maye'e ema Viya, wa'i vikupamika nae'ika eta viye'erepiana.

²⁰ Tarataichu vikajurewaka tametaka eta waipa nakuapechawa nakunika eta taeche eta sárare náijarakasiruana eta nasiñarajiana, wá'iware nakuve'a súkani apana esena, énaipa ena esenana, wá'iware nakuve'a ema apana achane, wá'iware nakunika eta taeche eta sárare taeriru, étaipa eta táitine, wá'iware nakunika.

²¹ Taicha ánakiapaipa eta nakametarairuira'i eta mametarapi ema Moisés tamutu eta awasareana, naechejikuiyapa'i taye'e eta peti naurujisirarewa ena juriyuana eta te sawarumu'uana.”

Eta ajureka naye'e ena apawasana

²² Ena apústuleana, tási'a énapa ena náiyara'ana, namutu ena náumuriwana, tiúri'i nasama eta mapanereru'i ema Santiago. Taka'e, tikawana'ianapa ena apinana téchemara'iana tikapika'uana'i, ema Judas, ema naimijarecha'iware Barsabás, émapa ema Silas, ena té'ikanayare'i ema Pablo émapa ema Bernabé, eta nachaviraya te Antioquía,

²³ tási'a éneichu'iware tiamana'i, eta ajureka: “Vímiamareka eta juka véchejiriruwa viti apústuleana, énapa ena víyara'ana, énapa ena vichamuriana te juka Jerusalén. Viwara'a tatiwayare véchejika'e eti viparapenaveana'i te mawa'uana ema Viákenu, eti apawasana tiáviana'i te Antioquía, étipa eti tiáviana'i te táunawana'i eta Siria étapa eta Cilicia.

²⁴ Visamairika'i eta nayanira'i ena tiási'ana'i ani te juka, tiáwajiririka'eanapa, nawara'a'i na'apapikayare eta epanereruana, tikamesa'eana'i ítauchayare eta mawanairipiana ema Moisés eta tikutiaracha'eanayare, wá'isera viwaneruina'ini eta viye'e eta náimitusira'e'i eta juka.

²⁵ Véwataka'i ema Judas émapa ema Silas, wanairukana'i viye'e, ena, timetaka'eanayare tamutu eta juka téchakareana'i viye'e, ena nani té'ikanapa'i ema Bernabé ema Pablo, ena viparapenaveana vémunarukeneana,

²⁶ Ema maka Bernabé émapa ema Pablo, tíjarakawana'i ena náepenakaya ema Viákenu Jesucristo taichavene eta nakametarairuira'i.

²⁷ Taka'e viwaneka'i ema Judas emapa ema Silas: enakeneyare techejirikawanayare eye'e eti ena timetaka'eanayare tamutu eta juka techakareana.

²⁸ Ani te juka víti, vikutikaka'i eta vipanereruana'i, máimitusira'avi'i ema Machanewa Viya, wa'i wáwara'a'ini takajeraekene'ini eta é'isirayare ema Viákenu, wa'iware vipamika'ema'i icha eta apana wanairipiana.

²⁹ Wa'i ekunika eta taeche eta sárare nayujaraure'i ena achaneana te tamira'u eta nasiñarajiana, wá'iware ekunika eta táitine eta sárareana, wá'iware ekunika eta taeche eta sárare namaechatinure taeriru, wá'iware ekuve'a esu apana esena, éneichuware eti esenana, wa'i ekuve'a ema apana achane. Te yátupina esuapa eta júkana, tájina íchirawaima'i te mamira'u ema Viya. Tamutupa eta juka véchejiriruwana'i eta eye'e.”

³⁰ Taka'e, tiyananapa namapapaipa eta nimiajureru'i, nakaiju'epa te Antioquía, te títekapanapa ánaki, nakurujikapa ena nakaiju'ekeneana'i nachamuriana, náijarakapa eta námakenepa'i carta.

³¹ Te najakapapa eta carta, navejiakapa, náechejiku'apa te namira'u namutu ena nachamuriana, tétavikawa'i eta náurisamurewa'i eta nasamira'i.

³² Nanasipanapa jena kájeana'i ema Judas émapa ema Silas, ena, énerichuware profetana'i naituka'iware, eta máechejiriruwa ema Viya. Tiúri'i eta náimitusirawaka'i ena nachamuriana, naechejirikawakapa, náetumesamurechawakaine'i náicha.

³³ Te tamutupa eta náimituresira'i, tichawanayarepa naye'e ena tiwanekana'i, taka'e, ena nachamuriana'i náechejiemachawakapa, nayaseakapa ema Viya táuriwainapa'i eta napaisiraina.

³⁴ Émasera ema Silas mawara'apa manasiyare taye'e.

³⁵ Énerichuware, ema Pablo émapa ema Bernabé nanasiwarepa taye'e eta awasare Antioquía, nakachane ena apamuriana kamurikeneana, tímiyanawanapa timiturekana eta maechejiriruwa ema Tata Vikaiyakene.

Ema Pablo majunijikapa ema Bernabé

³⁶ Te táekenepa eta juka semanana'i, ema Pablo máichapa ema Bernabé: –Viyanaware viápechawa vipaika taye'e eta awasareana, véjirawakapa'i ena vichamuriana te vipaisineanapa'i kape juka te tínapukainapa viyana'i, víma'a tája'apuka náicharakawa'i.

³⁷ Taka'e, ema Bernabé, mawara'apasera mama ema Juan ema naichasa Marcos;

³⁸ émasera ema Pablo wa'i máwara'a'ini mayana'ini ema Marcos, taicha te tínapukainapa tipaikana manakimuri'a'i ema Marcos taye'e eta Panfilia, wa'i máimikataka'íni taye'e eta náemataneanapa'i.

³⁹ Nakaemataneakaipa eta mamawaraira'i mayana'ini ema Marcos. Taka'e, tínajikakanapa. Ema Bernabé tiyanapa, makachane'i ema Marcos, tiáwaku'anapa, nakaiju'eyarepa eta tiúrupu'i Chipre,

⁴⁰ taka'e, ema Pablo mapanerechapa mámayare ema Silas, te tétupirikawanapa, nayujarauchanumapa ena nachamuriana, nayaseakapa ema Viya eta máimikatasirainapa'i eta napaisiraya, tikametawanapa tiyananapa.

⁴¹ Eta napaisirapa'i te achene tétawajikanapaipa taye'e eta awasarechichana Siria étapa te Cilicia, náejirawakapaipa ena nachamuriana náetumesamurechawakapaipa'i eta naimiyanawa nasuapa ema Tata Viya.