Hechos 13 - Táurinakene máechejiriruwa’i ema Viya tikaijare

Ema Bernabé tási'a émapa ema Saulo tépanawanapa tipaikana tikametarairuanayare

¹ Ena té'ikana ema Jesús, tikawasana'i te Antioquía, natiari'i te namuri ena tikametarairura'iana eta maéchejiriruwa ema Viya. Tímitura'iana'i ena. Natiari'iware ema Bernabé, ema Simón (náimijarechaware Negro), émapa ema Lucio (eta máuchusine'i te Cirene), ema Menahem (ema machajuru'i ema Herodes),

² eta jena sache, tiyujarakana'i, maye'e ema Viya, náicha'iware eta ayuna. Taka'e, máechejikawakapa ema Machanewa ema Viya. Máichapa: “Ema Bernabé émapa ema Saulo, natupara'aichu'i tikametarairuanaya taicha nunerejiruana'i ena.”

³ Taka'e, te tamutupa eta nayujarasira'i. Nanakapa eta nawa'uana nayujarauchira'i te nápusiana ena. Taka'e, tikametawanapa, tiyananapa.

Ema Bernabé émapa ema Saulo tikametarairuanapa te tiúrupu'i Chipre

⁴ Ema Bernabé ema Saulo, mawaneruana'i ema Machanewa ema Viya, tiyananapa te Seleucia. Taka'e, tiánuekanainapa, nakaiju'eya eta tiúrupu'i tikaijare Chipre.

⁵ Te títekapanapa te puerto tikaijare Salamina, tiyananapa eta te peti náurujisirarewana ena juriyuana. Tikametarairuanapa eta máechejiriruwa ema Viya. Mae'ikawakapa'i ema Juan Marcos.

⁶ Tamutupa napaika'i eta tiúrupu'i. Tíyananapa te tikaijare Pafos. Ánaki matiari'i ema émana juriyu tikaijare Elimas Barjesús. Iápemare'i ema tépiya'ira'iware tímijachawa'i máimati ema Viya.

⁷ Ema maka iápemare makachanejirika'i ema Prefecto Sergio Paulo. Ema maka Prefecto, téchemara'i. Tási'a, máimiwanerekapa náichu'apana ema Bernabé émapa ema Saulo, taicha mawara'a'i masamaya eta máechejiriruwa ema Viya.

⁸ Émasera ema iápemare tikaijare te náechejiriruwa griego ema'i Elimas, maichejimirauchapa, mayurukapa ema Prefecto eta wa'i makusuapa.

⁹ Taka'e, ema Saulo, puiti tikaijare'i Pablo, máwa'arukene'i ema Machanewa ema Viya, máimararakapa ema iápemare.

¹⁰ Taka'e, máichapa: –¡Tiwayuara'i matsiriaraira'a, piti machicha ema Wínaraji. Piti pikatianaka tamutu eta táurikeneana! Píti píchejimirauchawaka'i ena tiwara'ana té'ikana ema Viákenu.

¹¹ Puiti ema Viya tíkuñakaviyare: Púchukiviyare máicha, tiyereyare eta wa'i píma'aima'i eta tajaraiwa eta sache. Jé'esareine'i, tíja'uchawapa téma'a eta máimairisira, púchukipa ema iápemare, matanukapa ena tichurukanaya te mawa'u.

¹² Te máima'apa ema Prefecto eta juka maramine'i, masuapaine'i eta masamira'i eta náimiturapiana ena apústuleana maye'e ema Viákenu Jesús.

Ema Pablo émapa ema Bernabé tiyananapa te awasare Antioquía te Pisidia

¹³ Ema Pablo énapa ena makachanekeneanapa'i tiáwaku'anapa. Najunijikapa eta Pafos, tiyananapa te awasare Perge táunawa'i eta Panfilia; te títekapanapa te Perge, ema Juan Marcos majunijikawakapa ena, tichawapa te Jerusalén.

¹⁴ Ena, tiánuku'anapa nakaiju'epa te awasare Antioquía ichipichu, te tinapaika eta Pisidia. Te jena sache, sáwarumu'u'i, tisiapanapa ena te peti náurujisirarewa ena juriyuana. Tasi'a téjakanapa.

¹⁵ Taekenepa, náechejiku'apa eta Takapika'ukene Ajureka, nájure'i ena profetana. Te tamutupa eta naechejikuira'i, nayaserekapa ena araitekapiana'i: –Viparapenaveana, te tatiari'ipuka eta échejisi'ayare viye'e víti, táurikapa icha puiti.

¹⁶ Taka'e, ema Pablo titupi'apa. Makanukechapa eta mawa'uana eta máechejisirayare'i. Ánipa maka'epa: –Esamanucha'a, eti israelitana, étipa eti apajuekunana, epikaura'iana'i maye'e ema Viya.

