Hechos 12 - Táurinakene máechejiriruwa’i ema Viya tikaijare

Nakapakapa ema Santiago, tási'a náeratakapa ema Pedro.

¹ Te jena añuana'i, ema rey Aluresi, makawanairipipa nakaratakawaka ena tachutiri'anapa'i ena té'ikana'i ema Jesús.

² Éneichuware, makawanairipipa nakapa ema Santiago, maparape ema Juan,

³ tási'a, eta máimaira'i náurisira'i ena tikatianakana'i ema Jesús, máimikaratakawarepa ema Pedro. Te jena sacheana'i, napiestara'i ena israelítana eta nanisiraya eta pan maye'ere lewadura.

⁴ Te taekenepa eta nakaratasira'i ema Pedro, náimisiapapa te nakaeratairare. Nawanekapa ena suntaruana tijaneakanaya te machakaya. Kuatromuriana'i ena tijaneakana'i. Ema mapanerecha'i makapakayare'i te namira'u ena achaneana, te táekeneraya eta Pascua.

⁵ Taka'e, ema Pedro, muraka'i eta najaneasira'i te makaerataiya'i. Énasera ena machamuriana tiyujarakana'i me Viya. Nayaseaka'i ichape eta nasamakarewaina máuchukuiraina ema.

Ema émana ángele makuchuku'a'i ema Pedro taye'e eta makaerataiya'i

⁶ Ema Herodes máijarechapa eta sache eta makatupi'ayarepa te namira'u ena achaneana ema Pedro. Te jena yati, ema Pedro tímaka'i te nataraku ena apinana suntaruana. Tikaitia'i te apipi cadena. Ena apinanaware suntaruana najaneaka'iware eta tapajakura eta nakaeratairare.

⁷ Tíja'uchawapa tímerekawa ema ángele mawaneru'i ema Viya. Tijara'iju'eine'i eta makaerataiya'i. Ema ángele maemamakapa ema Pedro, makajamikapa, tási'a maichapa: “¡Piputuvu'u péchepuka!” Tíja'uchawapa téjapumuri'a eta cadena máiti'ana'i te mawa'u ema Pedro,

⁸ tási'a ema ángele maichapa: “Pikamuiri'apa, tási'a pinakaware eta péparupewana.” Taka'e'i maicha'i ema Pedro, tási'a ema ángele máichawarepa: “Pinaka eta pépaku'asa, yarepa pé'ikanu.”

⁹ Ema Pedro máe'ikawanepa ema ángele. Wa'i máimati'ini eta máicharakawapa'i, máimijachaichucha kaimairuruji'i.

¹⁰ Tási'asera, náetavikapa ena tínapukana sentinélana, náetavikaware ena apamuriana. Títekapanapa te tapajakura eta amairi'a'i fierro. Témuna'irikawapa téjiaka, tiúchukanapa te calle. Te tiyere'ianapa eta napaisira'i, majunijikapa ema ángele.

¹¹ Ema Pedro mapaenumawapa makaikutiara'i, tási'a maka'epa: “Níma'apa puiti eta yátupira'i tijaneakanu'i ema Viya. Mawaneka'i ema ángele tikuchuku'apananu'i eta makapasiranuyare'ini ema Herodes.”

¹² Tipanereikene'awapa ema Pedro eta mapaisirapa'i, taka'e matupirupa tiyana'i te supena esu María, maena ema Juan tikaijare'i puiti Marcos. Ena tiurujikawana'i eta nayujarasira'i ena machamuriana'i.

¹³ Máe'a'amekapa eta tapaja tanapaiya'i te calle, tási'a esu esena amaperu tikaijaru Rode, tiyanapa suíma'apana'i nája'a'ipuka ema té'a'ameka'i eta tapaja.

¹⁴ Suímatia'uchawanepa ema Pedro, wá'isera suvéjiaekene'a'ini eta súrisamurewa'i. Tiyanapa tijunapapa te taju'e, sumetapanawakapa eta matiari'ira'i ema Pedro te aneka.

¹⁵ Ena, náichapa: –¡Máurishivipapuka píti! Ésusera suametaichucha eta yátupira'i. Ena náichapa: Wa'i émaina, émapuka ema maye'e ángele.

¹⁶ Émasera ema Pedro tímiyanawaichucha máe'a'ameka'i eta tapaja. Tási'a te tiyananapa navéjiaekene'apana'i, náima'aine'i, tiáramekananaine'i.

¹⁷ Émasera máimikutiarachapa te mawa'u eta namatina, tási'a mametakawakapa eta makuchukuira'i ema Viya taye'e eta nakaeratairare. Tási'a máichapa: –Emétapana ema Santiago, tási'a énapa ena apamuriana viparapenaveana. Taka'e, tiúchukapa tiyanapa te apana awasare.

¹⁸ Te tijara'ipa, ena suntaruana tinanesikarajianaipa, taicha wa'i náecha'ini tája'apuka eta máicharakawa'i ema Pedro.

¹⁹ Ema Herodes makawanairipipa natanuka, eta namaetupiasira'i, tikayasere'ianapa ena suntaruana tijaneakana'i. Nájinasera émanaina'ini nanekapa'ini eta máuchusira'i ema Pedro. Taka'e makawanairipipa nakapakawaka ena suntaruana. Te tamutupa eta juka, ema Herodes tiuchukapa te judea, tiyanapa te Cesarea, étapa makapenaiya'i.

Eta máepenira'i ema Herodes

²⁰ Ema Herodes tisema'i naye'e ena achaneana tikawasana te Tiro étapa te Sidón. Énasera náimiwanerekapa maye'e ema Herodes. Tiyaseserekanapa eta náuriwaina maye'e ema, taicha eta náwasana'i, táitekapaucha'i eta tinikakare, tiási'a'i eta te máwasa ema rey. Taka'e, nakasiñapa ema Blasto, ema majupa'a ema rey, máechejiuchawakaya eta náuriwaina.

²¹ Taka'e, ema Herodes máijarechapa eta sache, máimichu'airaya ena achaneana, eta jena sachekene'i, tikamuiri'apa ema rey eta mamuiri'a tiúriname, téjakapa eta te máejasirare, tási'a téchejikapa.

²² Ena achaneana eta nasamira'i ema, tipiarakanapa. Naka'epa: “¡Ema maka téchejika'i wá'iya achanena, Viya ema maka!”

²³ Taka'e, tíja'uchawapa ema ángele mawaneru'i ema Viya, máijarakapa eta majuma'i ema Herodes, taicha ema Herodes tímijachawa'i Viya'i. Eta taka'e, tanikapa eta vusanuana.

²⁴ Taka'e, kamurianapaipa ena achaneana tisuapana eta máechejiriruwa ema Viya.

²⁵ Te títawanapa eta natupara'a'i ema Bernabé, tási'a émapa ema Saulo, te Jerusalén, tichawanapa te Antioquía, námapa ema Marcos.