¹⁷ Ema Viya manerejikawaka'i ena viáchukanaveanaini Israelitana. Te návi'aicha'a te apanakene awasare tikaijare Egipto. Éneichuware, te máiputsikawakapa te jena awasare návineni'i, máimerekapa'i eta máitupajijiasirawa'i máimikatasirawakapa'i ena.

¹⁸ Tási'asera, cuarenta añu eta makamichira'i ema Viya eta náejekapirawana taye'e eta návi'aira'i te máwapa'i wáma'i.

¹⁹ Tasi'apa makamitiekene'aware eta siétekene awasareana, ena apánapanenejikeneana tikawasanaini'i te Canaán. Tási'a, máijarakapa ena viáchukanaveanaini eta jena apake'e natupara'akene'i.

²⁰ Tamutu eta juka tayerewa'i, cuatrociento cincuenta añu eta majaneasirawaka'i, mawanekapa ema profeta Samuel, téchapajirikayare'i naye'e'i juez.

²¹ Taka'e, ena nayaseakapa ema Viya ema naye'eyare'i rey, tási'a, máijarasi'apa ema Viya ema naye'eyare'i rey tikaijare Saúl, machicha ema Quis, mámariekeneni ema viáchukaekeneni Benjamín, cuarenta añu eta makatupara'aira'i.

²² Te táekenepa, ema Viya máitsiwachapa ema Saúl, tikaijarepa ema David, émapawapa rey'i, taicha maka'epa ema Viya: ‘Nímararaka'i ema David, machicha ema Isaí, núrika eta máuriwa'i, taicha máitauchayare tamutu eta nuwanairipianaya.’

²³ Matiari'iyare ema émana mámariekeneyare ema maka David tiúchukayare'i ema Tikatiura'iyare viye'e viti israelítana, mawaneru'i katiura'iyare'i, maitauchapa eta maikure'i.

²⁴ Te tamira'upaicha'a eta máimeresirawayare'i ema Jesús, tikametarairuipa ema Juan naye'e ena achaneana vijaneanana israelítana, mawanekapa'i eta náeñauchirawaina maye'e ema Viya apaesa nakaikachasipaipa.

²⁵ Taka'e te tiane'ipa eta maitavira ema Juan, maka'epa: ‘Ímijachaipapuka nuti'i ema Cristo, ema vikuchapakene'i, wá'ira nútina, títekapainapasera ema, té'ikanupa'i te nekene, wáipaine'i nákaemuñawaima'i nuvejuchupewacha eta maeparupewa.’

²⁶ “Esamanucha'a, emutu eti nujaneanana, eti nukutikeneana'i eta mámariekenera'avi'i ema viáchukaini Abraham, étipa eti apawasana epikaura'iana'i maye'e ema Viya: eta juka maechejiriruwa katiura'i vikuchi'i vimutu achaneana.

²⁷ Taicha ena tikawasana'i tejena awasare Jerusalén, énapa ena nakenumuriana, wa'i naimati'ini ema Jesús wa'iware nakaikutiara'ini eta naechejiriruwana ena profetanaini, eta nakáyemakene'i te jena peti naurujisirarewa ena juriyuana tamutu eta sawaruana; enaipa wa'i nakaikutiara'ini, taka'e nakapakapa ema Jesús, titauchawapa eta nametarapi'i.

²⁸ Wa'ineni naichimawa'ini eta taviucha'ini matapirawaina'ini eta nakapasiraina'ini, taka'e nayaseakapa ema Pilato makawanairipi nakapaka.

²⁹ Tási'a, te títauchawapa tamutu eta taechejiriruwa eta Ajureka eta nakapasirayare'i, ena máimitureana nakukupaikapa te makurusura, náekarapa.

³⁰ Émasera ema Viya makaechepuka'i te máekari.

³¹ Taka'e, kamuri eta sácheana máimeresirawa'i ema Jesús naye'e ena máimitureana, ena nani makachanewakapa'i te mási'apa te Galilea, té'epa te tiyanapa te Jerusalén. Ena tíma'ana'i, énara titametakana'i téchejisi'ana'i ema Jesús, puiti te namira'u ena achaneana eta máechepusira'i.

³² “Taka'e vitira vikametarairu'i eye'e eta Arairu maechejiriruwa ema Viya: Eta maikure'i ema, naye'e ena viáchukanaveanaini,

³³ títauchawaipa'isera eta máechejiriruwa'i, maikure'avi'i viti machichanaveana, taicha makaechepuka'i te máekari ema Jesús. Étara takayemakene'i eta apinakene Salmo: ‘Pítira nuchichavi; nímimatichaviyare naye'e ena achaneana eta nuchichairavi'i eta nukaechepusiravi'i te pékari.’

³⁴ Máechejisi'aipa'i ema Viya eta makaechepusirayare'i, apaesa eta make'e wa'i takuemitiekene'a, taka'e'i eta Takapika'ukene Ajureka: ‘Taicha níjararuwa'i eta juka néchejiriruwa'i maye'e ema David.’

³⁵ Éneichuware, taka'e'i eta máechejiriruwa'i te apana Salmo: ‘Wa'i písapaima'i témitiekene'a eta máke'e ema pichicha pémunarukene'i.’

³⁶ Tiuri, ema David, yátupi'i eta máechapajirisirawaka'i ena machanerana. Te títekapapa eta matupara'a'i maye'e ema Viya, tépenapa ema David. Makapayakapa ema maiya te mavi'a'i. Taka'e témitiekene'apa eta maeche.

³⁷ Émasera ema Jesús wa'i táemitiekene'a'ini eta maeche te máekari, taicha makaechepuka'i ema Viya.

³⁸ Taka'e nuparapenaveana, nuwara'a numetaka'e puiti apaesa ímatiékene'a. Ema Viya mawara'a makaepa'a eta epekaturana te ákasiña ema Jesús.

³⁹ Emasera ema Viya makaepa'a tamutu eta vivekaturana namutu nákaini tisuapana ema Jesús.

⁴⁰ Tási'a puiti, échapawayare, apaesa wa'i ekuakipaikawa eta eye'e eta naichakene'i najure'i ena profetanaini:

⁴¹ ‘Íma'a, eti épurura'iana'i, iáramekayare eyanapa ejuna, taicha titekapainapa eta sache nichayare eta tiaramikareana emáima'akeneana'i eta emasuapakene'i eti, natiari'inapuka ena nametaka'e.’ ”

⁴² Te tamutupa eta máechejisira'i ema Pablo enapa ena machamuriana tiuchukanapa taye'e eta peti naurujisirarewa ena juriyuana, nayaseakapa ena apawasana te apana sache sáwarumu'u naimiyanawa'ini naimituka eta juka techakareana.

⁴³ Taka'e titawapa eta naurujisirawa'i eta te peti naurujisirarewa ena juriyuana, kamuriana ena juriyuana té'ikanaini'i eta naye'erepianaini, namutu ena nae'ikapa ema Pablo emapa ema Bernabé, enasera naechejirikapa eta naetumechirawaina eta nae'isira'i najakapira'i eta maemunasira'i ema Viya.

⁴⁴ Te apanawarepa sáwaru, namutuyareni ena achaneana tikawasana'i te awasare tiúrujikawana nasamararakayare'i eta máechejiriruwa ema Viya mametarapiyare'i ema Pablo.

⁴⁵ Énasera ena juriyuana masuapajiraira'ana'i, te náima'apa ena kamurikeneana, tisemanapa eta mametasirawaka'i ema Pablo eta najakapakarewa'i me Viya ena apanawa, eta taka'e, nákapaemachapa ema Pablo, napanararachapa eta nakajachira'i.

⁴⁶ Te nasamapa ema Pablo émapa ema Bernabé eta náichira'i ena tikatianakana'i, tájina wa'i nayututuema'ini, náichawakapa: –Tatuparaka'i étiwayare'i eti vijaneanana juriyuana; vímituka'e eta juka máechejiriruwa ema Viya. Étisera wa'i iúrika'ini eta esamira'i, wá'iware ésacha'ini ésenika eta máwasa ema Viya, taka'e puiti, énainapuka vímitukawakaya ena apawasana.

⁴⁷ Taicha víti viwanekasiwa'i me Viya, vítauchayare eta juka mawanairipi, ani maka'e'i: ‘Nutuparakaviyare píti pimikauchayare tamutu awasareana te juka apake'e, Piamayare eta néchejiriruwana pikametarairuyare naye'e ena achaneana ánaki te tayere'ikenepanana taye'e eta juka apake'e.’

⁴⁸ Te nasamapa eta juka ena, apawasana, tiúrisamureanapa, tási'a, naka'epa Tétavikawapa táurinawa eta juka máechejiriruwa ema Viya; énerichuware, nasuapapa ena máichu'akeneana'i ema Viya eta náitaresiraya máichekuarakireya te táekenenapa eta náepeniraya.

⁴⁹ Taka'e'i eta, nakametarairura'i eta máechejiriruwa ema Viakenu naye'e ena achaneana tikawasana'i tejena apachakaya.

⁵⁰ Narari'i'isera ena tikatianakana'i ema Pablo émapa ema Bernabé, israelitana'i ena, taka'e, náimitukapa ena tuparairukana te awasare, énapa ena esenana tikapika'ukareana'i, té'ikana'i eta naye'erepiana, énerichuware napamikapa ena achaneana, nawaraira'i nákijikaya taye'e eta awasare ema Pablo emapa ema Bernaé, nakuchukawakapa ena apinana.

⁵¹ Taka'e, eta nayanirayarepa, tetatapewachawanapa eta náeparupewana te namira'u ena tikatianakana'i, táikutiara'i eta namáimitukakarewa'i ena, taka'e, tiyananapa nakaiju'epa eta te awasare Iconio.

⁵² Énasera ena apamuriana té'ikanaipa tímiyanawanapa eta nasuapira'i ema Viya, tiúrisamureana'iware ena taicha eta máwa'asira'i ema Machanewa Viya.